Kwamamaza

Itegeko rigenga ibigenerwa umugore uri mu kiruhuko cyo kubyara ryatangiye gukurikizwa

Yanditswe kuya 1-11-2016 saa 21:02' na Philbert Hagengimana


Nyuma y’amezi atandatu risohotse ariko ntiritangire gukurikizwa, Itegeko rigenga ibigenerwa umugore uri mu kiruhuko cyo kubyara ryatangiye gukurikizwa, nyuma y’aho ibyarizitiraga bikuweho mu Iteka rya Minisitiri ryerekeye iryo tegeko, ryasohotse mu Igazeti ya Leta nᵒ 44 yo kuwa 31/10/2016.

Iryo tegeko ryasohotse mu Igazeti ya Leta nomero idasanzwe yo ku wa 20/04/2016, ariko ntiryahita ritangira gukurikizwa kuko hari Amateka ya Minisitiri (Ministerial orders) yagombaga kugena uko zimwe mu ngingo z’iri tegeko zizashyirwa mu bikorwa kandi ayo mateka akaba yari atarasohoka.

Ibyari bitegerejwe ngo iryo tegeko ritangire gukurikizwa ni ingingo igena uburyo bwo kwiyandikisha mu buyobozi bw’Ubwiteganyirize; ibikubiye mu mushahara mbumbe ubarirwaho umusanzu; uburyo imenyekanisha n’iyishyurwa ry’umusanzu bikorwa; uburyo ibihano byo kudatanga umusanzu ku gihe bitangwa n’uburyo bwo kwishyura ibigenerwa umugore uri mu kiruhuko cyo kubyara.

Ibyo ni byo byasohotse muri iyo Gazeti ya Leta Leta nᵒ 44 yo kuwa 31/10/2016 nk’uko inabigaragaza mu ngingo yayo ya mbere. Kuba iri teka risohotse binasobanuye ko imishahara y’abakozi igiye gutangira gukatwaho iyo misanzu.

Ibyo umugore uri mu kiruhuko cyo kubyara agenerwa

Umugore uri mu kiruhuko cyo kubyara agenerwa amafaranga angana n’umushahara we wa nyuma watanzweho umusanzu.

Guhabwa ayo mafaranga bitangirana n’icyumweru cya karindwi cy’ikiruhuko cyo kubyara, akayahabwa mu gihe kingana n’ibyumweru 6 bya nyuma by’ikiruhuko cyo kubyara. Ariko kugira ngo umugore uri mu kiruhuko cyo kubyara ahabwe ibyo itegeko rimugenera hari ibyo agomba kuba yujuje.

Ibi birimo kuba ari mu kiruhuko cyo kubyara kandi akaba afite icyemezo cyabugenewe cyujujwe kandi gishyizweho umukono n’umukoresha gishyikirizwa Ubuyobozi bw’Ubwiteganyirize mu gihe kitarenze amezi atandatu (6) uhereye umunsi yatangiriyeho ikiruhuko cyo kubyara.

Harimo kandi kuba yaratanze imisanzu nibura ukwezi kumwe kubanziriza ukwezi atangiriyeho ikiruhuko cyo kubyara mu bwishingizi bw’ibigenerwa umugore uri mu kiruhuko cyo kubyara.

Ni bande barebwa n’iri tegeko?

Iri tegeko rireba abakozi bose muri rusange baba abagengwa na sitati y’abakozi ba Leta na sitati zihariye cyangwa abagengwa n’itegeko ry’umurimo mu Rwanda hatitawe ku bwenegihugu bwabo.

Rireba kandi abanyapolitiki ndetse n’abakozi b’abanyamahanga boherejwe n’ibigo byabo gukorera mu Rwanda mu gihe imirimo bakora izarenza amezi 12.

Ingingo ya 6 y’iryo teka rya Minisitiri ni yo igena ibikubiye mu mushahara mbumbe ubarirwaho umusanzu.

Iyo ngingo igira iti “Umusanzu ugenewe ubwishingizi bw’ibigenerwa umugore uri mu kiruhuko cyo kubyara ubarirwa ku mushahara mbumbe ugizwe n’umushahara shingiro, inyungu, ibihembo by’ibiruhuko byishyurwa, inyongera, ibihembo binyuranye n’izindi nyungu zose z’amafaranga ahwanye n’iby’umukozi abona bitari amafaranga.”

Inshingano z’umukoresha

Umukoresha afite inshingano yo kwiyandikisha no kwandikisha abakozi be mu gihe kitarenze iminsi irindwi y’akazi ikurikira itariki yahereyeho umukozi wa mbere akazi.

Umukoresha kandi afite inshingano zo gukusanya umusanzu wose ugizwe n’umugabane umukoresha atangira umukozi n’umugabane umukozi agomba gutanga ukurwa ku mushahara we igihe cy’ihemba.

Umusanzu w’ubwishingizi bw’ibigenerwa umugore uri mu kiruhuko cyo kubyara ni ibice bitandatu ku ijana (0,6%) by’umushahara ubarirwaho umusanzu. Umugabane w’umukoresha kimwe n’uw’umukozi ni ibice bitatu ku ijana (0,3%) by’umushahara ubarirwaho umusanzu kuri buri wese.

Umukoresha anafite inshingano zo kumenyekanisha akanatanga umusanzu yakusanyije buri kwezi mu buyobozi bw’Ubwiteganyirize bitarenze itariki ya 15 z’ukwezi gukurikira ukwishyurirwa umusanzu.

Iyo atabikoze ni we wishyura ibirarane byose, atagize icyo akura ku mushahara w’umukozi.

Ubwo Abadepite basuzumaga itegeko rigenga ibigenerwa umugore uri mu kiruhuko cyo kubyara

Kwamamaza

Kwamamaza
IZINDI NKURU WASOMA
TANGA IGITEKEREZO

ANDIKA ICYO UTEKEREZA KURI IYI NKURU

AMATEGEKO AGENGA IYANDIKA RY'IGITEKEREZO CYAWE:
Witandukira kubijyanye n'iyi nkuru; wikwandika ibisebanya, ibyamamaza cyangwa bivangura; wikwandika ibiteye isoni,
Wifuza kubona byihuse ibivugwa/ibisubizo ku gitekerezo cyawe, andika email yawe ahabugenewe.
Igitekerezo cyawe kigaragara nyuma y'isuzuma rikorwa na IGIHE.com
Ibi bidakurikijwe igitekerezo cyanyu gishobora kutagaragara hano cyangwa kigasibwa, Murakoze!
ANDIKA ICYO UTEKEREZA KURI IYI NKURU
Kwamamaza
IBITEKEREZO
Join Us

Socialize with Us
Contacts

Marketing
4546
Editor
078 827 26 21
Management
0788 74 29 08 / 0788 49 69 15

Emails: [email protected], [email protected]

Website Developped by

Uru Rubuga Ruheruka Gushyirwaho Amakuru Sunday 4 Ukuboza 2016
Copyright © 2009 -2014 - IGIHE Ltd - All Rights Reserved