Kwamamaza

Inzozi z’u Rwanda zo guhabwa ububiko bw’amadosiye ya ICTR zajemo kidobya

Yanditswe kuya 30-11-2016 saa 07:48' na IGIHE


U Rwanda ntirwahwemye gusaba akanama gashinzwe umutekano ku Isi guhabwa amadosiye y’Urukiko Mpuzamahanga Mpanabyaha (ICTR) agashyingurwa mu Rwanda, ariko Umuryango w’Abibumbye ntiwabyumva ufata icyemezo cyo kubaka ububiko bwayo i Arusha muri Tanzania.

Imwe mu mpamvu yo guseta ibirenge k’Umuryango w’Abibumbye mu gufata icyo cyemezo cyo gushyingura ayo madosiye mu Rwanda, havugwa impungenge z’umutekano w’abatanze ubuhamya mu ibanga muri urwo rukiko bashobora kuzatahurwa.

Umwaka ushize ubwo ICTR yafungaga imiryango, u Rwanda rwongeye gusaba ko ububiko bw’amadosiye yarwo bushyirwa i Kigali, iki cyifuzo cyajemo kidobya ubwo kuwa 25 Ugushyingo 2016 Umuryango w’Abibumbye wafunguraga inyubako ya miliyoni umunani z’amadolari i Arusha muri Tanzania, irimo igice kizabika ariya madosiye. Muri uwo muhango u Rwanda ntabwo rwari ruhagarariwe.

Ku rundi ruhande ariko nubwo iyo nyubako yafunguwe, u Rwanda ruvuga ko rutazahwema gukomeza gusaba ko ziriya nyandiko z’amadosiye ya ICTR zoherezwa i Kigali, kuko ari umutungo w’igihugu kandi ugomba kubyazwa umusaruro mu nyungu z’igihugu.

Umunyamabanga Nshingwabikorwa wa Komisiyo y’Igihugu ishinzwe kurwanya Jenoside, Dr. Jean Damascène Bizimana, yabwiye KT Press ko u Rwanda rutemera icyemezo cy’Umuryango w’Abibumbye cyo kurekera inyandiko za ICTR i Arusha.

Yagize ati “Nubwo umwanzuro wamaze gufatwa, turacyatekereza ko dufite uburenganzira bwo kuri izi nyandiko kugira ngo abakora ubushakashatsi kuri Jenoside babashe kuzibona zose ahantu hamwe.”

Akomeza avuga ko Umuryango w’Abibumbye utari ukwiye gushidikanya ku bushobozi bw’u Rwanda bwo kubika ziriya nyandiko, agahamya ko rufite ubushobozi bwo kuzibika neza kuruta ahantu hashyizweho i Arusha.

Ati “Mu ngengo y’imari ya 2016-2017 harimo miliyoni 400 z’amafaranga y’u Rwanda zizifashishwa mu kubika mu buryo bw’ikoranabuhanga amadosiye miliyoni 65 yaburanishijwe n’inkiko Gacaca, amashusho 8000 y’imanza zaciwe mu gihugu hose kuva 2002.”

Guhera mu mpera za 2015 inshingano za ICTR zakomeje gukorwa n’urundi rwego rwashyizweho rwitwa “Mechanism for International Criminal Tribunal (MICT)”.

Uwahoze ari umucamanza muri ICTR, akaba ayobora MICT, Theodore Meron, mu gufungura ku mugaragaro iyo nyubako; yavuze ko kubika izo nyandiko zizaba ikimenyetso ku butabera mpuzamahanga mpanabyaha, yaba mu karere no ku Isi yose.

Ati “Inyubako ifite ubushobozi bwo kutagirwaho ingaruka n’ubukonje kandi uburemere bwayo ntibuzahungabanywe n’ubw’inyandiko.”

Umwanzuro w’akanama ka Loni uvuga ko buriya bushyinguro ari uburyo bwo gukomeza gucunga izo dosiye zirimo ubuhamya n’ibimenyetso byatanzwe mu ibanga, ku buryo bitazajya bigerwamo na buri wese hatagombye kubanza kugaragaza uruhushya rwa Loni.

Ubwo bushyinguro bukubiyemo amapaji 900,000 y’inyandiko, amajwi n’amashusho byafashwe mu minsi 6,000 y’amaburanisha, ndetse n’ibyemezo by’agateganyo 10,000, hamwe n’ibyemezo ndakuka byafatiwe abo urwo rukiko rwaburanishije.

Harimo kandi izindi nyandiko zagaragajwe mu Rukiko, zikomoka mu bubiko bwo mu Rwanda, nko muri Minisiteri y’Ingabo, muri za Ambasade, mu bindi bigo nk’amabanki, n’andi makuru yaturutse mu bahamwe n’ibyaha, inzobere zikaba zarahamije ko byose ari iby’u Rwanda.

Inyubako irimo ububiko bw'amadosiye ya ICTR

Kwamamaza

Kwamamaza
IZINDI NKURU WASOMA
TANGA IGITEKEREZO

ANDIKA ICYO UTEKEREZA KURI IYI NKURU

AMATEGEKO AGENGA IYANDIKA RY'IGITEKEREZO CYAWE:
Witandukira kubijyanye n'iyi nkuru; wikwandika ibisebanya, ibyamamaza cyangwa bivangura; wikwandika ibiteye isoni,
Wifuza kubona byihuse ibivugwa/ibisubizo ku gitekerezo cyawe, andika email yawe ahabugenewe.
Igitekerezo cyawe kigaragara nyuma y'isuzuma rikorwa na IGIHE.com
Ibi bidakurikijwe igitekerezo cyanyu gishobora kutagaragara hano cyangwa kigasibwa, Murakoze!
ANDIKA ICYO UTEKEREZA KURI IYI NKURU
Kwamamaza
IBITEKEREZO
Join Us

Socialize with Us
Contacts

Marketing
4546
Editor
078 827 26 21
Management
0788 74 29 08 / 0788 49 69 15

Emails: [email protected], [email protected]

Website Developped by

Uru Rubuga Ruheruka Gushyirwaho Amakuru Monday 5 Ukuboza 2016
Copyright © 2009 -2014 - IGIHE Ltd - All Rights Reserved