Kwamamaza

Indege ya mbere nini ya RwandAir yageze i Kigali iguzwe miliyari zisaga 200

Yanditswe kuya 28-09-2016 saa 12:54' na Mukaneza M.Ange


Indege Airbus A330-200 ya mbere nini yaguzwe na Sosiyete Nyarwanda itwara abantu n’ibintu mu ndege, RwandAir yageze i Kigali kuri uyu wa Gatatu ahagana saa tanu n’igice z’amanywa.

Iyi ndege yiswe ‘Ubumwe’ yaguzwe miliyoni 250 z’amadolari (asaga miliyari 200 z’amafaranga y’u Rwanda), ikaba ari iya cyenda RwandAir iguze.

Ifite imyanya 244, irimo 20 yiyubashye (Business Class), 24 yo mu myanya yisumbuyeho (Premium) na 200 isanzwe.

Mu myanya y’icyubahiro, ifite umwihariko wo kugira igitanda umuntu ashobora kuryamaho n’intebe zifasha kugorora umubiri (massage), televiziyo imbere ya buri muntu wese, internet ndetse n’uburyo bwo kongera no kugabanya urumuri bitewe n’amasaha.

Ubwo Airbus A330-200 yakirwaga ku kibuga cy’indege i Kanombe kuri uyu wa 28 Nzeri 2016, Minisitiri w’Ibikorwa Remezo, James Musoni yavuze ko iki gikorwa kigaragaza urugendo rw’iterambere ry’u Rwanda kandi ari n’amahirwe mu guteza imbere ubukungu mu Rwanda no mu karere.

Ati “Uyu munsi turavuga ko dufite indege icyenda. Turateganya izindi ebyiri mbere y’uko uyu mwaka urangira ndetse mu ntangiriro z’umwaka utaha hari indi izaza. Uku kwiyongera bituma dushyira ingufu mu gushaka ikindi kibuga cy’indege.”

Yakomeje avuga ko kwiyongera kw’indege za RwandAir bitazasubizwa inyuma n’ikibuga gito kuko mu myaka itarenze itatu icyo mu Bugesera kizaba cyuzuye.

Ati “Turashima icyerekezo cya Perezida wacu, wafashe urwego rw’ibijyanye n’indege nk’imwe mu nkingi z’iterambere ry’ubukungu bwacu. Uyu munsi uragaragaza intambwe ikomeye itewe mu iterambere ry’ubukerarugendo n’imitangire ya serivisi mu gihugu cyacu.”

Yanashimye Perezida wa Repubulika kandi ku bw’inama yabagiriye yo kutegurira RwandAir abikorera ahubwo leta igashoramo imari kugira ngo irusheho gutera imbere.

Umuyobozi Mukuru wa RwandAir, John Mirenge, yavuze ko iyi ndege nshya izaha RwandAir ubushobozi bwo gukorera ingendo ku mugabane w’u Burayi no muri Aziya nko mu Buhinde.

Ati “Aho twajyaga nka za Dubai, igiye kudufasha kongera ubushobozi tutari dufite cyane cyane ku bijyanye n’abakiliya twatwaraga, ariko noneho utibagiwe ikibazo cy’imizigo twajyaga dusiga kubera ko indege twari dufite itari ifite ubushobozi bwo kuba yabizana byose.”

Mirenge avuga ko bahisemo kuyita ‘Ubumwe’ kuko ari kimwe mu byagize Abanyarwanda nyuma ya Jenoside yakorewe abatutsi mu 1994.

Airbus A330-200 izatangira gukorera ingendo i Dubai ku itariki ya 8 Ukwakira 2016.

RwandAir ifite intego y’uko umwaka wa 2016/17 uzarangira itwaye abagenzi ibihumbi 750.

Indege yishimiwe n'abantu benshi
Umuyobozi wa Polisi y'Igihugu, IGP Emmanuel Gasana (iburyo) yari mu bayobozi baje kwakira iyi ndege
Abantu benshi bari baje kwakira iyi ndege
Visi Perezida wa Airbus, Hadi Akoum
Minisitiri w'Ibikorwa remezo, James Musoni
Umuyobozi wa RwandAir, John Mirenge
Umuhuzabikorwa w'Amashami ya Loni mu Rwanda, Lamin Manneh
Minisitiri Musoni yitegereza imiterere y'ahicara abapilote
Intebe zo mu myanya y'icyubahiro zishobora no guhinduka igitanda

[email protected]


Kwamamaza

Kwamamaza
IZINDI NKURU WASOMA
TANGA IGITEKEREZO

ANDIKA ICYO UTEKEREZA KURI IYI NKURU

AMATEGEKO AGENGA IYANDIKA RY'IGITEKEREZO CYAWE:
Witandukira kubijyanye n'iyi nkuru; wikwandika ibisebanya, ibyamamaza cyangwa bivangura; wikwandika ibiteye isoni,
Wifuza kubona byihuse ibivugwa/ibisubizo ku gitekerezo cyawe, andika email yawe ahabugenewe.
Igitekerezo cyawe kigaragara nyuma y'isuzuma rikorwa na IGIHE.com
Ibi bidakurikijwe igitekerezo cyanyu gishobora kutagaragara hano cyangwa kigasibwa, Murakoze!
ANDIKA ICYO UTEKEREZA KURI IYI NKURU
Kwamamaza
IBITEKEREZO
Join Us

Socialize with Us
Contacts

Marketing
4546
Editor
078 827 26 21
Management
0788 74 29 08 / 0788 49 69 15

Emails: [email protected], [email protected]

Website Developped by

Uru Rubuga Ruheruka Gushyirwaho Amakuru Saturday 3 Ukuboza 2016
Copyright © 2009 -2014 - IGIHE Ltd - All Rights Reserved