Kwamamaza

Indege nshya ya RwandAir yiswe ‘Kalisimbi’ itegerejwe i Kigali

Yanditswe kuya 15-11-2016 saa 16:49' na Philbert Hagengimana


Kuri uyu wa Gatatu tariki ya 16 Ugushyingo, ni bwo hiteguwe kwakirwa indege nshya Boeing 737- 800NG yiswe “Kalisimbi”, Sosiyete Nyarwanda itwara abagenzi mu ndege, RwandAir iherutse kugura muri Leta Zunze Ubumwe za Amerika.

Mu Ukuboza 2015, RwandAir yasinye amasezerano n’Ikigo cy’Abanyamerika, Aircraft Lease Corporation, yo kugura indege ebyiri zigezweho zo mu bwoko bwa Boeing 737-800 Next Generation (Boeing 737- 800NG), imwe yiswe “Kalisimbi” indi yitwa “Muhabura”.

Kalisimbi ni yo itegerejwe kwakirwa i Kigali kuri uyu wa 16 Ugushyingo 2016, naho Muhabura yo izagera mu Rwanda muri Gicurasi 2017, RwandAir ikaba ibaye iya mbere muri Afurika n’iya kabiri ku Isi ibonye indege yo mu bwoko bwa Boeing 737- 800NG ifite ikoranabuhanga nk’irya “Kalisimbi”.

Iyo ndege ifite imyanya 154 iteye kimwe n’indi yaguzwe mu myaka itandatu ishize iyo ikaba yari iya mbere muri ebyiri za ‘Boeing Sky Interior’, muri Afurika.

John Mirenge, Umuyobozi wa RwandAir yavuze ko iyo ndege iteye ityo n’uburyo abagenzi bazajya baba batuje, dore ko yujuje ibisabwa byose mu bazajya baba bari mu myanya y’aharinganiye (Medium), kandi inafite ikoranabuhanga rya Internet ya Wi-Fi dore ko ari cyo kibazo abagenzi bari basigaranye kuri ubu.

RwandAir ikomeje gutera imbere ari na ko irushaho kwagura ingendo zayo, dore ko ubu igize indege 12, imyanya y’abagenzi itwara na yo ikazikuba kabiri muri Gicurasi 2017 ubwo hazaba hamaze kuboneka indege ya kane (4) yo mu bwoko bwa B737-800NG n’iya kabiri yo mu bwoko bwa A330 – 300 izagera i Kigali kuwa 30 Ugushyingo 2016, nyuma y’iya mbere yageze i Kigali kuwa 28 Nzeri uyu mwaka.

RwandAir iteganya ko ku ngendo isanzwe ikora, mu 2017 haziyongeraho izindi enye zo muri Afurika, u Burayi, Asia na Leta zunze Ubumwe za Amerika.

RwandAir iherutse guhabwa icyemezo n’ishyirahamwe mpuzamahanga rishinzwe ingendo z’indege (IATA), kiyiha uburenganzira ndakumirwa bwo gukora.


Kwamamaza

Kwamamaza
IZINDI NKURU WASOMA
TANGA IGITEKEREZO

ANDIKA ICYO UTEKEREZA KURI IYI NKURU

AMATEGEKO AGENGA IYANDIKA RY'IGITEKEREZO CYAWE:
Witandukira kubijyanye n'iyi nkuru; wikwandika ibisebanya, ibyamamaza cyangwa bivangura; wikwandika ibiteye isoni,
Wifuza kubona byihuse ibivugwa/ibisubizo ku gitekerezo cyawe, andika email yawe ahabugenewe.
Igitekerezo cyawe kigaragara nyuma y'isuzuma rikorwa na IGIHE.com
Ibi bidakurikijwe igitekerezo cyanyu gishobora kutagaragara hano cyangwa kigasibwa, Murakoze!
ANDIKA ICYO UTEKEREZA KURI IYI NKURU
Kwamamaza
IBITEKEREZO
Join Us

Socialize with Us
Contacts

Marketing
4546
Editor
078 827 26 21
Management
0788 74 29 08 / 0788 49 69 15

Emails: [email protected], [email protected]

Website Developped by

Uru Rubuga Ruheruka Gushyirwaho Amakuru Saturday 10 Ukuboza 2016
Copyright © 2009 -2014 - IGIHE Ltd - All Rights Reserved