Kwamamaza

Inyubako itagira uko isa ya Kigali Heights igiye gufungura imiryango(Amafoto)

Yanditswe kuya 21-11-2016 saa 10:11' na Rabbi Malo Umucunguzi


Kuva ku munara w’i Babeli uvugwa mu mateka kugeza ku muturirwa wa Burj Khalifa wubatse mu Burasirazuba bwo hagati, abantu bakomeza kuvumbura uburyo bugezweho bw’imyubakire, ndetse kuri ubu ni ishoramari rihambaye riri gushyirwamo amamiliyari.

U Rwanda rukomeza kuvugwa imyato mu mutekano ndetse n’igihugu kigahabwa amanota ubutitsa mu korohereza abashaka gukora ubucuruzi, bigatuma ishoramari ryisukiranya ari nako inyubako zihebuje zirazamurwa. Iziheruka kuba ibirango by’Umurwa Mukuru w’u Rwanda ni Kigali City Tower yaje gukorerwa mu ngata na Grand Pension Plaza na M Peace Plaza, nazo ziza guha rugari Kigali Covention Center.

Urutonde rw’inzu zigezweho mu minsi mike ruriyongeraho Kigali Heights, igiye gufungurwa ku mugaragaro kuwa 5 Ukuboza 2016, nubwo ibigo bimwe byatangiye gukoreramo.

Kigali Heights izuzura itwaye miliyari 30 Frw, iherereye ku Kimihurura mu Mujyi wa Kigali, iruhande rwa ‘Rond Point’ y’ahazwi nka KBC, aho iteganye neza na Kigali Convention Center yahogoje amahanga.

Uhereye ku buryo yubatse, abakurikirana iby’imyubakire bavuga ko ushobora guterura Kigali Heights ukayitereka rwagati mu Mujyi wa Londres mu Bwongereza, ikagumana ubushongore n’ubukaka bwayo mu nyubako zibereye ubucuruzi bugezweho.

Kigali Heights ni inzu iteye amabengeza

Ibyo bihuza neza n’uko Dennis Karera uyobora Ikigo Kigali Heights Devevelopmend Ltd cyubatse iyi nzu, ashimangira ko yakozweho n’ abubatsi bari mu ba mbere ku Isi, bagendeye ijana ku ijana kuri bipimo by’Abongereza (British standards), ndetse yashushanyijwe n’ikigo Vavaki Architects nacyo cyo mu Bwongereza, byose biyiha ubudahangarwa mu gukomera.

Uyirebeye hanze, ni inyubako itagira uko isa waba witegereza uko ibererekera ‘rond point’ byegeranye, ikagira igice cyo hasi cyagenewe ubucuruzi busanzwe, n’igice cyo hejuru cyagenewe ibiro kugeza hejuru mu nyubako ya munani.

Nta wabura kuvuga ko Kigali Heights ibimburiye izindi nyubako zidasanzwe zizaba zikikije Kigali Convention Center, zitatse amarembo y’Umujyi wa Kigali uturutse ku Kibuga Cy’Indege Mpuzamahanga cya Kigali, nk’uko bigaragara mu gishushanyo mbonera cy’umujyi.

Iyi nzu yatangiye kubakwa mu 2014 iri gukurura abacuruzi bakomeye harimo amaduka, amabanki, farumasi n’ibindi, aho mu biteguye gukoreramo harimo Javas House cafe, Mr. Price, Bosini, Simba Supermarket, Woolworths yo muri Afurika y’ Epfo icuruza ibiribwa, Deacons icuruza imyambaro, Fusion Capital, Vine pharmacy n’ ibindi.

Agaciro kayo kuva hasi kugeza hejuru, abashoramari bakamenye mbere, bigashimangirwa n’uko mu bice byayo bigenewe ubucuruzi mpuzamahanga, igice bwagenewe cyamaze kubona abazahakorera hejuru ya 90%, inzu zo hejuru zagenewe ibiro nazo igice kinini cyarafashwe.

Iyo uva hasi ugana hejuru, hari igice kimwe cy’igisenge ku nzu ya gatandatu cyagenewe ubusitani, hiswe ‘Panorama Roof Garden’, umwanya uhagije ubereye kuhahurira n’abakiliya cyangwa ibiganiro byihariye, witegeye Kigali Convention Center unitegereza ubudasa bwa Kigali.

Yubatse ku butaka bwa 12 750 m2, ikagira ibiro bishobora kwakira abantu 1500. Inyubako yose ingana na metero kare 2400, ikagira ubushobozi bwo kwakira imodoka 150 imbere mu nzu n’ izindi 150 hanze.

Kigali Heights kandi ni inyubako itanga icyizere ku bakiliya bayo ko nta mpungenge z’ibura ry’amashanyarazi, kuko yateguriwe moteri zifite ubushobozi bwo gutanga amashanyarazi mu nyubako imbere wongeyeho igice cy’Umurenge yubatsemo.

Iyi nyubako kandi irasanga izindi ziheruka kuzura zitatse umujyi wa Kigali, zirimo nka CHIC Complex, inzu y’ubucuruzi iri ahazwi nka Down Town n’izindi ziri kuzamurwa mu nkengero zaho, tudasize ishoramari ritabarika riri gushyirwa mu myubakire hirya nohino mu gihugu.

Kigali Heights izuzura itwaye miliyari 30 Frw
Izakorerwamo ubucuruzi mu gice cyo hasi, hejuru hajyemo ibiro
Abahanga bayubatse bagendeye ku bipimo byemewe mu Bwongereza
Iyi nyubako iri ku butaka bwa m2 12 750
Amaduka akomeye yamaze gufatamo ibyicaro
Iteganye na Kigali Convention Center nayo iherutse gutahwa

Amafoto: Mahoro Luqman


Kwamamaza

Kwamamaza
IZINDI NKURU WASOMA
TANGA IGITEKEREZO

ANDIKA ICYO UTEKEREZA KURI IYI NKURU

AMATEGEKO AGENGA IYANDIKA RY'IGITEKEREZO CYAWE:
Witandukira kubijyanye n'iyi nkuru; wikwandika ibisebanya, ibyamamaza cyangwa bivangura; wikwandika ibiteye isoni,
Wifuza kubona byihuse ibivugwa/ibisubizo ku gitekerezo cyawe, andika email yawe ahabugenewe.
Igitekerezo cyawe kigaragara nyuma y'isuzuma rikorwa na IGIHE.com
Ibi bidakurikijwe igitekerezo cyanyu gishobora kutagaragara hano cyangwa kigasibwa, Murakoze!
ANDIKA ICYO UTEKEREZA KURI IYI NKURU
Kwamamaza
IBITEKEREZO
Join Us

Socialize with Us
Contacts

Marketing
4546
Editor
078 827 26 21
Management
0788 74 29 08 / 0788 49 69 15

Emails: [email protected], [email protected]

Website Developped by

Uru Rubuga Ruheruka Gushyirwaho Amakuru Sunday 4 Ukuboza 2016
Copyright © 2009 -2014 - IGIHE Ltd - All Rights Reserved