Ingufu zikomoka ku mirasire y’izuba zitezweho kugeza Abanyarwanda kuri byinshi

Yanditswe na IGIHE
Kuya 18 Ugushyingo 2019 saa 08:08
Yasuwe :
0 0

Imwe mu ngamba Guverinoma y’u Rwanda yihaye ni uko mu mwaka wa 2024 abaturarwanda bose 100% bazaba bagerwaho n’amashanyarazi, arimo afatiwe ku muyoboro mugari ku kigero kingana na 52% naho adafatiye ku muyobora mugari akazaba ari 48%.

Mu gihe kugeza imiyoboro migari y’amashanyarazi mu duce twose mu gihugu bishobora gufata igihe bikaba imbogamizi mu kugeza amashanyarazi kuri bose kandi vuba; hari uduce twagenwe tuzahabwa amashanyarazi adafatiye ku muyoboro munini ibi bikazaba igisubizo kizafasha kugera ku ntego igihugu cyiyemeje.

Sosiyete y’u Rwanda ishinzwe Ingufu, REG, yakoze igishushanyo mbonera cyerekana uko amashanyarazi azajya atangwa muri buri gace k’igihugu ndetse n’uburyo buzakoreshwa mu kuyahageza, bwaba ubwo gufatira ku muyoboro mugari cyangwa gutanga adafatiye ku miyoboro migari.

Ni muri urwo rwego REG ikomeje ubukangurambaga buhamagarira abaturage gukoresha amashanyarazi adafatiye ku muyoboro mugari mu karere ka Nyaruguru.

Bamwe mu batuye mu Karere ka Nyaruguru batangiye gukoresha amashanyarazi aturuka ku mirasire y’izuba bavuga ko abafasha muri byinshi, bityo ubu bukangurambaga bukaba bugamije gushishikariza abataritabira iki gikorwa bari mu duce twagenwe gukoresha izi ngufu kudasigara inyuma.

Gukoresha amashanyarazi adafatiye ku muyoboro mugari ni inzira yo gufasha abaturarwanda guca ukubiri no gucana buji, itadowa n’ibindi bishobora kubatwikira inzu cyangwa kubateza indwara zaterwa n’ umwotsi ukomoka kuri ibyo bicanwa.

Umukozi wa REG ushinzwe ingufu zitanga amashanyarazi adafatiye ku muyoboro rusange, James Twesigye, avuga ko n’ubwo ikoreshwa ry’aya mashanyarazi ritaramara igihe kinini mu Rwanda, amaze kugera ku ngo zirenga ibihumbi 300 zingana na 14%.

Izi ngo zikoresha amashanyarazi adafatiye ku miyoboro migari ziganjemo izikoresha imirasire y’izuba.

Twesigye avuga ko imiryango yatangiye gukoresha amashanyarazi adafatiye ku muyoboro mugari ivuga imyato ibi bikorwa remezo bikomeje kubahindurira imibereho.

Ati “Abenshi barakubwira bati ‘njyewe nakoreshaga agatadowa, ariko ubu narakaretse, najyaga murikisha igiti ubu nakivuyeho, abana banjye bariga bagatsinda neza mu ishuri kuko babasha gusubiramo ibyo bize nimugoroba mbere yo kuryama”.

Karangwa Alex yavuze ko bishimiye ubu buryo bw’imirasire y’izuba kugira ngo bave mu mwijima.

Ati “Mbere twacanaga udutadowa ugasanga mu mazuru hahindutse umukara, ubuzima ari bubi cyane. Ubwo batangiye kutwegereza imirasire ni byiza cyane.”

Aya mashanyarazi kuyabona no kuyashyira mu ngo iwabo ni ikintu cyoroshye, kuko ibigo by’abikorera bitandukanye byagiranye amasezerano na REG binyuze muri sosiyete iyishamikiyeho ishinzwe guteza imbere ingufu (EDCL) yerekeye ubufatanye mu kugeza ku baturage amashanyarazi akomoka ku mirasire y’izuba.

Twesigye avuga ko ingufu zikomoka ku mirasire y’izuba zitari izo gucana amatara no kumva radio gusa ahubwo zinafasha abazikoresha kwiteza imbere bakora ubucuruzi burimo kogosha, gusudira, gukoresha ibyuma bisya imyaka n’ibindi.

Kayiranga Emmanuel ukora akazi ko kogosha akanatunganya imisatsi y’abagore muri Nyaruguru, avuga ko umurasire w’izuba wamufashije kwiteza imbere. Avuga ko mbere bumvaga ko amashanyarazi akomoka ku mirasire y’izuba atagira ingufu nk’asanzwe ariko ko kuva atangiye kuyakoresha yasanze yose ari kimwe.

Ati “Mbona ukoresha amashanyarazi asanzwe ntacyo andusha ahubwo usanga ari jye ufite icyo murusha kuko umuriro w’umurasire ntujya ubura na rimwe, ndawuhorana ariko amashanyarazi hari ubwo inite (unités) zigushirana bigasaba kubanza gushaka amafaranga yo kugura izindi.”

Akomeza avuga ko abagifite imyumvire ko umuriro ukomoka ku mirasire y’izuba udafite imbaraga bakwiye gusobanukirwa.

Ati “Yaba ku zuba, yaba mu mvura, ntacyo bitwaye kuko uhora uregeye.”

Twesigye ati “izi ngufu zigira ubushobozi bitewe no guhitamo kwa buri wese kugendanye n’icyo ashaka kuzikoresha. Nta muturage ukwiye kongera gucana agatadowa cyangwa ngo amurikishe igiti kandi yahabwa amashanyarazi”.

Ingufu zikomoka ku mirasire y'izuba zitezweho byinshi
Ubwo Twesigye James yasobanuriraga abatuye mu Karere ka Ngoma ko bari gukorana na Sacco, kugira ngo umuturage ajye ahabwa inguzanyo ku nyungu nto abone ingufu zikomoka ku mirasire y'izuba ubundi asigare yishyura Sacco

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza