00:00:00 IGIHE NETWORK KN KINYARWANDA EN ENGLISH FR FRANCAIS

Ingengo y’imari y’Umujyi wa Kigali yiyongereyeho 15%

Yanditswe na Ntabareshya Jean de Dieu
Kuya 6 Nyakanga 2021 saa 04:09
Yasuwe :
0 0

Inama Njyanama y’Umujyi wa Kigali yemeje ko ingengo y’imari uzakoresha mu bikorwa bitandukanye mu mwaka wa 2021-2022 irenga miliyari 115 Frw ivuye kuri miliyari 100 Frw yakoreshejwe umwaka ushize.

Amafaranga yose Umujyi wa Kigali uzakoresha ni 115.449.926.164 Frw.

Imishinga izibandwaho harimo iyo kubaka imihanda mishya no kunoza ishyirwa mu bikorwa ry’iyubatswe no kuvugurura isanzweho na za ruhurura.

Mu 2021/22 Umujyi wa Kigali uteganya kubaka nibura igice cya mbere cy’imihanda ifite uburebure bwa 17 km no gukora igice cya kabiri cy’imihanda yari iri kubakwa ariko itaranozwa ifite uburebure bwa 42,971 km.

Umujyi wa Kigali uteganya kuzakoresha 5.746.849.770 Frw mu kwimura abatuye mu manegeka mu Gatenga, kubaka neza ruhurura ya Mpazi no kwimura abayituriye.

Abatuye mu manegeka i Nyabisindu na Nyagatovu nabo bazimurwa muri uyu mwaka w’ingengo y’imari.

Biteganyijwe ko hazakorwa inyingo igamije gufata amazi yangiza imihanda mu Rugunga, Rwandex, Gisozi, Karuruma, Kinyinya na Nyabisindu. Izo nyigo zateganyirijwe miliyoni 400 Frw.

Umuyobozi w’Agateganyo w’Inama Njyanama y’Umujyi wa Kigali, Dr Kayihura Muganga Didas, yavuze ko gukoresha iyi ngengo y’imari neza ari byo bizatuma habaho impinduka mu iterambere ry’Umujyi n’ubuzima bw’abaturage bigaragarira buri wese.

Amafaranga Umujyi wa Kigali uteganya gukoresha wagaragaje ko azava mu bafatanyabikorwa barimo ibigo bya Leta, ahazava miliyari 7,2 Frw avuye kuri miliyari zisaga 21, 3 Frw zatanzwe umwaka ushize .

Uturere tuwugize tuzatanga asaga miliyari 45,3 Frw naho Umujyi wa Kigali ubwawo wishakire miliyari 60,5 Frw.

Umujyi wa Kigali uzakoresha miliyari 115 Frw mu bikorwa bigamije iterambere /Ifoto: Niyonzima Moise

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .