Itegeko rishya ry’umurimo ryarengeye abakozi batitabwagaho, hategerejwe umushahara fatizo

Yanditswe na Mathias Hitimana
Kuya 9 Nzeri 2018 saa 05:57
Yasuwe :
0 0

Bwa mbere mu Rwanda, abakozi bose bagiye kurengerwa n’itegeko ku birebana n’umushahara bagenerwa n’abakoresha.

Itegeko rishya rigenga umurimo mu Rwanda ryasohotse mu Igazeti ya Leta ku wa 6 Nzeri 2018, risimbura iryagiyeho mu 2009.

Riteganya ko Minisitiri ushinzwe umurimo azashyiraho iteka rigena umushahara-fatizo (amafaranga umukozi adashobora kujya munsi mu kazi).

Hashize igihe hinubirwa ko umushahara fatizo w’amafaranga 100 ku munsi utakijyanye n’igihe kuko umaze imyaka 44 utavugurwa.

By’umwihariko, bitandukanye n’itegeko ryari risanzwe umushahara fatizo uzashyirirwaho ibyiciro by’imirimo yose, yaba iyanditse n’itanditse (nk’abakozi bo mu rugo).

Uretse uburenganzira ku mushahara, umukozi ukora umurimo utanditse yemerewe ikiruhuko, ubwiteganyirize bw’abakozi n’ibindi.

Umunyamabanga Uhoraho muri Minisiteri y’Abakozi ba Leta n’Umurimo mu Rwanda, Musonera Gaspard, yatangarije IGIHE ko kuva itegeko ryasohotse n’iryo teka rya minisitiri rishyiraho umushahara fatizo riri mu nzira.

Ati “Iby’ibanze byose biritegura byarakozwe, hasigaye kubishyikiriza Inama y’Abaminisitiri, inzitizi yari ihari yavuyeho kuva itegeko ririho.”

Yasobanuye ko mu gukora iryo teka byasabye kubanza kuganira n’abantu batandukanye kuko itegeko risanzwe ryageneraga umushahara fatizo abo mu mirimo yanditse gusa.

Mu gihe iryo teka ritarasohoka, ubushakashatsi Ihuriro ry’imiryango iharanira uburenganzira bw’abakozi ryakoze mu Ukuboza 2017, bwagaragaje ko ukurikije uko ibiciro ku isoko bihagaze ndetse n’ibyo umuntu aba akeneye ngo abashe kubaho neza, umushahara fatizo ukwiye kuba nibura 87 285 Frw ku batuye mu cyaro na 126 260Frw ku bo mu mijyi.

Ba rwiyemezamirimo bafatiwe ingamba

Mu gihe hirya no hino hajya humvikana abaturage bamburwa na ba rwiyemezamirimo, itegeko rishya ryazanye umucyo mu kurengera abo bakozi.

Itegeko rivuga uwatsindiye isoko rya Leta cyangwa iry’urwego rwigenga, mbere yo kwishyurwa akazi yakoze, “agaragariza urwego rwatanze isoko ko nta mwenda ukomoka ku mishahara abereyemo abakozi yakoresheje.”

Riteganya ko mu gihe atabishyuye, urwego rwatanze isoko rufatira amafaranga angana n’imishahara abereyemo abo bakozi, kugeza igihe agaragarije ko yabishyuye.

Iri tegeko rishya ryateganyije n’uburyo abakozi bishyurwa mu buryo bwihuse.

Ingingo yaryo ya 122 igira iti “Iyo birenze iminsi mirongo ine n’itanu (45) uwatsindiye isoko atarishyura imishahara y’abakozi, urwego rwatanze isoko rwishyura abakozi imishahara yabo ingana n’amafaranga rwafatiriye.”

Mu zindi mpinduka zigaragara muri iri tegeko, imyaka fatizo yo gutangira gukora akazi ni 16 gusa umwana uri hagati y’imyaka 13 na 15 yemerewe kwitoza umurimo.

Musonera yavuze ko iri tegeko rishya ryanateganyije ibihano bica intege, bikanarandura imirimo ikoreshwa abana.

Umukoresha ku giti cye, ukoresheje umwana umwe mu mirimo ibujijwe akabihamywa n’urukiko ahanishwa igifungo kitari munsi y’imyaka ibiri ariko kitarenze imyaka itanu n’ihazabu y’amafaranga y’u Rwanda atari munsi y’ibihumbi 500 Frw ariko atarenze miliyoni eshanu cyangwa kimwe muri ibyo bihano.

Abakoraga imirimo itanditse nabo bibutswe n'itegeko rishya ry'umurimo

[email protected]


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza