Kwamamaza

Inshingano zikomeye zirimo kurwanya iterabwoba zakuwe kuri polisi y’u Rwanda

Yanditswe kuya 28-11-2016 saa 21:59' na Rabbi Malo Umucunguzi


Impinduka mu itegeko rigena ububasha, inshingano n’imikorere bya Polisi y’u Rwanda, zambuye uru rwego zimwe mu nshingano zikomeye zirimo iperereza, gukurikirana ibikorwa by’iterabwoba cyangwa gusaka byimbitse, ahubwo byegurirwa Urwego rw’Igihugu rw’Iperereza, Rwanda Investigation Bureau, RIB.

Inama y’abaminisitiri idasanzwe yo kuwa kabiri tariki ya 13 Nzeli 2016 niyo yemeje izi mpinduka, hashyirwaho Urwego rw’Igihugu Rushinzwe Iperereza (RIB) rwagombaga kugira itegeko rirushyiraho, rugakorera muri Minisiteri y’Ubutabera.

Kuri uyu wa Mbere tariki 28 Ugushyingo, Sena yemeje Itegeko rihindura kandi ryuzuza Itegeko n°46/2010 ryo ku wa 14/12/2010 rigena ububasha, inshingano, imitunganyirize n’imikorere bya Polisi y’u Rwanda ryasabiwe gusubirwamo na Perezida Paul Kagame.

Perezida wa Komisiyo y’Ububanyi n’amahanga, Ubutwererane n’Umutekano yasuzumye uyu mushinga, Senateri Rugema Michel, yavuze ko ahanini harebwe ku nshingano zari muri polisi, ariko zifitanye isano n’ubugenzacyaha ubu bwashyizwe mu nshingano za RIB.

Ati “Nk’ubugenzacyaha, iterabwoba, ibyo byose biri mu nshingano z’urwego rushya, nicyo cyatumye iyi ngingo nubwo twayigaruyemo, ariko utwo duce twatuvanyemo.”

“Ingingo irebana n’ibikorwa bya Polisi nayo yaravuguruwe havanwamo ubuce butatu, burimo ‘kurinda umutekano mu nkiko, gufatanya na polisi z’ibindi bihugu mu kurwanya ibyaha ndengamipaka no guhuza ibikorwa by’ubugenzacyaha bukorwa n’izindi nzego. Utu duce twavuyemo, kuko tujyanye n’urwego rushya rwashyizweho.”

Mu itegeko rya Polisi hari n’uduce twongewemo nko “gucunga umutekano w’ibikorwa remezo n’uw’inyubako za leta, kugenzura inyubako n’ahantu hose hahuriye imbaga y’abantu, ibinyabiziga n’amato, gukora ubugenzuzi bw’intwaro n’inkambi, gutanga icyemezo ku muntu wifuza kwandikisha ikigo cy’abikorera gutanga serivisi zo gucunga umutekano no gufasha abaturage mu bikorwa byo kwicungra umutekano.”

Indi ngingo yasubiwemo ni iyavugaga ko ku guhagarika no gukurikirana umuntu ubangamiye umutekano, aho Senateri Rugema yavuze ko “Komisiyo yasanze gukurikirana ari inshingano ya RIB” bityo byavanwe mu itegeko rya polisi.

Sen Rugema ati “Ku bijyanye n’ubugenzacyaha, iterabwoba, ibyaha byambukiranya imipaka, biri mu nshingano za RIB. Twabikuyemo tubishyira ku ruhande twizeye ko bizajya mu itegeko rya RIB. Ntabwo bishobora gutakara bigomba kugira aho bibarizwa.’’

Komisiyo ayoboye yanemeje ko “gukora iperereza” byavanwa mu itegeko rya polisi kubera ko iperereza ari iry’ubugenzacyaha bwashyizwe muri RIB, ku buryo nko mu gihe hari nk’umuntu wapfuye, polisi ikora inyandiko mvugo, RIB igakomeza iperereza ryimbitse.

Senateri Tito Rutaremara yabajije niba nka Polisi iri mu kazi kayo idashobora kureba ibyo umuntu afite nko mu mufuka kuko nabyo bishobora kuzitwa gusaka kandi biri gukurwa mu nshingano za polisi.

Senateri Sindikubwabo Jean Nepomuscene, we yagaragaje impungenge ko polisi yatswe inshingano zikomeye, kandi bigaragara ko uruhare rwayo rwari rukenewe ahantu henshi.

Ati “Iyo urebye inshingano polisi ifite harimo no kubungabunga umutekano imbere mu gihugu, kurinda umutekano w’abantu n’ibintu byabo, ugakuramo kurwanya iterabwoba naryo rishobora kubera imbere mu gihugu, ukareba n’uko muri iki gihe ubona ikibazo cy’iterabwoba gihangayikishije Isi, nagira ngo komisiyo imare impungenge ku buryo ruriya rwego rushya ruzakora kandi rugahuza n’iyi nshingano yo kurwanya iterabwoba rwonyine polisi itabigizemo uruhare.’’

Perezida wa Komisiyo y’Umutekano, Michel Rugema, yavuze ko inshingano polisi yakuweho “zitatawe”.

Ati “Icyakozwe ni ukugaragaza aho urwego rumwe rutangirira, urundi rwego rugakomeza. Ariko ubufatanye no gukorera hamwe ni ngombwa. Ariko kugira ngo bizabashe no kugenzurwa, ni ukuvuga ngo hari inshingano runaka, nk’iby’iterabwoba ryahawe ruriya rwego. Ariko si ukuvuga ngo niba polisi ibonye amakuru ku gikorwa cyambukiranya imipaka [izarebera], ni inshingano yayo ahubwo gukora raporo ikayishyikirize ruriya rwego ngo rukore iperereza ryimbitse.’’

Iri tegeko rivuga ko mu nshingano zayo, polisi iziajya yibanda ku kurinda umutekano wo ku butaka mu mazi no mu kirere, gukumira no kuburizamo ibyaha, iperereza no gusaka byimbitse bigashyikirizwa RIB.

Inkuru wasoma:Ishami ry’Ubugenzacyaha ryakuwe muri Polisi y’u Rwanda:

Abasenateri mu mirimo yabo kuri uyu wa Mbere
Minisitiri muri Perezidansi, Tugireyezu Venantie
Umunyamabanga wa Leta muri Minijust ushinzwe Itegeko Nshinga n'andi mategeko, Evode Uwizeyimana
Perezida wa Komisiyo y'Ububanyi n'amahanga, ubutwererane n'umutekano, Senateri Rugema Michel
Perezida wa Sena, Bernard Makuza

Amafoto: Mahoro Luqman


Kwamamaza

Kwamamaza
IZINDI NKURU WASOMA
TANGA IGITEKEREZO

ANDIKA ICYO UTEKEREZA KURI IYI NKURU

AMATEGEKO AGENGA IYANDIKA RY'IGITEKEREZO CYAWE:
Witandukira kubijyanye n'iyi nkuru; wikwandika ibisebanya, ibyamamaza cyangwa bivangura; wikwandika ibiteye isoni,
Wifuza kubona byihuse ibivugwa/ibisubizo ku gitekerezo cyawe, andika email yawe ahabugenewe.
Igitekerezo cyawe kigaragara nyuma y'isuzuma rikorwa na IGIHE.com
Ibi bidakurikijwe igitekerezo cyanyu gishobora kutagaragara hano cyangwa kigasibwa, Murakoze!
ANDIKA ICYO UTEKEREZA KURI IYI NKURU
Kwamamaza
IBITEKEREZO
Join Us

Socialize with Us
Contacts

Marketing
4546
Editor
078 827 26 21
Management
0788 74 29 08 / 0788 49 69 15

Emails: [email protected], [email protected]

Website Developped by

Uru Rubuga Ruheruka Gushyirwaho Amakuru Sunday 4 Ukuboza 2016
Copyright © 2009 -2014 - IGIHE Ltd - All Rights Reserved