00:00:00 IGIHE NETWORK KN KINYARWANDA EN ENGLISH FR FRANCAIS

Ishimwe, Irakoze, Igiraneza: Amazina ya Viziyo Abanyarwanda baharaye kwita abana babo

Yanditswe na Ferdinand Maniraguha
Kuya 25 Gicurasi 2021 saa 11:52
Yasuwe :
0 0

Umunyarwanda yaravuze ati ‘So ntakwanga akwita nabi’. Uyu mugani ushobora kuba amateka kuko kwita izina bisigaye ari umushinga utegurwa ndetse hakaba imishyikirano hagati y’ababyeyi, umuryango n’inshuti ku buryo ya mazina abana bitwaga bitewe n’uko ababyeyi babo baramutse ntaho yamenera muri iki kinyejana.

Hari mugenzi wanjye duherutse kujya impaka ambwira amakuru y’umusaza witwa ‘Gihozo’, narasetse ndakumbagara, umusaza w’imyaka 60 n’imisago witwa iryo zina, sinabyemeye, numvaga atari byo nubwo nyuma nasanze ari byo.

Icyakora mu myaka mike iri imbere nta gitangaza kizaba kirimo kuko uko isi itera imbere, inzego zose z’ubuzima zirahinduka harimo n’izo kwita amazina. Abize mu myaka ya za 1990 bazi uburyo iyo mwarimu yahamagaraga abitabiriye akagera ku bitwa ba ‘Muka…’, twese tugasinzira kubera ubwinshi bw’ayo mazina.

Ibintu byarahindutse, ubu amazina nka Irakoze, Ishimwe, Igiraneza, Uwase, Hirwa n’andi nk’ayo niyo agezweho.

Raporo y’Ikigo cy’Irangamimerere y’umwaka wa 2020 ku mibare y’ingenzi mu buzima n’imibereho by’Abanyarwanda (Rwanda Vital Statistics Report 2020), igaragaza ko hari amazina ahuriweho Abanyarwanda bise abana babo mu mwaka ushize.

Mu bana b’abahungu, amazina yiswe cyane ku isonga haza izina Ishimwe ryiswe abana 7.190, Mugisha ryiswe abana 4.292, Irakoze ryiswe abana 3.542, Hirwa ryiswe abana 2.723 naho Igiraneza ryiswe abana 2.402.

Mu bakobwa izina ryakunzwe cyane ni Ineza ryiswe 6.403, Uwase ryiswe 5.863, Ishimwe ryiswe 5.435, Irakoze ryiswe 3.995 na Uwineza ryiswe 3.090.

Ntirenganya Ange Daniel n’umufasha we, bamaze umunsi umwe bibarutse umwana w’imfura w’umuhungu mu bitaro bya Kaminuza bya Kigali (CHUK). Bamuhaye izina rya Shami Kundwa kuko yitezweho kuba ishami rigaba andi mu muryango mushya.

Ntirenganya yabwiye IGIHE ko izina ry’umwana batangiye kuritegura ubwo inda yari ifite amezi ane, birinda ko igihe cyazabagendana bakita izina batateguye.

Yavuze ko birinze kumera nk’ababyeyi bo mu bihe byashize, aho bitaga amazina bashingiye ku bihe cyangwa ibibazo barimo, ugasanga umwana ahindutse urwibutso rw’ibihe bibi, aho kuba urw’ibyiza.

Ati “Kera abantu batekerezaga ibibazo barimo, niba ari urubanza, niba ari ibibazo bakumva ko umwana uzavuka agomba kuba nk’urwibutso kuri icyo kibazo. Bakavuga bati ‘uyu ni Nyirabyago’ kuko bafite ibyago, Bati uyu ni ‘Bucumi’ kuko ari uwa cumi.”

“Hari uwo nzi wiswe Rutamujyanyenejonumunsi. Ngo mama we yabyaraga abana bose bagapfa bakivuka. Undi rero amaze iminsi ibiri akiriho, nibwo bamwise gutyo, bamutega iminsi.”

Ntirenganya yavuze ko umwana adakwiriye kuba urwibutso rw’ibibi, ahubwo akwiriye kuba icyerecyezo cy’umuryango n’icyo bamwifuzaho cyiza mu bihe bizaza.

Ati “Izina ni ibyishimo si ibihe bibi. Umwana aba azanye amateka y’ibyishimo n’umunezero. Ni ipfundo ripfunditse urukundo hagati y’umugabo n’umugore, aho kugira ngo aze kubibutsa ibyago n’agahinda. Ni izina ry’intangiro y’umunezero mu muryango, ku buryo uwumvise izina yumva icyo nk’umuryango dushaka. Hari igihe izina riba ribumbatiye icyerecyezo cy’umuryango.”

