Ishuri ryo muri Rutsiro ryagaragajwe nk’intangarugero mu kurera neza

Yanditswe na Prudence Kwizera
Kuya 12 Gicurasi 2018 saa 12:02
Yasuwe :
0 0

Abagize itsinda ry’abakozi ba Minisiteri y’Uburezi bashimiye Urwunge rw’Amashuri rwa Gahondo mu Karere ka Rutsiro ko ari ishuri rigaragaza umurava mu kurera abana neza no kubitaho by’umwihariko hagamijwe ko biga neza.

Icyo kigo cy’amashuri giherereye mu Murenge wa Kivumu cyasuwe muri gahunda ya Minisiteri y’Uburezi yo gukora ubukangurambaga bugamije kuzamura ireme ry’uburezi mu mashuri.

Iryo shuri ryagaragayemo ibyiza ryakoze birimo kuzamura umubare w’abana bafatira ifunguro rya saa sita ku ishuri, kubaka igikoni cyiza cyo gutekeramo, gutera imboga, ububiko by’ibyo kurya, ibikoresho byo mu gikoni no kugira isuku.

Umuyobozi w’iryo shuri, Rwarahoze André yavuze ko ibyo bagezeho byose bikomoka ku bufatanye n’ababyeyi ndetse n’ubuyobozi.

Ati “Iyo hari icyo dushaka gukora tubanza kujya inama n’ababyeyi ndetse n’ubuyobozi. Nk’ubu mu kuzamura umubare w’abana barira ku ishuri saa sita twafashe ingamba zo gukora urutonde rw’ababyeyi batitabira dufatanya n’akagari nako gahwitura ubuyobozi bw’umudugudu kugira ngo begere ababyeyi babakangurire iyi gahunda”.

Rwarahoze avuga kandi ko nk’ubuyobozi bw’ishuri nabo bafata umwanya bakajya gusura ababyeyi mu ngo bakaganira nabo kugira ngo babasobanurire ibyiza byo gushyigikira abana mu myigire.

Imibare igaragazwa n’ubuyobozi bw’iryo shuri yerekana ko mu banyeshuri 585 bahiga abagera kuri 290 ari bo babasha kurya ariko imibare iri kugenda izamuka ugeranyije n’uko mu mwaka ushize haryaga abatageze kuri 50.

Minisiteri y’Uburezi yashimye umwihariko w’iri shuri

Umukozi mu Kigo cy’Igihugu gishinzwe Uburezi (REB), Mutsinzi Antoine, wari uyoboye itsinda ryabahasuye yavuze ko mu mashuri arenga 10 bamaze gusura basanze Urwunge rw’Amashuri rwa Gahondo rugaragaza umwihariko.

Ati “Nk’iyo urebye mu gikoni aho bategurira amafunguro n’ibikoresho bihari ubona biteguye kwakira abana. Yaba isuku imeze neza, ariko uturima tw’igikoni tumeze neza kandi dufasha muri iyi gahunda yo kugaburira abana. N’ubwo imibare y’abana barya ikiri hasi ariko urebye ingamba bafashe ubona ko hari icyizere ko ubutaha tuzasanga yarazamutse”.

Mutsinzi Antoine yavuze ko ibyiza bibera muri iryo shuri birimo gukora uturima tw’igikoni ari ingirakamaro mu myigishirize kuko ari bimwe mu bikubiye mu nteganyanyigisho nshya yatanzwe aho umunyeshuri yigishwa amasomo azamufasha kwibeshaho atari ukwigira gufata mu mutwe gusa.

Ishuri ryijejwe ubuvugizi ku kibazo ryagaragaje

Urwunge rw’Amashuri rwa Gahondo rwagaragaje ikibazo cy’uko abanyeshuri nta mudasobwa bahawe kuko ishuri nta cyumba (Smart Classroom) cyo kuzakira bafite, bizezwa uvugizi.

Umukozi mu Kigo cy’Igihugu gishinzwe Uburezi (REB), Mutsinzi Antoine, yavuze ko ikibazo cyabo cyumvikana kandi babiganiriyeho n’ubuyobozi bw’Akarere ka Rutsiro ko kitabwaho by’umwihariko.

Ati “Urebye uko twabonye iri shuri bakeneye ubuvugizi kugira ngo babone n’izindi mbaraga kuko bigaragara ko bahawe n’ibikoresho babikoresha neza. Twavuganye n’ushinzwe uburezi ku Karere kugira ngo abafashe ariko natwe turabivugana na Meya kugira ngo mu bo baha ibyumba by’amashuri aha bazahahe umwihariko”.

Urwunge rw’Amashuri rwa Gahondo rifite abanyeshuri 2 075 mu mashuri abanza na 585 biga mu cyiciro rusange.

Mu Rwunge rw’amashuri rwa Gahondo hatewe imboga zifashishwa mu gutegurira abana amafunguro
Abiga mu cyiciro rusange bifashisha mudasobwa zahawe abiga mu mashuri abanza mu rwego rwo kwimenyereza ikoranabuganga kuko bo nta zo barahabwa
Minisiteri y'Uburezi yashimye uburyo mu Rwunge rw’amashuri rwa Gahondo hatewe imboga zo kugaburira abana

[email protected]


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza