Kwamamaza

Itangazamakuru ryitabajwe mu ngamba nshya zo kurwanya Sida

Yanditswe kuya 22-09-2016 saa 14:45' na Niyonsenga Schadrack


Ikigo cy’Igihugu cyita ku buzima (RBC) cyatangaje ko hakenewe ubuvugizi bw’inzego zitandukanye mu kurandura ikibazo cy’abantu batipimisha ngo bamenye uko bahagaze ku bijyanye na virusi itera Sida ari nabyo bidindiza serivisi zigenerwa ababana n’ubu bwandu.

RBC yagaragaje ko zimwe mu mpamvu zagaragaye zituma abantu badashishikarira kwipimisha SIDA ngo harimo kwitinya, kudasobanukirwa na gahunda ziriho, gutinya abantu bababona bagiye kwipimisha, gusa ngo haracyagaragara n’imbogamizi ziterwa na bamwe mu banduye SIDA ariko ntibahugukire gahunda ziba zarabagenewe.

Ikigo cy’Igihugu cyita ku buzima ku bufatanye n’Ishami rishinzwe kurwanya SIDA mu Muryango w’Abibumbye (UNAIDS) bategura amahugurwa ahabwa abanyamakuru mu rwego rwo kurushaho kugeza ubutumwa ku bantu benshi.

Abanyamakuru bashishikarizwa gufasha iki kigo gutanga ubutumwa ku bantu bose mu bikorwa bibakangurira kwirinda Virusi itera Sida.

Umuryango w’abanyamakuru barwanya SIDA (ABASIRWA) wafatanyije na RBC muri iki gikorwa uvuga ko guhugurirwa abanyamakuru gufasha mu gukangurira abantu kwirinda Sida ari amahirwe akomeye bungutse mu kazi kabo kuko mbere babaga badafite amakuru ahagije y’uko iki kibazo giteye.

Bahati Innocent uhagarariye ABASIRWA yagize ati “ Ni amahirwe akomeye ku banyamakuru cyane cyane abakora ku buzima, nta makuru akenshi babaga bafite kuri iki kibazo, bizatuma batangaza ibyo bafiteho amakuru.”

Umukozi wa RBC mu ishami rishinzwe kurwanya SIDA, Mugwaneza Placidie, avuga ko iki kigo cyatangije uburyo bushya bwo gushishikariza abantu kumenya no kwirinda Sida binyuza mu itangazamakuru.

Yagize ati “Hari gahunda zitandukanye zo kwigisha abantu gahunda za RBC zo kurwanya Sida, by’umwihariko uyu munsi twashatse kwigisha izo gahunda abanyamakuru kuko ni abafatanyabikorwa bacu bakomeye mu kwita ku buzima.
Abanyamakuru bagera ku bantu benshi, bakora ibiganiro n’amakuru ndetse bashobora gufasha cyane mu gukangurira abanyarwanda kwirinda icyo cyorezo.”

Mugwaneza avuga ko izi gahunda za RBC iri kwigisha abantu zikubiye mu magambo y’Icyongereza “Treat All” na “All in” bishatse kuvuga ngo “Vura bose”, “Twese twitabire” zigamije gufasha abaturage bose kumenya uko ubuzima bwabo buhagaze kugira ngo abakeneye ubufasha babuhabwe.

“Treat all” ni gahunda igamije gutangiza imiti umuntu wese ukimenya ko yanduye Virusi itera Sida, bitandukanye n’ibyari bisanzwe kuko ubundi umuntu yahabwaga imiti bimaze kugaragara ko abasirikare b’umubiri bari gucika intege.

“All In” yo ni gahunda igamije gushishikariza abantu bose kumenya amakuru yose arebana n’ubwandu bwa Sida ariko bigamije kuyirinda, ikazita cyane ku rubyiruko.

RBC yihaye intego ya 90.90.90, isobanuye ko mu mwaka wa 2020 abantu 90% banduye Sida bagomba kuzaba baripimishije babizi ko bayifite, abandi 90% bafite iyi virusi bazaba bahabwa imiti igabanya ubukana na ho 90% by’abafata iyi miti bazaba badafatwa n’ibyuririzi nk’ikimenyetso ko imiti bahabwa ibagigira akamaro.

Kugeza ubu RBC ivuga abantu bagera kuri 210,000 ari bo bafite Sida mu Rwanda icyakora ngo hari imbogamizi ko aba bose batari muri gahunda za Leta zifasha abanduye.

RBC kandi ivuga ko hari gahunda yo gushishikariza Abanyarwanda kwisiramuza, kuri ubu 30% by’abanyarwanda bamaze kwisiramuza intego ngo ni ukugera kuri 66% muri 2018.

Ubushakashatsi bwagaragaje ko kwisiramuza birinda ubwandu bwa SIDA ku kigereranyo cya 60%.

Umukozi wa RBC mu ishami rishinzwe kurwanya SIDA, Mugwaneza Placidie, avuga ko imikoranire n'itangazamakuru izatanga umusaruro
Abanyamakuru bahuguriwe uburyo bwo gushishikariza abantu kwipimisha no kwirinda ubwandu bwa virusi itera Sida

Kwamamaza

Kwamamaza
IZINDI NKURU WASOMA
TANGA IGITEKEREZO

ANDIKA ICYO UTEKEREZA KURI IYI NKURU

AMATEGEKO AGENGA IYANDIKA RY'IGITEKEREZO CYAWE:
Witandukira kubijyanye n'iyi nkuru; wikwandika ibisebanya, ibyamamaza cyangwa bivangura; wikwandika ibiteye isoni,
Wifuza kubona byihuse ibivugwa/ibisubizo ku gitekerezo cyawe, andika email yawe ahabugenewe.
Igitekerezo cyawe kigaragara nyuma y'isuzuma rikorwa na IGIHE.com
Ibi bidakurikijwe igitekerezo cyanyu gishobora kutagaragara hano cyangwa kigasibwa, Murakoze!
ANDIKA ICYO UTEKEREZA KURI IYI NKURU
Kwamamaza
IBITEKEREZO
Join Us

Socialize with Us
Contacts

Marketing
4546
Editor
078 827 26 21
Management
0788 74 29 08 / 0788 49 69 15

Emails: [email protected], [email protected]

Website Developped by

Uru Rubuga Ruheruka Gushyirwaho Amakuru Saturday 10 Ukuboza 2016
Copyright © 2009 -2014 - IGIHE Ltd - All Rights Reserved