Guhera umwaka ushize, ibijyanye no kwandikisha abana byashyizwe mu mavuriro n’ibitaro bivanywe ku mirenge kugira ngo byorohereze ababyeyi.

Umwe mu banditsi b’Irangamimrerere mu karere ka Bugesera utifuje ko amazina ye atangazwa, yabwiye IGIHE ko guhinduka kw’amazina Abanyarwanda bita abana babo, byaturutse ku myumvire yahindutse ndetse n’imbaraga zashyizwemo.

Yavuze ko mbere abana bacyandikishwa ku mirenge, iyo umubyeyi yazaga afite amazina y’amagenurano, bamuganirizaga byaba na ngombwa bakamusaba kujya kuyahindura.

Yagize ati “Turamubwira agasubirayo ariko urebye muri iyi minsi baragabanyije. Bya bindi bavugaga ngo Tubanambazi, Mbarimombazi, akenshi iyo bayazanaga twababwiraga ko ayo mazina hari ubwo abana bakura akabatera ipfunwe.”

Uyu muyobozi yavuze ko umwana wiswe izina ribi akurana ipfunwe, bikaba byanagira ingaruka ku buzima bwe mu gihe kizaza.

Ati “Umwana arakura yajya mu bandi yanarivuga, bikamutera ipfunwe. N’iyo haba hari ikibazo gihari mu babyeyi, nta mpamvu yo kugishyiramo umwana w’inzirakarengane ubinyujije mu izina.”

Yongeyeho ati “Hari ibyo bajya bavuga wenda nubwo utabigenderaho, ngo izina ry’umuntu riramukurikirana. Burya byaba byiza kukwita Mugisha ukagukurikirana, ariko se ibaze kwita umwana Nyiragahinda, urumva ko ari ikibazo.”

Mu mwaka wa 2020 mu Rwanda havutse abana 312.678 barimo abahungu 158.450 n’abakobwa 154.228.

Abo bana bandikishijwe mu irangamimerere ku kigero 85 %, bivuye ku iyandikisha rya 87 % mu 2019. Ikigo cy’Igihugu cy’Ibarurishamimabare cyatangaje ko uko gusubira inyuma ahanini byatewe n’icyorezo cya Covid-19 cyatumye ibikorwa bimwe na bimwe bifunga harimo n’ibiro bya Leta ahandikirwaga abana bavutse.

Abangavu ibihumbi 13 batewe inda

Mu bana bavutse umwaka ushize, Raporo igaragaza ko harimo 13.185 bavutse ku babyeyi bafite hagati y’imyaka 15 na 19. Ni imibare ikiri hejuru ugereranyije n’imbaraga u Rwanda rushyira mu kugabanya umubare w’abana babyara bakiri bato, kuko akenshi abari muri iyo myaka baba bakiri mu mashuri yisumbuye.

Kubyara kwabo bivuze ko bamwe amashuri bayacikiriza cyangwa bakaba bayahagaritse kugira ngo babashe kwita ku bana babo.

Raporo ya NISR igaragaza ko icyiciro cy’imyaka cyagaragayemo kubyara abana benshi umwaka ushize, ari icy’abagore bari hagati y’imyaka 25 na 29 kuko havutsemo abana 77,987.

Icyiciro cy’abana bari munsi y’imyaka 15, umwaka ushize cyavutsemo abana 89 mu gihe mu cyiciro cy’abagore bakuze bari hejuru y’imyaka 50, havutsemo abana 602.

Abana benshi bavukiye mu karere ka Gasabo ahavukiye abana 22.231, hakurikiraho Nyagatare, Gatsibo, Kicukiro na Kirehe, mu gihe abana bake bavutse mu turere twa Ngororero ahavutse abana 5.941, Nyabihu, Muhanga, Burera na Karongi.

U Rwanda ruza ku isonga muri Afurika mu kugabanya ku buryo bukomeye impfu z’abana bapfa bavuka, kuko zageza ku bana 203 mu mbyaro ibihumbi ijana mu 2019/2020 zivuye ku bana 1071 mu mbyaro ibihumbi ijana mu mwaka wa 2000.

Abana bavuka kuri ubu mu Rwanda basigaye bahabwa amazina hadashingiwe ku bibazo ababyeyi barimo ahubwo hashingiwe ku cyerecyezo n'ibyo bifuriza uwo mwana (Ifoto: UNICEF Rwanda)

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .