Kwamamaza

Intumwa zo muri Centrafrique zaje kwigira ku Rwanda iby’ubumwe n’ubwiyunge

Yanditswe kuya 4-11-2016 saa 07:01' na Nsengimana Evariste


Itsinda ry’abayobozi 10 bo muri Repubulika ya Centrafrique riri mu Rwanda mu ruzinduko rw’iminsi irindwi, aho aho rizasura ibigo bitandukanye zisobanurirwa intambwe u Rwanda rumaze gutera mu bumwe n’ubwiyunge nyuma ya Jenoside yakorewe Abatutsi mu 1994.

Iri tsinda ryageze mu Rwanda kuri uyu wa Mbere, ku munsi ukurikiyeho tariki 1 Ugushyingo 2016, ryahuye ndetse rinaganira n’abayobozi muri Komisiyo y’Igihugu y’Ubumwe n’Ubwiyunge n’abo muri Minisiteri y’Ubutabera.

Uru ruzinduko ruzafasha iki gihugu mu kwimakaza inzira y’ubumwe n’ubwiyunge nk’igihugu kirangwamo amakimbirane kuva mu mwaka wa 2012.

Minisitiri ushinzwe imibereho myiza y’abaturage n’ubwiyunge muri Centrafrique, Virginie Baikoua, yavuze ko bashaka kwiga no kurahura ubumenyi ku bijyanye na gahunda za Leta y’u Rwanda zigamije gushimangira ubumwe n’ubwiyunge.

Baikoua uyoboye iri tsinda, yasobanuriye The New Times ko igihugu cyabo gishaka gushyiraho Komisiyo ishingiye ku kuri, ubutabera n’ubwiyunge akaba ariyo mpamvu bahisemo kugisha inama no kwigira ku bihugu nk’u Rwanda byanyuze mu bihe bikomeye.

Yagize ati “ Dushobora kwigira byinshi ku Rwanda bijyanye n’uburyo igihugu cyabashije kwikura mu icuraburindi rya Jenoside n’uko rwabashije kugeza ubumwe n’ubwiyunge mu baturage.”

Umunyamabanga Nshingwabikorwa wa Komisiyo y’Ubumwe n’Ubwiyunge, Fidèle Ndayisaba, yasobanuriye iri tsinda amateka y’u Rwanda ya mbere na nyuma ya Jenoside yakorewe Abatutsi muri Mata 1994 abereka n’uburyo igihugu cyakoresheje mu kugera ku bumwe n’ubwiyunge.

Yavuze ko ubushake bw’abanyarwanda bwo kwimakaza ubumwe n’ubwiyunge bwatumye ibindi bihugu byifuza kuza kwigira ku Rwanda uburyo bw’imiyoborere rwakoresheje.

Ati “Mu by’ukuri abanyarwanda babaye urugero rwiza ku bihugu byinshi byugarijwe n’intambara. Ubushake bwabo bwo gusiga inyuma ibyo twanyuzemo nk’igihugu n’abagituye duhitamo gukomeza tugana ku iterambere, byatumye u Rwanda ruba intangarugero kuri benshi."

Komisiyo y’Ubumwe n’Ubwiyunge mu Rwanda yashyizeho gahunda nyinshi zinyuranye zigamije kubanisha neza abanyarwanda, zirimo izigamije kubaka amahoro no kurwanya amakimbirane n’izindi.

Fidèle Ndayisaba (hagati) yasobanuriye aba bayobozi uburyo u Rwanda rwakoresheje rwimakaza ubumwe n'ubwiyunge nyuma ya Jenoside

Kwamamaza

Kwamamaza
IZINDI NKURU WASOMA
TANGA IGITEKEREZO

ANDIKA ICYO UTEKEREZA KURI IYI NKURU

AMATEGEKO AGENGA IYANDIKA RY'IGITEKEREZO CYAWE:
Witandukira kubijyanye n'iyi nkuru; wikwandika ibisebanya, ibyamamaza cyangwa bivangura; wikwandika ibiteye isoni,
Wifuza kubona byihuse ibivugwa/ibisubizo ku gitekerezo cyawe, andika email yawe ahabugenewe.
Igitekerezo cyawe kigaragara nyuma y'isuzuma rikorwa na IGIHE.com
Ibi bidakurikijwe igitekerezo cyanyu gishobora kutagaragara hano cyangwa kigasibwa, Murakoze!
ANDIKA ICYO UTEKEREZA KURI IYI NKURU
Kwamamaza
IBITEKEREZO
Join Us

Socialize with Us
Contacts

Marketing
4546
Editor
078 827 26 21
Management
0788 74 29 08 / 0788 49 69 15

Emails: [email protected], [email protected]

Website Developped by

Uru Rubuga Ruheruka Gushyirwaho Amakuru Thursday 8 Ukuboza 2016
Copyright © 2009 -2014 - IGIHE Ltd - All Rights Reserved