Kwamamaza

Itangazamakuru ryateye imbere ho 8.9% mu myaka itatu ishize

Yanditswe kuya 7-11-2016 saa 17:48' na Philbert Hagengimana


Ubushakashatsi ku bipimo bigaragaza uko iterambere ry’Itangazamakuru mu Rwanda rihagaze, bugaragaza ko habayeho kuzamuka ku kigero cya 8.9% ugereranyije n’uko byari bihagaze mu 2013.

Raporo y’ubu bushakashatsi yashyizwe ahagaragara kuri uyu wa Mbere tariki ya 7 Ugushyingo, igaragaza ko amategeko yorohereza ubwisanzure bwo gutanga ibitekerezo n’ubw’Itangazamakuru bwazamutse buva kuri 71.5% mu 2013 bugera kuri 82.18% mu 2016.

Ibitangazamakuru byinshi binyuranye mu byo bitangaza, bifite ubushobozi bw’imari ihagije, bishyirwaho kandi bigacungwa neza mu mucyo, ubushakashatsi bukabihamya bugaragaza ko byavuye kuri 50.4% mu myaka itatu ishize, none bikaba bigeze kuri 62.2% uyu mwaka.

Itangazamakuru nka bumwe mu buryo bwo guteza imbere Demukarasi, ubushakashatsi bibyemeza ku kigero cya 75.7% bivuye kuri 67.1% mu 2013.

Guteza imbere umwuga w’Itangazamakuru, kongera ubushobozi no gushyigikira imiryango iharanira ubwisanzure bw’Itangazamakuru, byazamutse ku kigero cya 59.4% bivuye kuri 51.9% mu 2013.

Ibikorwaremezo biteza imbere itangazamakuru ryigenga birahagije. Ubu ngo bigeze kuri 70.0% bivuye kuri 68.1%.

Abanyamakuru bakurikiza amahame agenga umwuga wabo ndetse n’andi mategeko agenga Itangazamakuru, ku kigero cya 71.4%, igipimo kibayeho bwa mbere, dore ko mu 2013 bitari byakozweho ubushakashatsi.

Uko abaturage bagerwaho n’amakuru n’Ibitangazamakuru, byazamutse ku kigero cya 65.8% bivuye kuri 55.2% mu 2013.

Muri rusange, impuzandengo y’ibipimo bigaragaza iterambere ry’Itangazamakuru mu Rwanda mu mwaka wa 2016, bigaragaza ko ryateye imbere ku kigereranyo cya 69.6% bivuye kuri 60.7% mu 2013, bingana na 8.9%.

Nk’uko Dr.Kayumba Christopher, Umwarimu muri Kaminuza y’u Rwanda yabisobanuye, ngo kugira ngo Itangazamakuru ritere imbere kuri icyo kigero, byatewe ahanini n’impinduka zabayeho, zishingiye ku mavugurura yakozwe guhera mu 2013, ahavuguruwe itegeko rigenga itangazamakuru, hagashyirwaho Urwego rw’Abanyamakuru bigenzura (RMC) n’ibindi, ibyo bikajyana n’ishyirwaho ry’Itegeko rijyanye no kubona amakuru.

Iterambere ridasanzwe mu gukoresha imbuga nkoranyambaga

Ubu bushakashatsi kandi bugaragaza ko umubare w’Abanyarwanda bakoresha imbuga nkoranyambaga mu gushaka amakuru ugenda wiyongera, aho bavuye ku 9.4% mu 2013 bakaba bageze kuri 17% mu 2016.

Abakoresha WhatsApp ni bo bazamutse ku kigero kiri hejuru cyane, kuko bavuye kuri 14% mu 2013 bagera kuri 65.5% mu 2016, mu gihe abakoresha facebook bavuye kuri 62.6% bagera kuri 76.3%. Abakoresha Twitter bo bavuye kuri 14.4% bagera kuri 35% naho Youtube bo bavuye kuri 3.3% bagera kuri 26.4%.

Iterambere mu gukoresha imbuga nkoranyambaga ryashyize mu kaga bimwe mu bitangazamakuru cyane ibyandika ku mpapuro, kuko uburyo bikoreshwa bwagabanutse buva kuri 15.3% bugera kuri 13.8%.

Ubushakashatsi bwakozwe mu 2013 bwari bwagaragaje ko mu bantu babajijwe, 95.5% bavuze ko bakura amakuru kuri radio, none uwo mubare wasubiye inyuma, aho bageze kuri 89% mu 2016. Ibi na byo ngo ni ingaruka z’ubwiyongere bw’ikoreshwa ry’imbuga nkoranyambaga.

Ubushakashatsi kandi bugaragaza ko Televiziyo na zo ziri kuzamuka mu buryo zikurwaho amakuru, biterwa n’amavugururwa yakozwe hakurwaho uburyo bwa kera “Analogue” hagashyirwaho uburyo bugezweho bwo gusakaza amajwi n’amashusho (Digital).

Ibyo byanatumye televiziyo ziyongera ziva kuri ebyiri zariho mu 2013 zigera kuri 12 mu 2016.

Ubwo bushakashatsi bwagaragaje ko nubwo habayeho iterambere mu bipimo by’itangazamakuru mu Rwanda, na none hakiriho imbogamizi zishingiye ku mikoro y’ibitangazamakuru, ubumenyi bukiri hasi mu gukora kinyamwuga n’ibindi.

Dr Kayumba yemeza ko iterambere ry'Itangazamakuru muri iyi myaka rishingiye ku mavugurura yagiye aba muri uru rwego

Kwamamaza

Kwamamaza
IZINDI NKURU WASOMA
TANGA IGITEKEREZO

ANDIKA ICYO UTEKEREZA KURI IYI NKURU

AMATEGEKO AGENGA IYANDIKA RY'IGITEKEREZO CYAWE:
Witandukira kubijyanye n'iyi nkuru; wikwandika ibisebanya, ibyamamaza cyangwa bivangura; wikwandika ibiteye isoni,
Wifuza kubona byihuse ibivugwa/ibisubizo ku gitekerezo cyawe, andika email yawe ahabugenewe.
Igitekerezo cyawe kigaragara nyuma y'isuzuma rikorwa na IGIHE.com
Ibi bidakurikijwe igitekerezo cyanyu gishobora kutagaragara hano cyangwa kigasibwa, Murakoze!
ANDIKA ICYO UTEKEREZA KURI IYI NKURU
Kwamamaza
IBITEKEREZO
Join Us

Socialize with Us
Contacts

Marketing
4546
Editor
078 827 26 21
Management
0788 74 29 08 / 0788 49 69 15

Emails: [email protected], [email protected]

Website Developped by

Uru Rubuga Ruheruka Gushyirwaho Amakuru Monday 5 Ukuboza 2016
Copyright © 2009 -2014 - IGIHE Ltd - All Rights Reserved