Kwamamaza

Intara z’Uburasirazuba n’Amajyepfo ziteganyijwemo imvura nke

Yanditswe kuya 8-09-2016 saa 15:21' na Ezechiel Mbananabo


Ikigo cy’Igihugu cy’Ubumenyi bw’Ikirere (Meteo Rwanda)cyagaragaje iteganyagihe ry’umuhindo (kuva muri Nzeri kugeza mu Ukuboza 2016) aho mu turere tw’Intara z’Uburasirazuba n’Amajyepfo hateganyijwemo imvura nke ugereranyije n’iyaguye umwaka ushize mu gihe nk’iki.

Mu turere tugize Intara y’Uburasirazuba n’iy’Amajyepfo, hateganyijwe imvura iri ku gipimo cyo hasi ugereranyije n’isanzwe igwa mu bihe by’umuhindo, mu gihe mu turere tugize Intara y’Amajyaruguru n’iy’Uburengerazuba ho imvura izagwa nk’uko bisanzwe.

Imvura isanzwe igwa mu bihe byiza (iyo nta mpinduka zibayeho) mu gihugu muri rusange iba iri hagati ya milimetero 350 na 450 y’igiteranyo cy’imvura y’umuhindo, mu gihe imvura iri hasi y’isanzwe igwa mu gihugu muri rusange iba iri hasi ya milimetero 350.

Mu kiganiro n’abanyamakuru kuri uyu wa Kane tariki 8 Nzeri 2016, Ikigo cy’Igihugu cy’Ubumenyi bw’Ikirere cyagaragaje ko hari uturere tuzagira imvura nke bitewe n’imiterere yatwo turimo Ngoma, Gatsibo, Bugesera, Kirehe, Rwamagana, Kayonza na Nyagatare mu Ntara y’Uburasirazuba, Nyarugenge, Kicukiro na Gasabo mu Mujyi wa Kigali, ndetse no muri Kamonyi , Muhanga, Ruhango, Huye, Gisagara na Nyanza mu Ntara y’Amajyepfo.

Umuyobozi Mukuru w’iki kigo, John Ntaganda Semafara, yasobanuye ko ibipimo babitanze bashingiye ku bintu bitandukanye birimo ibipimo by’imvura n’ubushyuhe byo kuri sitasiyo zo mu gihugu mu gihe cy’imyaka 45 ishize, iby’ubushyuhe bw’amazi y’inyanja ya Pasifika, iy’Ubuhinde n’iy’Atalantika n’ibindi bipimo bituruka ku runyurane rw’imiyaga ifatika mu Karere ka Afurika yo hagati n’ iy’Uburasirazuba.

Mu gihe usanga hari amakuru y’iteganyagihe atangwa ariko nyuma ibyavuzwe bigahinduka, uyu muyobozi yagize ati “Ntabwo byoroshye kuvuga ngo bizagenda gutya ijana ku ijana kuko hashobora kubaho impinduka, twe dutanga ikigereranyo rusange. Tuzakomeza gutanga icyegeranyo cya buri kwezi, iteganyagihe rya buri munsi, buri masaha atandatu, iry’iminsi itatu, iry’iminsi itanu, ndetse n’iry’iminsi icumi ku bahinzi ku buryo nta watungurwa.”

Twahirwa Antony, Umuyobozi ushinzwe Iteganyagihe ry’igihe kigufi n’ikirekire n’uko rishyirwa mu bikorwa muri iki kigo, yasobanuye ko igabanuka ry’ubushyuhe bwo mu nyanja ngari ya Pasifika rigenda rigaragara ndetse n’uburyo imiyaga ihuha yagera mu Burasirazuba igasanga nta misozi n’amashyamba bihari nko mu Mujyaruguru ku buryo yabasha kubyara imvura, ngo ni bimwe mu mpamvu zizatuma uturere tugize Intara y’Uburasirazuba tugusha imvura iri hasi.

Ikigo cy’Igihugu cy’Ubumenyi bw’Ikirere cyasabye abahinzi kwitwararika, ndetse n’abantu bose muri rusange gukurikiranira hafi amakuru y’iteganyagihe ya buri munsi gitanga.

Ibi bije bisa n’aho ari inkuru y’incamugongo ku baturage batuye ibi bice cyane abo mu Ntara y’Uburasirazuba, n’ubundi bakunze gutaka ikibazo cy’uko no mu mwaka ushize muri aya mezi batabonye imvura byatumye imyaka bari barashyize mu butaka yumiramo indi ikuma itarenze umutaru.

John Ntaganda Semafara uyobora Meteo Rwanda
Twahirwa Anthony ushinzwe iteganyagihe ry'igihe kigufi n'ikirekire
Abari bitabiriye ikiganiro n'abanyamakuru

Kwamamaza
IZINDI NKURU WASOMA
TANGA IGITEKEREZO

ANDIKA ICYO UTEKEREZA KURI IYI NKURU

AMATEGEKO AGENGA IYANDIKA RY'IGITEKEREZO CYAWE:
Witandukira kubijyanye n'iyi nkuru; wikwandika ibisebanya, ibyamamaza cyangwa bivangura; wikwandika ibiteye isoni,
Wifuza kubona byihuse ibivugwa/ibisubizo ku gitekerezo cyawe, andika email yawe ahabugenewe.
Igitekerezo cyawe kigaragara nyuma y'isuzuma rikorwa na IGIHE.com
Ibi bidakurikijwe igitekerezo cyanyu gishobora kutagaragara hano cyangwa kigasibwa, Murakoze!
ANDIKA ICYO UTEKEREZA KURI IYI NKURU
Kwamamaza
IBITEKEREZO
Join Us

Socialize with Us
Contacts

Marketing
4546
Editor
078 827 26 21
Management
0788 74 29 08 / 0788 49 69 15

Emails: [email protected], [email protected]

Website Developped by

Uru Rubuga Ruheruka Gushyirwaho Amakuru Saturday 1 Ukwakira 2016
Copyright © 2009 -2014 - IGIHE Ltd - All Rights Reserved