Intara y’Amajyepfo yongeye kugaragazwa ko ari yo ifite abana benshi b’inzererezi

Yanditswe na Prudence Kwizera
Kuya 19 Kamena 2018 saa 08:57
Yasuwe :
0 0

Ikigo cy’Igihugu gishinzwe Igororamuco, National Rehabilitation Service (NRS), gitangaza ko mu mibare gifite y’abana bazerera hirya no hino mu gihugu, abenshi ari abaturuka mu Ntara y’Amajyepfo.

Umuyobozi Mukuru wa NRS, Bosenibamwe Aimé, yabigaragaraje ku wa 15 Kamena 2018 ubwo yari mu Karere ka Huye mu nama nyunguranabitekerezo igamije gusuzuma iterambere ry’Intara y’Amajyepfo.

Bosenibamwe yavuze ko hirya no hino mu gihugu hakiri abana bazerera mu muhanda ariko hari benshi bashyizwe mu Bigo Ngororamuco. Yagaragaje ko abenshi muri bo baturuka mu turere dutandukanye two mu Ntara y’Amajyepfo.

Yagize ati “Intara y’Amajyepfo kugeza ubu niyo ifite abana benshi bazerera, n’imibare dufite mu bijyanye n’ubuzererezi mu bihumbi 15 bimaze kugororwa muri bo ibihumbi 4 500 ni abo mu Majyepfo”.

Bosenibamwe yakomeje atanga ingero agendeye ku mibare bafite y’abana bari mu Bigo Ngororamuco hirya no hino mu gihugu.

Ati “Wajya Gikondo mu bana bazerera bariyo ugasanga nibura nk’igihumbi ni abana baturuka mu Majyepfo; wajya kubera Iwawa nk’ubu ibihumbi bine by’abana bariyo Intara y’Amajyepfo ifitemo imibare iri hejuru cyane”.

Amakimbirane yo mu miryango ni yo nyirabayazana

Bamwe mu bana bo mu Ntara y’Amajyepfo bazerera bavuga ko kuza kuba mu muhanda batunzwe no gusabiriza umuhisi n’umugenzi babiterwa no guhunga amakimbirane ari mu miryango yabo ndetse n’ikibazo cy’ubupfubyi.

Abaherutse kuganira na IGIHE mu masaha y’umugoroba bazerera mu Karere ka Huye bagaragaje ko nabo batishimiye kuba mu muhanda.

Mugabo Fabrice, uri mu kigero cy’imyaka 13 yavuze ko yaturutse mu Karere ka Muhanga, akajya kuba inzerezi mu Mujyi wa Huye, bitewe no kubura ababyeyi, akabura n’undi wamurera.

Bizimana Olivier w’imyaka 14 y’amavuko, we yavuze ko yaturutse mu Murenge wa Ndora mu Karere ka Gisagara, akaba yaraje kuzerera mu Mujyi wa Huye kubera mukase wamutotezaga.

Hari abataka ko babiterwa n’inzara

Ndamutsayezu Jean Paul, we yatangaje ko yaturutse mu Murenge wa Kigoma mu Karere ka Huye, akaba yarabaye inzerezi kubera ko yavaga ku ishuri akabura ibyo kurya.

Ati “Mama yari arwariye mu Ruhengeri, noneho nava ku ishuri nkabura ibyo kurya, ubwo ndagenda ngiye kumureba mu Ruhengeri, ngeze i Muhanga mbona ntazagerayo, mpitamo kugaruka. Ubu ndasaba nabona ibyo kurya ubundi nkiryamira mu iteme”.

Abana bazerera bafite ibyifuzo byo kuva mu muhanda bakajya kwiga kuko na bo batishimiye ubuzima babayemo.

Minisitiri w’Ubutegetsi bw’Igihugu, Francis Kaboneka, yasabye abayobozi ku nzego zitandukanye zo mu Ntara y’Amajyepfo gushaka umuti w’ikibazo cy’abana bazerera kikarangira burundu.

Ati “Bayobozi muri aha mwishimiye ko Intara y’Amajyepfo ari yo igira abana bazerera benshi? Birabashimisha ku buryo mwumva ntacyo bibabwiye? Ubu mushyize hamwe byabananira ko hari n’ibikomeye biruta ibi byakozwe kuki ibi tutabukora?”.

Mu myaka ibiri ishize Intara y’Amajyepfo yari yatunzwe agatoki

Muri Mata 2016, ubwo yaganiraga n’abayobozi bo mu Ntara y’Amajyepfo, Minisitiri w’Ubutegetsi bw’Igihugu, Francis Kaboneka, yabasabye kurangiza ikibazo cy’abana bazerera.

Icyo gihe yagize ati “Mu ibarura duherutse gukora, ariko byanagaragaye no mu yandi mabarura yakozwe, abana b’inzererezi tubona cyane ni abaturuka muri iyi ntara […] no mu Mujyi wa Kigali abazamo benshi ni abaturuka hano mu majyepfo, mu bana basaga 300, abarenga 250 ni abaturuka muri iyi ntara”.

Minisitiri Kaboneka kandi yavuze ko usibye abana bava mu miryango yabo bakajya mu muhanda, hari n’abandi bakoreshwa imirimo hirya no hino mu ngo, asaba ko kirangizwa mu maguru mashya.

Ati “Abana bakoreshwa imirimo itandukanye hirya no hino, hose aho bakorera ni aho tuyobora kandi muba muhazi, turabasaba ko iki kibazo mugifata nk’ikibazo gikomeye kigahagarara”.

Minisitiri Kaboneka yasabye ko ababyeyi babo bana bazerera bashakishwa bagafasha ubuyobozi kubagarura mu rugo, byaba ngombwa hagafatwa n’izindi ngamba.

Minisitiri w'Ubutegetsi bw'Igihugu, Francis Kaboneka, yasabye ko haba ubufatanye mu gushaka umuti w'ikibazo cy'abana bazerera
Ikigo cy’Igihugu gishinzwe Igororamuco,Bosenibamwe Aimé, yatangaje ko Intara y'Amajyepfo ari imwe mu zifite abana benshi b'inzererezi
Umwe mu bana bazerera asohoka aho arara munsi y'iteme mu Mujyi wa Huye

[email protected]


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza