Kwamamaza

Ingabire wiberaga mu muhanda yabyaye umuhungu abona n’ikigo kimwakira

Yanditswe kuya 13-09-2016 saa 10:33' na Tombola Felicie


Ingabire w’imyaka 18 uvuka mu Karere ka Ruhango, mu Ntara y’Amajyepfo ariko akaba yiberaga mu muhanda i Nyabugogo, mu rukerera rwo kuri uyu wa 13 Nzeri 2016 yabyaye umwana w’umuhungu ku bitaro bya Muhima.

Nyuma y’aho ku Cyumweru tariki ya 11 Nzeri, IGIHE yanditse inkuru ivuga ku buzima bubabaje bwa Ingabire Claudette wari umaze amezi icyenda yirarira mu muhanda kandi atwite, akarere ka Nyarugenge katangiye kumushakisha ngo harebwe uburyo yafashwa.

Bitewe n’uko abana bo mu muhanda birirwa bagenda, nijoro akaba ari bwo bajya kuryama, ahagana saa sita z’ijoro ni bwo abakozi b’Akarere ka Nyarugenge babashije kumugeraho kugira ngo barebe uko yavanwa mu muhanda akitabwaho nk’umugore utwite.

Muri ayo masaha basanze ari ku nda bahita bamwerekeza ku bitaro bya Muhima maze saa kumi n’imwe za mu gitondo ahita abyara umwana w’umuhungu.

Mu kiganiro na Nsabimana Nicolette, Umuyobozi wa Centre Marembo,yakira abana b’abakobwa baba barahuye n’ibibazo bitandukanye bakava mu miryango, yatangaje ko nyuma yo gusoma iyo nkuru yahise atangira gushakisha amakuru kuri uyu mwana kugira ngo ajyanwe mu Kigo yitabweho.

Ubuyobozi bw’Akarere ka Nyarugenge na bwo ngo bwahise bumuhamagara nk’umuntu wari wagaragaje ubushake bwo kwakira uwo mukobwa.

Nsabimana ati “Bakimubona bahise baduhamagara natwe duhita tuhagera. Yabyaye neza hano ku bitaro bya Muhima.Ikigiye gukurikiraho ni ukumujyana mu Kigo cyacu, tukamwitaho nk’umubyeyi wabyaye, tukamuganiriza agakira ihungabana noneho yamara gusubira mu buzima busanzwe nka nyuma y’imyaka ibiri tukaba twamusubiza mu muryango we ndetse agasubizwa no mu ishuri kuko yarigaga.”

Nsabimana avuga ko muri Centre Marembo n’ubundi bafite abana batandatu bafite ikibazo kimwe nk’icya Ingabire.

Yatanze ubutumwa ku babyeyi batererana abana avuga ko baba bakwiye gukomeza kuba ababyeyi no mu bibazo ndetse bibaye ngombwa abateshuka kuri iyi nshingano inzego z’ubuyobozi zikwiye kubahana.

Centre Marembo igiye kwakira uyu mwana iherereye mu murenge wa Ndera mu karere ka Gasabo;yatangiye mu 2003 yakira imfubyi n’abana bafite ibibazo muri rusange ariko ubu yita ku bana b’abakobwa bari munsi y’imyaka 10 ndetse n’abayirengeje ariko babyaye bakiri bato.

Nsabimana Nicolette, Umuyobozi wa Centre Marembo, igiye kwakira Ingabire nyuma yo kubyara

[email protected]


Kwamamaza

Kwamamaza
IZINDI NKURU WASOMA
TANGA IGITEKEREZO

ANDIKA ICYO UTEKEREZA KURI IYI NKURU

AMATEGEKO AGENGA IYANDIKA RY'IGITEKEREZO CYAWE:
Witandukira kubijyanye n'iyi nkuru; wikwandika ibisebanya, ibyamamaza cyangwa bivangura; wikwandika ibiteye isoni,
Wifuza kubona byihuse ibivugwa/ibisubizo ku gitekerezo cyawe, andika email yawe ahabugenewe.
Igitekerezo cyawe kigaragara nyuma y'isuzuma rikorwa na IGIHE.com
Ibi bidakurikijwe igitekerezo cyanyu gishobora kutagaragara hano cyangwa kigasibwa, Murakoze!
ANDIKA ICYO UTEKEREZA KURI IYI NKURU
Kwamamaza
IBITEKEREZO
Join Us

Socialize with Us
Contacts

Marketing
4546
Editor
078 827 26 21
Management
0788 74 29 08 / 0788 49 69 15

Emails: [email protected], [email protected]

Website Developped by

Uru Rubuga Ruheruka Gushyirwaho Amakuru Sunday 11 Ukuboza 2016
Copyright © 2009 -2014 - IGIHE Ltd - All Rights Reserved