Inganda zo mu Rwanda zikora ku kigero kiri munsi ya 50%

Yanditswe na Evariste Nsengimana
Kuya 19 Nzeri 2018 saa 07:47
Yasuwe :
0 0

Minisiteri y’Ubucuruzi n’Inganda (Minicom) yatangaje inganda zo mu Rwanda zikoresha ubushobozi zifite ku gipimo kiri munsi ya 50% kandi ko biri mu by’ibanze bizibandwaho muri Politiki nshya y’inganda.

Mu 2011, Guverinoma y’u Rwanda yashyizeho Politiki y’imyaka 10 yo guteza imbere inganda.

Mu byo yagezeho harimo gushyiraho amategeko azigenga, guhuza ibikorwa byazo, guteza imbere ishoramari mu Rwanda, kureshya abashoramari n’ibindi byazamuye urwego rw’inganda mu gihuhu.

By’umwihariko, ibarura rya 2017 ryerekanye ko urwego rw’inganda rwihariye 17% by’umusaruro mbumbe w’igihugu bivuye ku 13% mu 2000.

Minicom ivuga igenzura yakoze kuri Politiki y’inganda yo mu 2011, ryerekanye ko inganda nyinshi zikora ku gipimo cya 50% no munsi yacyo.

Kuri uyu wa 17 Nzeri 2018, hatangijwe inama y’iminsi, ihuza Minicom n’abafatanyabikorwa, igamije gusuzuma ibyo Politiki yagezeho.

Abafite inganda bavuga ko impamvu zimwe zikora ku gipimo kiri munsi ya 50% biterwa n’ingorane z’ubwikorezi buhenze, igishoro gike n’ibindi nk’uko Ngarambe Brian, ufite urutunganya ibyo gupfunyikamo abisobanura.

Ati “Usanga ibyo dukoresha tubikura kure. Dukeneye igishoro kinini [...] Rimwe na rimwe ugasanga ikibazo cy’igishoro n’ubimenyi buke birikuzamo.”

Yanavuze ko hari imyumvire abantu bagifite ko inganda zishingwa n’abanyamahanga, abanyarwanda ntibashidukire kuzishinga.

Umuyobozi Mukuru w’Urugaga rw’Abikorera, PSF, Ruzibiza Steven, asanga abafite inganda bakwiye koroherezwa, ku buryo ikiguzi inganda zitanga kugira ngo zikore kiba gito.

Ati “Iyo urebye ubu, ashorwa mu nganda ari hejuru kuko mu Rwanda ubushobozi bwo guhaha buri hasi. Ibyo nibyo bituma ishoramari mu nganda ridakunda.”

Minisitiri wa Minicom, Vincent Munyeshyaka, yavuze ko gukora ku gipimo cya 50% no munsi yacyo bigira ingaruka ku giciro cy’ibyo bakora.

Yavuze ko mu bibazo byagagajwe n’igenzura mu ishyirwa mu bikorwa rya Politiki y’inganda bizibandwaho muri Politiki itaha, nacyo kirimo.

Akenshi ngo biterwa n’uko ibikoreshwa mu nganda byinshi biva mu mahanga, bigatuma ikiguzi cy’ubwikorezi kiba hejuru.

Yavuze ko nubwo hari ibyakozwe nko kongera amashuri y’imyuga ariko ko bidahagije, bikenewe kongerwamo imbaraga, cyane cyane mu kuvugurura uburyo bw’imyigishirize cyangwa abanyamahanga baza mu Rwanda bakabungukiraho ubumenyi.

U Rwanda rufite intego y’uko mu 2024, inganda zizaba zihariye 21,8% by’umusaruro mbumbe w’igihugu.

Minisitiri w'Ubucuruzi n'Inganda, Vincent Munyeshyaka, ubwo yagezaga ijambo ku bitabiriye iyi nama

[email protected]


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza