Inteko Ishinga Amategeko yasabye ubusesenguzi bwimbitse ku cyadindije imanza za Gacaca ibihumbi 52

Yanditswe na Evariste Nsengimana
Kuya 12 Ugushyingo 2019 saa 09:25
Yasuwe :
0 0

Inteko Ishinga Amategeko y’u Rwanda yasabye Komisiyo y’Igihugu yo kurwanya Jenoside (CNLG) gukora ubusesenguzi bwimbitse ikareba impamvu zatumye kugeza uyu munsi imanza zisaga ibihumbi 52 zaciwe n’Inkiko Gacaca zitararangizwa.

Mu 2002 nibwo Inkiko Gacaca, zashyizweho ngo zice kandi zihutishe imanza z’abashinjwaga kugira uruhare muri Jenoside yakorewe Abatutsi aho zaciye izisaga miliyoni ebyiri mu gihe iyo biza gukorwa n’inkiko zisanzwe byari gutwara imyaka isaga 110.

Nubwo zatanze uwo musaruro ariko Visi Perezida wa CNLG, Mutakwasuku Yvonne, yabwiye Inteko Ishinga Amategeko kuri uyu wa 12 Ugushyingo 2019 ko hakiri imbogamizi z’imanza za Gacaca zaciwe ariko zitararangizwa.

Yagize ati “Mu bibazo bijyanye no kurangiza imanza z’imitungo zaciwe n’Inkiko Gacaca, imibare ihari ni imanza 52 226 zigomba kurangizwa.”

Ni ikibazo abagize Inteko Ishinga Amategeko imitwe yombi bavuze ko giteye inkeke mu gihe hashize imyaka isaga 25 bamwe mu biciwe bakanasahurirwa imitungo batarahabwa ubutabera nk’uko bikwiye.

Depite Bigumisa yavuze ko CNLG ivuga ngo izo manza zirimo kurangizwa bidahagije bitewe n’uko itagaragaza imizi y’icyo kibazo neza n’ingamba zihamye.

Ati “Ahubwo wakwibaza kuki zitarangijwe harimo ikihe kibazo? Ndabonamo nka bibiri birashoboka ko abahesha b’inkiko batari ab’umwuga cyangwa abigenga byarabananiye. Batubwire neza icyizere twagira ko zigiye kurangizwa.”

Depite Mukayijori Suzanne yavuze ko CNLG ikwiye gukora ubuvugizi iki kibazo kikarangira.

Ati “Ko CNLG ifite mu nshingano ubuvugizi barateganya gukora iki kuri ubwo buvugizi, kuba umuntu yicaye abona uwamwangirije imitungo yakabaye yaramaze kwishyurwa.”

Depite Mukayijori yavuze ko abangije imitungo muri Jenoside yakorewe Abatutsi babuze ubwishyu, bafite imbaraga bashobora guhingira abo bangirije ariko ikibazo kigakemuka.

Ati “Bamwe bangije imitungo badafite ubwishyu, niba bafite amaboko yo kuba bakora kuki batanagenda ngo bahe umubyizi uwo bangirije? Birazwi kuva na kera ko umuntu ashobora kugenda agahingira mugenzi we, akagira imibyizi yanamufasha kwitunga no gutunga urugo rwe.”

Mu manza zisaga miliyoni n’ibihumbi 900 zaburanishijwe n’Inkiko Gacaca, izisaga miliyoni imwe n’ibihumbi 200 zari izirebana n’imitungo yangijwe mu gihe cya Jenoside yakorewe Abatutsi mu Rwanda.

Mutakwasuku yavuze ko inama bagiriwe n’Inteko Ishinga Amategeko ari ingenzi kandi ko bagiye kuzisesengura bakazishyira mu bikorwa.

Yavuze ko izo manza zitarangizwa byatewe n’impamvu nyinshi ariko “Kimwe twakwishimira ni uko Minisiteri y’Ubutegetsi bw’Igihugu ifatanyije n’iy’Ubutabera batangije icyumweru cyo kurangiza imanza, byinshi birimo gukemurwa.”

Umunyamabanga Nshingwabikorwa wa CNLG, Dr Bizimana Jean Damascène, yavuze ko “Minisiteri bireba na CNLG ni ikibazo dufatanyije mu buryo bukomeye, izi manza inzego z’ibanze zahawe itariki ntarengwa ya 21 Ugushyingo yo kuba zarangije imanza zose zidafite ikibazo.”

Nyuma y’iyo tariki nibwo inzego bireba zizongera kwicara zigashaka umuti w’ibibazo bizaba byagaragaye.

Inteko Ishinga Amategeko yasabye ubusesenguzi bwimbitse ku cyadindije imanza za Gacaca ibihumbi 52
Visi Perezida wa CNLG, Mutakwasuku Yvonne n'Umunyamabanga Nshingwabikorwa wayo, Dr Bizimana Jean Damascène, bari guha Inteko ibisobanuro

[email protected]


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza