Iterambere ridasanzwe ry’ikigega Agaciro Development Fund kimaze kugeramo miliyoni $200

Yanditswe na HABIMANA James
Kuya 6 Nyakanga 2019 saa 10:15
Yasuwe :
0 0

Imibare ituruka mu kigega Agaciro Development Fund yerekana ko gikomeye gutera imbere ubutitsa, aho Ukuboza kwa 2017 kwasize kirimo miliyari 46 Frw naho Ukuboza kwa 2018, kugasiga kirimo miliyari 184 Frw, ni ukuvuga miliyoni $200.

Uku gutera imbere kw’iki kigega guturuka ahanini kuri gahunda yacyo y’ishoramari ituma buri mwaka hari impinduka zikomeye zibaho.

Umwaka wa 2018 wagenze neza cyane ku kigega ndetse n’abanyamigabane bacyo, aho ibyinjiye mu kigega byiyongereyeho miliyari 5.3 Frw ni ukuvuga 37% ugereranyije n’umwaka wabanje.

Imibare igaragaza ko mu 2013 iki kigega cyari kuri miliyari 20.5 Frw, mu 2014 kigira miliyari 24.9, mu 2015 miliyari 29.2, mu 2016 cyari kuri miliyari 35 naho mu 2017 kigera miliyari 46 Frw.

Iki kigega cyavuze ko mu 2019 aribwo kizajya mu cyiciro cya kabiri aho imigabane imwe izashyirwa mu bigo bitandukanye bikazatuma amafaranga yacyo arushaho kwiyongera nk’uko The New Times yabivuze.

Umutungo rusange w’Ikigega Agaciro Development Fund ni miliyari 184 Frw, ni mu gihe umwaka wabanje wari miliyari 55.5 Frw, hakaba harabayeho ubwiyongere bwa 9.6% ugereranyije na 2018.

Mu 2019 iki kigega kizatangira icyiciro cya kabiri cyo gushyira imigabane ifite mu bigo bya leta mu kigega Agaciro, bikazongera umutungo wacyo.

Kugeza ubu inkunga z’amahanga mu ngengo y’imari zirenze miliyoni 400 z’amadorali bingana na 14%, iki kigega cyashyizweho kugira gihangane n’iki kibazo kandi ngo mu myaka itandatu gusa, kimaze kugabanyaho ikigero kingana 8%.

Umwaka ushize ihuriro ry’abantu bakomeye baharanira impinduka Afurika ikeneye, AfroChampions Initiative, ryashyize Agaciro Development Fund, ku mwanya wa kabiri mu bigega byo kwizigama by’ibihugu bikora neza kuri uyu mugabane.

Amanota yatanzwe hagendewe ku buryo ibyo bigega biyobowe, uko bikorera mu mucyo no gutanga amakuru, uko bihagaze mu bwizigame, impamvu yatumye bishyirwaho ndetse n’aho bikura imari.

Agaciro Development Fund ni ikigega cyashyizweho mu Nama y’Umushyikirano ya Cyenda gitangizwa ku mugaragaro na Perezida Paul Kagame ku wa 23 Kanama 2012. Iki kigega kiyoborwa n’Inama y’ubutegetsi (Board) ishyirwaho n’Inama y’Abaminisitiri kigakorerwa ubugenzuzi buri gihembwe.

Ikigega Agaciro Development Fund gikomeje gutera intambwe ikomeye mu kongera umutungo wacyo

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza