Ingabo z’u Rwanda ziri mu butumwa bw’amahoro muri Centrafrique zambitswe imidali

Yanditswe na Kanamugire Emmanuel
Kuya 24 Nzeri 2016 saa 05:36
Yasuwe : XX
0

Ingabo z’u Rwanda (Rwabatt3) ziri mu butumwa bw’Umuryango w’abibumbye bugamije kugarura amahoro muri Centrafrique (MINUSCA) zambitswe imidali y’ishimwe kubera ubunyamwuga, ubwitange n’ikinyabupfura bibaranga mu gushyira mu bikorwa inshingano zabo.

Umuhango wo kubambika iyi midali wabereye ku birindiro by’izi ngabo biri mu mujyi wa Bangui ku itariki ya 22 Nzeri 2016. Igikorwa cyari kiyobowe n’Intumwa yungirije y’Umunyamabanga mukuru wa Loni muri Centrafrique, Diana CORNER.

Mu ijambo rye, CORNER yashimye imirimo myiza yakozwe n’ingabo z’u Rwanda mu mezi arindwi ashize, avuga ko byose babikoraga ku gihe ndetse bakarangwa n’ubwitange, ubunyamwuga n’ikinyabupfura.

Yanashimye izi ngabo kandi kuba zitarigeze zishora mu bikorwa by’ihohoterwa no gufata ku ngufu.

Ati” Biba bibabaje kubona abo twaje kurinda babayeho nabi kubera ibikorwa byacu.”

Umuyobozi w’ingabo z’u Rwanda ziri mu butumwa bw’amahoro muri Centrafrique, Lt Col Claver Kirenga yashimye ubuyobozi bwiza bwa Minusca n’ubufasha badahwema kubagezaho ndetse anashima leta n’abaturage kubera imikoranire myiza bagirana.

Yanagarutse kandi ku bikorwa bikomeye izi ngabo zakoze mu mezi atandatu ashize birimo kurinda umukuru w’igihugu, kurinda abaturage n’ibindi bikorwa by’ingenzi bya leta.

Uyu muhango kandi witabiriwe n’abayobozi b’ingabo batandukanye Maj Gen Jean Edeus Barau, uyobora Minusca, Brig Gen Ludovic Ngaïfeï uyobora igisirikare cya Centrafrique na Brig Gen MOUMOUNI ZANKARO uyobora ingabo mu mujyi wa Bangui.

Ingabo z'u Rwanda ziri muri Centrafrique zambikwa imidali kubera akazi ko kubungabunga amahoro zihakora
Intumwa yungirije y’Umunyamabanga mukuru wa Loni muri Centrafrique, Diana CORNER

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza