Kwamamaza

Itegeko ryavuguruwe: Bazivamo ashobora gusimbuzwa muri EALA mu minsi mike

Yanditswe kuya 29-09-2016 saa 18:21' na Rabbi Malo Umucunguzi


Inteko Ishinga Amategeko, Umutwe w’Abadepite wemeje ivugururwa ry’ingingo ya 22 y’ Itegeko N°15/2012 ryo kuwa 03/05/2012 rigena itora ry’Abadepite b’u Rwanda mu Nteko Ishinga Amategeko y’Umuryango wa Afurika y’Iburasirazuba.

Iyi ngingo yavugaga ko “gusimbura Umudepite w’u Rwanda muri EALA bikorwa iyo avuye mu mwanya we asigaje nibura umwaka umwe kugira ngo manda ye irangire”, ikaba yari intambamyi ku isimburwa rya Christophe Bazivamo muri EALA, weguye mu minsi ishize nyuma yo kugirwa Umunyamabanga Mukuru Wungirije w’Umuryango wa Afurika y’u Burasirazuba (EAC), ushinzwe imari n’ubutegetsi.

Bazivamo yatorewe kwinjira muri EALA ku itariki 13 Kamena 2011 asimbuye Dr Pierre Damien Habumuremyi icyo gihe wari wagizwe Minisitiri w’Uburezi, umwanya yavuyeho aba Minisitiri w’Intebe akaza gusimburwa na Anastase Murekezi.

Mu 2012 yatangiye indi manda y’imyaka itanu igomba kurangira muri Kamena 2017, bivuze ko yeguye manda ye isigaje amezi agera ku munani gusa.

Uyu mushinga w’itegeko rishya wemerejwe ishingiro ndetse uhita unatorwa mu Nteko Rusange y’Igihembwe Kidasanzwe yabaye kuri uyu Kane, ukaba waratangijwe n’abadepite batatu barimo Kayiranga Alfred Rwasa, Yvonne Uwayisenga na Nyirasafari Esperance.

Perezida w’Inteko Ishinga amategeko Umutwe w’Abadepite, Donatille Mukabalisa, yabwiye bagenzi be ko iki gihembwe kidasanzwe bagitumije kuko ingingo zirebwaho basanze zitategereza igihembwe gisanzwe.

Ati “Muzi ko hari umudepite w’u Rwanda weguye muri EALA, akaba agomba gusimburwa ariko mu kureba amategeko anyuranye twagombaga gushingiraho dusanga hari avuguruzanya, akaba ariyo mpamvu twahisemo kubanza kuyahuza.”

“Impamvu tutashoboraga gutegereza igihembwe gisanzwe, twumvaga bikwiye ko umudepite uhagarariye u Rwanda muri EALA yatorwa vuba akabasha kurahira mu gihembwe cyabo giteganyijwe kuva kuwa 09 Ukwakira. Ubwo murumva ko twari dufite iminsi mike kugira ngo abashe kugenda arahire anakurikirane imirimo y’icyo gihembwe kizageza kuwa 21 Ukwakira.’’

Ishingiro ry’iki gihembwe kidasanzwe na gahunda yacyo byemejwe n’abadepite bose ku bwisanzure busesuye.

Depite Alfred Rwasa yasobanuriye abandi badepite ko nyuma y’uko u Rwanda rwinjiye muri EAC mu 2007 rwatangiye guhagararirwa n’abadepite icyenda muri EALA.

Ati ‘‘Itegeko ryerekeye amatora y’abagize Inteko Ishinga Amategeko y’Umuryango wa Afurika y’u Burasirazuba riteganya mu ngingo yaryo ya cyenda agace ka gatatu, ko amatora yo gusimbura umudepite muri EALA adakorwa iyo hasigaye igihe kiri munsi y’amezi atandatu. Icyakora, gusimbura umudepite wari usigaje igihe kiri munsi y’amezi atandatu bishobora gukorwa iyo bigaragaye ko umubare wa ngombwa uteganyijwe n’amategeko ya EALA kugira ngo inteko iterane udashobora kuboneka.’’

“Na none kandi mu ngingo ya 22 y’itegeko no 15/2012 ryo kuwa 3/5/2012 rigena itora ry’abadepite b’u Rwanda muri EALA mu gika cyayo cya kabiri, iteganya ko gusimbura umudepite w’u Rwanda bikorwa iyo umudepite uvuye mu mwanya we asigaje nibura umwaka umwe kugira ngo manda ye irangire.”

Depite Rwasa yavuze ko izo ngingo ebyiri zinyuranye ku buryo impinduka zakozwe ari uguhuza izi ngingo zose, hifashishijwe ingingo ya munani y’itegeko rishyiraho EAC, aho biteganyijwe ko “amategeko y’igihugu atagomba kuvuguruza amategeko yashyizweho n’Inteko Ishinga Amategeko y’Umuryango wa Afurika y’u Burasirazuba.”

Depite Kayiranga Alfred Rwasa

Depite Mporanyi Theobald kimwe na Gatabazi JMV bashyigikiye ishingiro ry’uyu mushinga n’uko utorwa ako kanya utabanje kunyuzwa muri komisiyo ngo usuzumwe.

Gusa Mporanyi yongeyeho ati “Narebye ubu turi mu kwezi cya cyenda 2016, niba bari basanze harimo uko kuvuguruzanya, twabikoze kubera ko ari aya amahirwe twagize? Kuki mbere bitari byarakozwe? Iyo hatabaho iki kintu byari kugenda gute kandi hari itegeko rivuga ko amategeko yasinywe mu rwego rwa EAC, ay’igihugu adashobora kuyajya hejuru?”

Depite Alfred yasubije ko ati “Icyo nabanza nkahamya muri iyi nteko ni uko nta mategeko twishe, amategeko ariho yubahirizwaga. Icya kabiri ni uko nyine mu gihe habonetse ikibazo nk’iki, dukurikiza amategeko dushingiye kuri iryo tegeko navugaga. Niba hari umudepite w’u Rwanda wahawe undi mwanya ugomba gusimbuzwa, birumvikana ko tugomba kubahiriza iri tegeko riruta andi.”

Izi mpinduka zemejwe n’abadepite 53 bari Nteko rusange kuri uyu wa Kane, nta waryanze ndetse nta n’impfabusa yabonetse. Biteganyijwe ko zizabanza kwemezwa na Perezida wa Repubulika, itegeko rigasohoka no mu igazeti ya leta rikabona kubahirizwa, Christophe Bazivamo akabona umusimbura.

Itegeko rigena ko uko iyo umudepite atakaje umwanya muri EALA, “inzira zakoreshejwe kugira ngo abe Umudepite w’u Rwanda muri EALA ni na zo zikoreshwa kugira ngo asimburwe”.

Depite Gatabazi JMV yashyigikiye ishingiro ry’uyu mushinga

Muri EALA, Umuryango FPR Inkotanyi n’Imitwe ya politiki yishyize hamwe nayo bagiramo abadepite bane naho PL, PSD, Urubyiruko, Abagore n’Abafite ubumuga bakagira umudepite umwe umwe.

FPR ifitemo Martin Ngoga, Hajabakiga Mugorenejo Patricia na Rwigema Pierre Céléstin, hagasigara umwanya wa Christophe Bazivamo weguye. PL ifite Odette Nyiramirimo, PSD ikagira Dr. Francois Xavier Kalinda, Urubyiruko ruhagarariwe na Ndikuryayo Straton, abagore bahagarariwe na Nyirahabineza Valerie mu gihe abafite ubumuga bahagarariwe na Dr. James Ndahiro.

Bivuze ko kandi umudepite mushya uzatorwa mu gihe iri tegeko rizaba ryemejwe, azatangwa na FPR Inkotanyi arangize igihe cyari gisigaye kuri manda ya Bazivamo izarangira muri Kamena 2017.

Inkuru bifitanye isano: Urujijo ku isimbuzwa rya Christophe Bazivamo muri EALAhttp://www.igihe.com/amakuru/u-rwan...

Depite Nyirasafari Esperance
Depite Yvonne Uwayisenga umwe mu batangije uyu mushinga w'iri tegeko
Depite Mukama Abas, Mukabalisa Donatile na Uwimanimpaye Jeanne D'Arc

Amafoto: Mahoro Luqman


Kwamamaza

Kwamamaza
IZINDI NKURU WASOMA
TANGA IGITEKEREZO

ANDIKA ICYO UTEKEREZA KURI IYI NKURU

AMATEGEKO AGENGA IYANDIKA RY'IGITEKEREZO CYAWE:
Witandukira kubijyanye n'iyi nkuru; wikwandika ibisebanya, ibyamamaza cyangwa bivangura; wikwandika ibiteye isoni,
Wifuza kubona byihuse ibivugwa/ibisubizo ku gitekerezo cyawe, andika email yawe ahabugenewe.
Igitekerezo cyawe kigaragara nyuma y'isuzuma rikorwa na IGIHE.com
Ibi bidakurikijwe igitekerezo cyanyu gishobora kutagaragara hano cyangwa kigasibwa, Murakoze!
ANDIKA ICYO UTEKEREZA KURI IYI NKURU
Kwamamaza
IBITEKEREZO
Join Us

Socialize with Us
Contacts

Marketing
4546
Editor
078 827 26 21
Management
0788 74 29 08 / 0788 49 69 15

Emails: [email protected], [email protected]

Website Developped by

Uru Rubuga Ruheruka Gushyirwaho Amakuru Wednesday 7 Ukuboza 2016
Copyright © 2009 -2014 - IGIHE Ltd - All Rights Reserved