Inyandiko za Gacaca zisaga miliyoni 10 zimaze kubikwa mu buryo bw’ikoranabuhanga

Yanditswe na Jean Pierre Tuyisenge
Kuya 11 Mutarama 2017 saa 01:52
45 31

Komisiyo y’Igihugu yo kurwanya Jenoside, CNLG yavuze ko gahunda yo gushyingura amadosiye y’imanza za Gacaca mu buryo bw’ikoranabuhanga igeze kure ndetse ko izihari zose bizagera mu 2018 zararangiye.

Izi mpapuro zirimo amadosiye y’ababuranishijwe n’Inkiko Gacaca, uko zagenze n’ubuhamya bwabatanzweho.

Ubwo CNLG yari imbere ya Komisiyo ya Politiki n’imibereho myiza mu Nteko Ishinga Amategeko, bungurana ibitekerezo ku bikorwa byayo by’umwaka wa 2015-2016 na 2016-207, Umunyamabanga Nshingwabikorwa wa CNLG Dr Jean Damascène Bizimana yavuze ko kugeza ubu impapuro zisaga miliyoni 10 n’ibihumbi 400 zamaze kubikwa.

Yavuze ko imbogamizi zari zihari zabuzaga kubyihutisha zakuweho, zikaba zari zirimo ingengo y’imari idahagije, kutabona ibikoresho bihagije no kuba inzu ya Polisi iherereye ku Kacyiru mu Mujyi wa Kigali izibitse itari imeze neza.

Yagize ati “ Twari dufite imbogamizi zo kuba Minisiteri y’imari n’igenamigambi yari yaduhaye miliyoni 400 gusa, ubu batwongeye izindi 420, ndetse nta n’imashini zabugenewe twari dufite ariko ubu byose turabifite tukemeza ko bitarenze mu 2018 bizaba byarangiye.”

Yasobanuye ko uyu mwaka wa 2017 uzarangira impapuro zisaga miliyoni 27 zaramaze kubikwa mu buryo bw’ikorabuhanga hakazaba hasigaye izigera kuri miliyoni 35 nazo biteganyijwe ko zizarangira mu 2018.

Kugeza uyu munsi ngo inyandiko zo mu turere tugera ku 10 zamaze kubikwa mu gihe mu dusigaye na two, akarere ka Burera n’aka Nyagatare bizihuta kuko ngo tudafite dosiye nyinshi, ugereranyije n’Uturere two mu Ntara y’Amejyepfo.

Nyuma yo gutanga ibisobanuro, Komisiyo ya Politiki n’imibereho myiza yanenze ko bitashyizwe muri raporo CNLG yashyikirije iyo komisiyo.

Senateri Tito Rutaremara umwe mu bagize iyo Komisiyo yagize ati “ Ibisobanuro utanze nibyo, ariko se kuki utabyanditse muri iyi raporo mwaduhaye, ubu twakabaye twabahamagaje hano?”

Senateri Mukasine Marie Clairena we yabasabye ko ubutaha bakwiye kujya babishyira mu nyandiko. Ati “ Ni byiza, ariko muzajye mubishyira mu nyandiko mutwoherereza tubone ibisobanuro bihagije nk’ibyo muduhaye.”

Nyuma y’uko Inkiko Gacaca zisoje imirimo yazo mu 2012, Komisiyo y’Igihugu yo Kurwanya Jenoside (CNLG) yahawe inshingano zo kubika neza inyandiko z’izo nkiko, ivuga ko mu 2019 umuntu wese azaba abasha gusura urubuga rwa internet zizaba zarashyizweho akabasha kuzibona igihe icyo ari cyo cyose.

Impapuro zose zigomba kubikwa mu buryo bw’ikoranabuhanga zigera kuri miliyoni 60.


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE