Intagamburuzwa zigiye gutakambira Leta kongerera abanyeshuri buruse

Yanditswe na Evariste Nsengimana
Kuya 19 Ugushyingo 2017 saa 08:35
Yasuwe :
0 0

Umuhuzabikorwa w’ Intore z’abanyeshuri bahagarariye abandi muri za kaminuza n’amashuri makuru mu Rwanda, Intagamburuzwa, Ndayisaba Eustache, yavuze ko hari ubukangurambaga bagiye gutangiza ku nzego za Leta zifite aho zihuriye n’uburezi kugira ngo amafaranga ahabwa abanyeshuri yo kubatunga azwi nka ‘buruse’ n’ay’ubushakashatsi yongerwe.

Hashize igihe kirekire humvikana amajwi y’abanyeshuri basaba ko hongerwa buruse ingana n’ibihumbi 25 Frw bahabwa ku kwezi adahagije bitewe n’izamuka ry’ibiciro by’iribwa n’ubuzima bugenda burushaho guhenda. Byongeye, haniyongeyeho gukurirwaho amafaranga yagenerwaga gufasha abakora ubushakashatsi n’abimenyereza umwuga.

Kuri uyu wa Gatanu, mu nama rusange ya mbere abanyeshuri bahagarariye abandi muri kaminuza n’amashuri makuru bongeye kugaragaza ko umunyeshuri atakwiga ngo atsinde mu gihe ashonje kandi ko bigira ingaruka ku ireme ry’uburezi.

Uhagarariye abanyeshuri muri Tumba College of Technology, yagize ati “Ireme ry’uburezi ntirishora kugerwaho mu gihe igifu cy’umunyeshuri kirimo ubusa, mu gihe atoroherezwa kubona uko yimenyereza ku rwego mpuzamahanga, mu gihe adafite abarimu b’inzobere bahagije.”

Uwitwa Ruzindana Eduard we yavuze ko kugira ngo haboneke ireme ry’uburezi bisaba gutakaza byinshi kandi ko bigoye mu gihe abanyeshuri bagihabwa buruse y’intica ntikize kandi imibereho ihenze.

Umuhuzabikorwa w’Intagamburuzwa ku rwego rw’Igihugu, Ndayisaba Eustache, yavuze ko nk’abanyeshuri bahagarariye abandi, hari icyo batekereje cyo gukora ubuvugizi.

Yagize ati “Impamvu twakigarutseho ni uko kiri mu bibazo bibangamiye abanyeshuri kuko mbere ya 2015 abanyeshuri bahabwaga amafaranga bagiye kwimenyereza umwuga no mu bushakashatsi bwimbitse, bitewe n’uko navuga ko ingengo y’imari yabaye nke cyangwa ibindi bibazo, ayo mafaranga yose yavuyeho ariko ukabona ko ari ikibazo ku ireme ry’uburezi.”

Yakomje agira ati “Turimo gutekereza ko twazajya muri Banki y’u Rwanda itsura amajyambere n’ahandi hose byibuze ayo mafaranga bakayahabwa nk’inguzanyo ariko byibuze bigasigasira ireme ry’uburezi kuko utariye ntiwakwiga neza.”

Yakomeje avuga ko hari icyizere ko bazumvikana, byibura amafaranga ya buruse akaba yagezwa nko ku bihumbi 60Frw.

Avuga kuri iki kibazo, Umuyobozi Mukuru Ushinzwe Ikoranabuhanga n’Ubushakashatsi muri Minisiteri y’Uburezi, Dr. Gasinzigwa M. Christine yagize ati “Ikintu cyiza ni uko babivuga, iyo babivuze twicara hasi tukaganira, tukareba o nghazabanza iki, hazaboneka iki. Kubera ni amikoro. Baca umugani ngo umudiho uva mu itako. Ntabwo uzamuha icyo udafite ariko uramusobanurira ko kidahari ko ugiye kubanza igihari.”

Muri Mutarama uyu mwaka, abadepite basabye Minisiteri y’Uburezi ko hasuzumwa uburyo hakongderwa amafaranga ahabwa abanyeshuri biga mu mashuri makuru na kaminuza bya leta, kuko ayo bahabwa atakijyanye n’igihe.

Umuhuzabikorwa w’ Intore z’abanyeshuri bahagarariye abandi muri za kaminuza n’amashuri makuru mu Rwanda " Intagamburuzwa", Ndayisaba Eustache
Abanyeshuri bahagarariye abandi muri kaminuza n’amashuri makuru mu nama rusange yabo ya mbere
Umuyobozi Mukuru Ushinzwe Ikoranabuhanga n’Ubushakashatsi muri Minisiteri y’Uburezi, Dr. Gasinzigwa M. Christine

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza