Ingengabitekerezo ya Jenoside iracyafite intebe mu bakuze-CNLG

Yanditswe na IGIHE
Kuya 3 Ukuboza 2017 saa 10:55
Yasuwe :
0 0

Umunyamabanga Nshingwabikorwa wa Komisiyo y’Igihugu yo kurwanya Jenoside (CNLG), Dr Bizimana Jean Damascène, yavuze ko urugamba rwo guhangana n’ivangura n’ingengabitekerezo ya Jenoside rukomeje gukomwa mu nkokora n’imyumvire y’abakuze badashaka kuyirekura bitewe n’impamvu zishingiye ku mateka.

Yabivugiye mu Nteko Ishinga Amategeko mu nama yahurije hamwe abasenateri, abadepite, bamwe mu bagize guverinoma, abayobozi b’intara, abayobozi ba bimwe mu bigo bya leta bafite aho bahuriye no gukurikirana ishyirwa mu bikorwa ry’amategeko.

Yavuze ko hari ababyeyi babiba ingengabitekerezo ya Jenoside mu bana babo mu rugo iwabo, ibyo bigaca intege imbaraga zishyirwa mu guharanira kurema Ubunyarwanda ahubwo bigakuza ivangura mu bakiri bato nk’uko TNT dukesha iyi nkuru yabyanditse.

Dr Bizimana yavuze ko hakenewe imbaraga mu kwigisha amateka y’u Rwanda cyane cyane ku mvano y’amacakubiri yagejeje u Rwanda kuri Jenoside yakorewe Abatutsi muri Mata 1994 igatwara ubuzima bw’abasaga miliyoni.

Mu 2003, nyuma y’imyaka icyenda habaye Jenoside yakorewe Abatutsi mu 1994, hatowe Itegeko Nshinga ryaje no kuvugururwa mu 2015, rigizwe n’ingingo z’amategeko arimo irigamije kurwanya Jenoside, igitugu, agamije gushyigikira no guteza imbere ubumwe n’ubwiyunge, hubakwa igihugu kiyobowe n’amategeko yubahiriza uburenganzira bw’ikiremwamuntu, arwanya ubujiji no guteza imbere ikoranabuhanga n’imibereho myiza y’abaturage.

U Rwanda rwiyemeje kubahiriza amahame shingiro arimo kurwanya ingengabitekerezo ya Jenoside, gukuraho ivangura rishingiye ku moko, ku karere n’ibindi byiciro ahubwo hagatezwa imbere ubumwe bw’abaturage.

Perezida wa Komisiyo ya Politiki n’Imiyoborere myiza muri Sena, Sindikubwabo Jean Nepomuscène, yavuze ko mu igenzura bamaze iminsi bakorera hirya no hino mu gihugu, basanze hari amategeko yirengagizwa cyangwa ntiyubahirizwe bitavuye ku bushake.

Iyo nama yari yakozwe hagamijwe kwibutsa abafatanyabikorwa guteza imbere amahame shingiro mu Banyarwanda.

Abayitabiriye bavuze ko hakenewe imbaraga nyinshi mu guhangana n’ingengabitekerezo ya Jenoside ariko cyane cyane no gukumira abayihakana bakomeje kubiba ivangura babinyujije mu nzira zitandukanye, bikadindiza ubumwe n’ubwiyunge.

Bavuze ko kuba hakiri abantu benshi bahakana bakanapfobya jenoside bari mu bice bitandukanye by’isi, bibangamira ubumwe n’ubwiyunge bw’Abanyarwanda.

Umwe mu myanzuro yafatiwe muri iyo nama harimo gushyira imbaraga mu bufatanye mpuzamahanga buzafasha u Rwanda kurwanya ingengabitekerezo ya Jenoside n’ipfobywa ryayo ndetse n’abakoze Jenoside bakidegembya bakagezwa imbere y’ubutabera.

Umunyamabanga Nshingwabikorwa wa Komisiyo y’Igihugu yo kurwanya Jenoside (CNLG), Dr Bizimana Jean Damascène

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza