Inyungu Perezida Kagame abona Abanyarwanda bazakura ku rurimi rw’Igiswahili

Yanditswe na Cyprien Niyomwungeri
Kuya 6 Werurwe 2017 saa 02:36
Yasuwe :
2 4

Mu gihe hashize iminsi Inteko Ishinga Amategeko yatoye ko ururimi rw’Igiswahili rujya mu ndimi zikoreshwa mu butegetsi mu Rwanda, Perezida Kagame nawe yerekanye ko Abanyarwanda bafite inyungu zikomeye mu gukoresha uru rurimi.

Kuri uyu wa Mbere Umukuru w’Igihugu atangiza i Kigali imirimo y’Inteko ishinga amategeko y’Umuryango wa Afurika y’Iburasirazuba, EALA, yagaragaje ko hari byinshi Abanyarwanda biteze mu Giswahili, by’umwihariko imikoranire n’ubuhahirane mu karere.

Yagize ati “Nishimiye kubamenyesha ko u Rwanda rwemeye Igiswahili nka rumwe mu ndimi zemewe mu butegetsi, nk’uko ari umwe mu myanzuro y’ingenzi y’Inteko ishinga amategeko y’Umuryango wa Afurika y’Iburasirazuba. Ibi birumvikana ko bizatuma Abanyarwanda bakorana bya hafi n’abavandimwe babo bo muri Afurika y’Iburasirazuba.”

Yavuze ko Abanyarwanda bazungukira byinshi mu Giswahili kivugwa n’abarenga miliyoni 140, by’umwihariko bakazabasha gukorana na bagenzi babo bo mu bihugu bya EAC bikoresha cyane uru rurimi.

Yongeyeho ko ubu hari Abanyarwanda benshi bakoresha uru rurimi, kandi isomo ryacyo ryatangiye no kwigishwa mu mashuri yo mu Rwanda.

Umukuru w’igihugu yavuze ko rumaze kungukira byinshi mu muryango bitigeze bibaho kandi ruzakomeza kuwushyigikira.

Yongeyeho ko ibihugu biwugize bikorana ngo biteze imbere ukwishyira hamwe, kandi byose biterwa n’ubushake bwa politiki bushingiye ku gusubiza ibyifuzo by’abaturage.

Yagize ati “Ubu abantu baratembera uko babyifuza kuruta uko byahozeho, kuvugana hagati y’abatuye ibihugu byacu byaroroshye. Guhahirana n’ubucuruzi nabyo byaroroshye kandi turakataje mu kongera ingufu z’amashanyarazi ndetse n’ibikorwaremezo.”

Igiswahili ni ururimi rukoreshwa cyane mu miririmo y’ubucuruzi mu bihugu bihuriye mu muri EAC no mu bindi bihugu.

Perezida wa EALA, Daniel Kidega, yashimiye u Rwanda kuba rwaremeje Igiswahili nk’uruimi rw’ubutegetsi, avuga ko ari urugero rwiza rukomeje gutanga mu guharanira ukwishyira hamwe kw’ibihugu, yaba mu buhahirane, ubucuruzi n’ibindi.

U Rwanda rumaze imyaka 10 rwinjiye muri EAC. Ingingo ya 137 y’Amasezerano ashyiraho uyu muryango yashyiriweho umukono Arusha muri Tanzaniya kuwa 30 Ugushyingo 1999 nk’uko yavuguruye kugeza ubu, ivuga ko ibihugu biwugize bisabwa guteza imbere ururimi rw’Igiswahili nk’ururimi bihuriyeho.

Guhera muri Mutarama uyu mwaka hatangiye gutangwa pasiporo mu buryo bw’ikoranabuhanga izakoreshwa muri EAC, bikaba ari ngombwa ko Igiswahili cyemezwa n’ibihugu byose kuko iyo pasiporo izakoreshwaho indimi harimo n’urw’Igiswahili.


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza