Ingabo z’u Rwanda ziri mu butumwa i Darfur zambitswe imidari

Yanditswe na Kanamugire Emmanuel
Kuya 29 Ukwakira 2016 saa 10:20
45 30

Ingabo z’u Rwanda ziri mu butumwa bw’amahoro muri Darfur zambitswe imidari mu rwego rwo gushimirwa uburyo zanogeje akazi kazo kinyamwuga.

Izo ngabo ziri muri batayo ya 46 ziri mu butumwa bw’umuryango w’Afurika Yunze Ubumwe n’ubwa Loni (UNAMID) zahawe imidari na Loni nyuma y’amezi 11 zimaze muri ubwo butumwa, mu gikorwa cyabereye ku cyicaro gikuru cya batayo i Kabkabia tariki ya 27 Ukwakira 2016.

Umuyobozi w’ingabo za Loni na AU ziri muri ubwo butumwa Lt Gen Frank Mushyo Kamanzi yashimiye izo ngabo umusanzu utabonerwa ikiguzi batanze muri ubwo butumwa.

Yagize ati “UNAMID irabashimira, umudari muhawe ni ikimenyetso cy’ukwiyemeza kunoza akazi n’ubwitange byabaranze. Ubu muri abambasaderi beza b’amahoro ku Isi hose, mukwiye guterwa ishema nk’abagize uruhare muri icyo gikorwa, by’umwihariko hano i Darfur.”

Yabasabye gukomeza kuzirikana ubushake bwabo bwo gukomeza kubungabunga amahoro ndetse n’igihe bazaba basoje ubwo butumwa.

Gen Kamanzi yavuze ko kuba izo ngabo zarasohoje inshingano zazo zo kubungabunga amahoro ari iby’agaciro ku muryango wose wa UNAMID n’ Abanyasudani nk’abagenerwabikorwa.

Umuyobozi wa batayo ya 46, Lt Col James Gakuba yashimiye izo ngabo imyitwarire ndetse n’ubunyamwuga byaziranze.

Yagize ati “ Iki gikorwa cy’uyu munsi cyatwongereye akandi gaciro kadasanzwe mu buzima bwacu. Nishimiye kubabwira ko iri shimwe ry’umudari tuzahora tuwufata nk’ikimenyetso kidasanzwe kidutera kunoza akazi kacu, kikabyutsa ubushake no gushyira hamwe mu kurinda abasivili na nyuma yo gusoza inshingano zacu nkuko biteganywa mu nshingano za UNAMID.”

Uretse umuyobozi w’ingabo za UNAMID, uwo muhango wanitabiriwe n’abandi banyacyubahiro barimo umuyobozi w’izo ngabo mu gace k’Amajyaruguru, Brig Gen Amgad Morsy n’abandi.

Ingabo z'u Rwanda zambikwa imidali y'ishimwe

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE