Inzozi za Tabaro wakoze urugomero rw’amashanyarazi akagerageza n’indege

Yanditswe na Evariste Nsengimana
Kuya 19 Nzeri 2018 saa 09:07
Yasuwe :
0 0

Tabaro Anastase wamamajwe n’ubukorikori bwe bwo gukora urugomero rw’amashanyarazi n’indege, afite inzozi zo kuzifashisha moteri na batiri, bikabyara ingufu z’amashanyarazi mu buryo budasanzwe kandi buhendutse.

Iyo uvuye i Kigali werekeza Muhanga-Ngororero, biragoye ko wabwira umushoferi ko usigara kwa Tabaro ngo akubaze irindi jambo kuko yabaye ikimenya bose nk’umuravumba.

Nta kindi azwihwo cyane nk’ubukorikori, ariko ubwamugize ikirangirire ni urugomero rw’amashanyarazi yakoze akagerageza n’indege kandi yarize amashuri atandatu abanza gusa.

Afite imyaka 65, afite umugore we n’abana batandatu. Yavukiye mu Ntara ya Katanga muri Repubulika Iharanira Demokarasi ya Congo. Akiri muto ngo yakundaga gukubagana akora indege n’imodoka mu mikwege n’ibyuma aterateranyije.

Byansabye kuva i Kigali saa kumi n’imwe nerekeza mu Murenge wa Ngororero gusura aho Tabaro yari yarakoze urugomero.

Ndibuka ukuntu nahageze nyuma y’iminsi mbateguje, bakambwira ko aho urwo rugomero rwahoze ari mu kigunda, bakampa bote zo kwambara ngo inkweto zanjye zitandura.

Banjyanye ku nzu ya metero nk’eshatu kuri ebyiri Tabaro yari yarashyizemo imashini itunganya amashanyarazi mu mazi avuye ku rugomero yakoze, rwacaniraga abaturage.

Icyifuzo cya Tabaro kuva mu bwana cyo gukora amashanyarazi ntiyagihagaritse. Amaze gushyingirwa mu 1973 yakoze uburyo bwamufashaga gucana amatara mu rugo no gucuranga radiyo yifashishije batiri zizwi nk’amabuye.

Ati “Kuko nari nsanzwe ndi umunyabukorikori, naje kujya gushaka imbaraga zo mu mazi. Natekerezaga ko nshobora kubyazamo ikintu gishobora gusya cyangwa nkakora amashanyarazi, bikampa amafaranga.”

Ibyo byose yabikoze agendeye ku bumenyi yari afite n’ubushakashatsi yakoraga, avuga ko yashingiraga ku bitabo yasomaga byanditse mu gifaransa yari azi cyane, kuko yize muri Congo.

Urugomero rw’amashanyarazi yakoze bwa mbere rwamutwaye miliyoni hagati ya 2-3Frw, atanga umuriro wacanaga iwe ariko akanacagingira abantu akoresheje moteri ikaragwa n’umuvuduko w’amazi.

Vunabandi François wafashaga Tabaro gukora urugomero rwa Kabiri, yabwiye IGIHE ko yakoreshaga ibitembo yacuze mu madebe, biza gutanga umuriro muke. Ariko nyuma yagura urugomero akoresheje ingunguru, rutanga amashanyarazi akomeye, aba aya mbere muri Ngororero.

Ati “Niwe wazanye Televiziyo bwa mbere. Aha niho habanje gutera imbere ku muriro [...] Yacagingiraga abantu, agacanira urusengero. Byari bifitiye akamaro abaturage.”

Tabaro ibyo yabikoze nta hantu yabyize uretse ko nyuma yaje kumenyekana agahabwa amahugurwa na miliyoni zisaga 6Frw nk’igihembo cy’umuntu wihangiye umurimo agafasha n’abandi, byamufashije kwagura urugomero acanira urusengero n’abaturanyi 30. Hari mu 2003.

Umwe mu bacaniwe n’ayo mashanyarazi, Habamungu Jean Baptiste yagize ati “Ndi mu bawucanye mbere, hamwe n’urusengero. Icyo ntakoraga ni ugutera ipasi ariko abana barigaga, nanjye ngakoreraho ibindi nko gucomeka imashini.”

Mu myaka ibiri ishize, i Ngororero hagejejwe amashanyarazi y’Ikigo Gishinzwe Ingufu, REG, afite ingufu kurusha aya Tabaro, imashini ye yatangaga amashanyarazi ayiha abanyeshuri yigishije bo mu Ruhengeri bajya kuyicanisha iwabo hatabaga umuriro.

Tabaro yagerageje gukora indege

Mu 1980 uretse gukora imashini iboha, isya ikawa n’ibindi, Tabaro yagerageje gukora indege, bimuha kumenyekana.

Akiri umwana yakinaga akora indege z’ibikinisho anafite indoto zo kuyigurutsa, abikomeza ageze mu Rwanda.

Ati “Nagerageje ibintu umuntu yakwambara nk’amababa biranga ngira gute… ariko igihe kimwe naje kubona igisiga nka saa kumi imvura ishaka kugwa, kiri gutembera mu kirere kidakubita amababa nongera gutekereza kuguruka.”

Icyo gisiga cyatumye yibaza uko yakora ikintu kigenda mu kirere, adakoresheje moteri.

Ati “Byahise binyinjiramo, ndavuga nti kuva uyu munsi nzajya nkora amashusho atandukanye y’indege. Igihe cyose nzayikora nkayirekura ntigwe aho nyirekuriye, nzamenya ko yagiye.”

Ahagana saa cyenda mu 1983 nibwo iyo yakoze yabashije kugenda metero 15, bituma amatsiko ye yiyongera. Kari gato, akajugunya mu kirere kajyanwa n’umuyaga mu cyerekezo uganamo.

Ati “Naravuze nti kuko ari njye ushaka kuguruka kakaba kagiye konyine, reka nshake ibuye gashobora gutwara. Ndishyiramo noneho kagenda nka metero 40.”

Nabwo kwari ukukajugunya mu kirere, ariko byamweretse ko impamvu kagiye kure ari uko nta muyaga ugahuha kuko karemereye.

Yahise noneho akora indege nini, yajyagamo akabanza kwiruka yihambiriye n’imigozi kugira ngo ifate ikirere nta moteri akoresheje, ayikora mu 1986 ariko abantu bakamwita umusazi.

Umushinga we w’indege ngo wazimijwe na Jenoside yakorewe abatutsi.

Afite inzozi z’amashanyarazi adashingiye ku mazi

Tabaro yagize ati “Hari ubundi buryo nka bubiri nteganya. Ndi gushaka amafaranga nkabushyira mu bikorwa. Bushobotse umuntu yazajya ambwira ati ‘ndashaka amashanyarazi nubwo haba hatari amazi, nkayamugezaho.”

Ngo ni imashini izajya ihagurutswa na batiri igatanga umuriro, ukongera ugacaginga ya batiri. Ngo buzaba buhendutse ugereranije n’aturuka ku rugomero kandi butangiza ikirere.

Tabaro kuri ubu utunzwe no gukora ibikoresho byifashishwa mu gukora ingomero z’amashanyarazi, gukanika moteri n’ibindi, avuga ko nk’umushakashatsi, nubwo ataba umuherwe, kugera ku ntego ye ari intsinzi ikomeye mu buzima.


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza