Ingabire Immaculée ntahuza na Depite Mutesi ku kiguzi abakobwa bamwe batanga ngo barongorwe

Yanditswe na Evariste Nsengimana
Kuya 14 Gashyantare 2020 saa 11:29
Yasuwe :
0 0

Umuyobozi w’Umuryango mpuzamahanga urwanya ruswa n’akarengane ishami ry’u Rwanda (Transparency International Rwanda) Ingabire Marie Immaculée ntiyemeranya na Depite Mutesi Anita, wifuza ko ikiguzi abakobwa bamwe baha abasore ngo bazabarongore cyafatwa nka ruswa ndetse bakaba bakurikiranwa.

Ingabire avuga ko ari serivisi nk’izindi baba bagura bityo utafata umuntu waguze serivisi ngo umushyire mu gatebo kamwe n’uwatanze ruswa kugira ngo abone ikintu mu buryo atari akwiye kukibonamo.

Hashize igihe bivugwa ko hari abakobwa bamwe mu bice bitandukanye by’igihugu bahonga abasore bakabaha impano zirimo amafaranga n’indi mitungo kugira ngo bazabarongore, rimwe na rimwe ukazasanga bashwanye, umwe muri bo atubahirije isezerano bagiranye.

Ubwo yari mu nama Urwego rw’Umuvunyi rwagiranye n’Inzego z’Ubutabera zateguye kuri uyu wa 13 Gashyantare 2020, igamije gusesengura ibyuho bya ruswa bikigaragara muri izo nzego n’ingamba zafatirwa, Depite Mutesi yavuze ko icyo kibazo gikwiye gushyira mu byiciro bya ruswa.

Ati “Nk’ubu iyo ugiye muri Nyamasheke, Rusizi aho uyu munsi umwana w’umukobwa ahiga ibihumbi 400Frw kugira ngo ahe ruswa umugabo amushake. Icyo ni ikibazo gikomeye. Turagifata tukakigira ikintu cyoroheje ariko kizavamo ruswa, iyi ni ruswa”.

Depite Mutesi yavuze ko usanga ababyeyi bahangayishijwe n’uko abana babo basigaye babasaba amafaranga yo kuzaha abasore kugira ngo babarongore.

Ati “Nyamara wa mugabo arava kuri uwo mukobwa akamuha ibihumbi 400Frw, ejo mu gitondo akarenga uwo akajya ku wundi, gutyo gutyo ugasanga ni ibintu birimo gukururana. Njye numva iki kintu dukwiye kugishyiramo imbaraga cyane ejo kitazakwira ahantu hose ugasanga kivuyemo ikindi kintu kiremereye.”

“Mbona nk’abantu dusenyera umugozi umwe, dukwiye kureba bene ibyo bintu by’ibyuho bya ruswa abantu bari kwinjiramo aho kugira ngo ejo bizatubere ikibazo.”

Ingabire Marie Immaculée yavuze ko amafaranga abakobwa bigura kugira ngo barongorwe ari serivisi nk’izindi baba bishyura ahubwo ko umusore aramutse amutengushye yakurikiranwa nk’umwambuzi.

Ati “Depite Anitha we yatubwiye ngo ariya mafaranga bariya bakobwa batanga ni ruswa. Iriya ntabwo ari ruswa, baba bagura serivisi. Ntabwo ushobora kubyita ruswa ahubwo wa munsi azayamuha wa muhungu ntamurongore, icyo gihe tuzamukurikirana nk’umwambuzi.”

Umuyobozi wa T I Rwanda, Ingabire asanga abakobwa bahonga abasore amafaranga ngo babarongore ari serivisi baba bagura
Depite Mutesi avuga ko amafaranga abakobwa baha abasore ngo babarongore yafatwa nka ruswa

[email protected]


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza