IPRC East: Hatangijwe gahunda yo gukundisha abato kwihangira imirimo

Yanditswe na Ishimwe Israel
Kuya 22 Ugushyingo 2016 saa 09:01
Yasuwe : XX
130 70

Mu rwego rwo gutegura ejo heza binyuze mu kwihangira umurimo no gukunda igihugu, gukurana inyota y’imyuga n’ubumenyingiro, urubyiruko rwatangiye gukurikirana ibikorwa by’uyu mwaka bya gahunda y’urubuga rw’abana ‘Space for Children’ na “Make them Job Creators’ ifasha abanyeshuri kwiyungura ubumenyi mu kwihangira imirimo.

Abanyeshuri bo mu mashuri abanza n’ayisumbuye bagera kuri 80 batangiye amasomo n’ibikorwa bitandukanye bizamara ukwezi kuri uyu wa Mbere, tariki ya 21 Ugushyingo 2016 mu Ishuri rikuru ryigisha imyuga n’ubumenyingiro mu Ntara y’Iburasirazuba (IPRC East).

Space for Children ikozwe ku nshuro ya gatatu igenewe abana bo mu mashuri abanza ni gahunda igamije kubategura kuzaba abaturage bakunda igihugu, bafite ubushobozi bwo kwiteza imbere no kwihesha agaciro.

Amasomo bahabwa arimo kubakundisha imyuga n’ubumenyingiro, kwihangira imirimo no guhanga udushya, kugira umuco wo gukunda igihugu n’ubwitange, indangagaciro na kirazira z’umuco nyarwanda, kwizigamira, n’ibindi.

Iyi gahunda izafasha nanone abana kugira ubushobozi bwo kwiyobora no kuyobora abandi, umuco wo gukorera hamwe no kuyobora ibyiyumviro byabo, nk’uko abayiteguye babisobanura.

Gahunda ya Make them Job Creators (Bafashe kuba ba Rwiyemezamirimo), ibaye ku nshuro ya kabiri, igenewe abanyeshuri bo mu mashuri yisumbuye. Yigisha guhanga umurimo, ikanaha urubyiruko rwo mu mashuri yisumbuye icyerekezo n’ubushobozi bwo kwiyobora no kwihangira umurimo, ikabagira abahindura myumvire mu ishoramari hagamijwe impinduka yihuse iganisha ku iterambere mu bukungu bw’igihugu.

Abateguye iyi gahunda kandi bavuga ko uru rubyiruko ruzafasha guhindura imitekerereze y’abantu benshi bitume himakazwa umuco wo kwigirira icyizere no kwihangira imirimo.

Umuhuzabikorwa w’izi gahunda, Byukusenge Pierre Celestin avuga ko Space for Children yitezweho umusaruro ushimishije kuko ifasha abana gukundishwa umwuga hakiri kare kugira ngo bizabafashe gukora amahitamo neza birinda guhuzagurika. Ibi ngo bifungura amaso abana hakiri kare bagakura bumva akamaro ko kwiga imyuga n’ubumenyingiro.

Yagize ati ’’Ibi bizahindura imyumvire itariyo ya bamwe babonaga ko imyuga n’ubumenyingiro byigwa n’ababuze ahandi berekeza ari amaburakindi, aba bana bo bazakura bakunze imyuga n’ubumenyingiro kuko bazaba baramenye akamaro kabyo hakiri kare. ’’

Byukusenge avuga ko Make them Job Creators izafasha abanyeshuri nibamara kubyiga neza bazaba babona amahirwe abakikije bashoramo imari, bakazamenya gucunga neza umutungo, gupiganirwa amasoko, bityo ngo nyuma y’igihe runaka nibajya kwikorera imirimo yabo bazaba bafite ubumenyi buhagije ngo babikore neza.

Akomeza avuga ko abanyeshuri babona ubumenyi intambwe ku yindi kandi mu bikorwa, atari mu magambo gusa , kandi hatumirwa ba rwiyemezamirimo bigejeje ku bintu bifatika bakabaganiriza uburyo batangiye, aho batangiriye, ingorane bagize n’uburyo bagiye bazisohokamo, noneho umwana agatangira gufunguka hakiri kare.

Eliya Gasuhuke ufite umwana muri Space for Children avuga ko yiteze ko iyi gahunda izafasha umwana we gukunda umwuga hakiri kare, gukurana ubushobozi bwo gukora amahitamo aboneye no gukurana indangagaciro Nyarwanda.

Ati ’’ Ngomba gufasha umwana wanjye ngo inzozi afite zizabe impamo binyuze muri gahunda zitandukanye zirimo n’iyi. Imyuga berekwa bimufasha muri za ndoto ze hakiri kare noneho akagenda abona ibyo yiyumvamo akunze azakomeza nakura.’’

Mukankuranga Providence nawe afite abana bakurikiye gahunda ya Space for Children umwaka ushize, avuga ko yamwereye imbuto kuko asigaye aganiriza abana be bakamubwira ko bakunze imyuga n’ubumenyingiro ndetse bakanamubwira ibyo bumva bibonamo bashaka kuziga.

Ati ’’Cyera twarabatoranyirizaga, ariko ubu umwana arafunguka akabona ubushobozi bwo kwihitiramo. ’’

Uretse gukundishwa imyuga cyangwa kwigishwa kwihangira imirimo, abagenerwabikorwa muri gahunda ya Space for Children n’iya Make them Job Creators bigishwa akarasisi, indangagaciro na kirazira by’umuco nyarwanda, bakora ibindi bikorwa by’itorero, bahabwa ibiganiro bitandukanye bijyanye na gahunda za Leta, ndetse n’ibindi biteganywa muri izi gahunda.

Abana baganirizwa kuri gahunda bagiye gutangira
Abana baherekejwe n'ababyeyi babo barasobanurirwa imwe mu myuga yigishirizwa muri IPRC East
Abana basobanurirwa iby'imyuga mu Ishuri rikuru ryigisha imyuga n’ubumenyingiro mu Ntara y’Iburasirazuba (IPRC East)
Abanyeshuri muri gahunda ya Make them Job Creators baganirizwa ku kwihangira imirimo
Abana bigishwa imyuga itandukanye irimo no kubaza
Aba bana bahabwa n'amasomo ajyanye no gukoresha mudasobwa
Muri izi gahunda, abana bigishwa indangagaciro na kirazira z'umuco Nyarwanda

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE