Incamake y’amateka y’u Buholandi, igihugu kigiye kuberamo Rwanda Day 2015

Yanditswe na Richard Dan Iraguha
Kuya 26 Nzeri 2015 saa 10:29
Yasuwe :
0 0

Nyuma ya Rwanda Day imaze kubera i Chicago, Boston na Atlanta muri USA, i Paris mu Bufaransa, i Toronto muri Canada, n’i Londres mu Bwongereza, biteganyijwe ko no mu kwezi k’Ukwakira uyu mwaka izabera mu Buholandi.

Ni umunsi uhuza Abanyarwanda baba mu mahanga n’inshuti z’u Rwanda, bakaganirwa ku iterambere ry’igihugu.

IGIHE twaganiriye na Joseph Ntwali Rutazihana, Umunyarwanda umaze imyaka 23 atuye mu Buholandi bituma dukusanya incamake y’amateka y’iki gihugu.

U Buholandi ni igihugu giherereye mu Burayi bw’Uburengerazuba. Cyabayeho mu kinyejana cya 16. Gihana imbibi n’igihugu cy’Ububiligi mu majyepfo, Ubudage mu burasirazuba, igice gisigaye bugakikizwa n’inyanja bita iy’amajyaruguru"Mer du Nord".

U Buholandi bufite abaturage bagera kuri miliyoni zigera kuri 18, bavuga ururimi rwitwa “Neerlandais”.

Ni igihugu cy’Ubwami ubu umwami akaba yitwa Willem Alexandre. Guverinoma ni yo ifata ibyemezo mu buyobozi n’igenamigambi rya Leta iyobowe ubu na Minisitiri w’intebe, Mark Rutte.

U Buholandi bugizwe n’ibice bitatu, amajyaruguru ari yo yiganjemo ubuhinzi n’ubworozi, igice cyo hagati mu gihugu gikora ibijyanye no gutanga serivise, amajyepfo yiganjemo inganda zikomeye.

Ni igihugu kibarirwa ku mwanya wa 7 mu bifite ubukungu bwinshi ku Isi, ubukungu bushingiye cyane ku buhinzi cyane bw’indabo n’ibindi bihingwa byoherezwa mu mahanga n’ubworozi bwiganjemo cyane ubw’inka.

Umurwa mukuru wacyo ni "Amsterdam", ariko umujyi wiganjemo ibikorwa by’ubuyobozi bukuru bw’igihugu, za amabasade, imiryango mpuzamahanga ni "La Haye".

U Buholandi ni igihugu kigizwe na Porovensi 12, wongeyeho uturere 6 duherereye mu birwa bya Caraïbes. Gifite amazi menshi, imigezi miremire myinshi hirya no hino, kubera gukikizwa n’amazi menshi kandi kigizwe n’imigezi myinshi, kirinzwe bikomeye n’ingomero (Digues) zagiye zubakwa mu mateka y’ibiza (catastrophes naturelles) byagiye bigwirira u Buholande.

Iki gihugu kizwiho ubworoherane mu mu mibereho ya buri munsi (tolérance sociale), kikaba igihugu cy’iterambere no guhanga udushya.

Kizwi mu bihugu bya mbere mu kwemera ko utwite ashobora gukuramo inda niba ri byo ahisemo, kandi cyemerera abakora umwuga wo kwicuruza kubikora nta nkomyi, kuko bifatwa nk’ibyemewe n’amategeko. Guhuhura(euthanasie), umurwayi w’indembe biremewe mu gihe bisabwe kubera impamvu zitandukanye.

Ibiyobyabwenge biremewe kandi bigira amasoko mu mijyi yo mu gihugu. Kuva mu mwaka wa 2001 cyemera ko abahuje ibitsina bambikana impeta zo kubana nk’abashakanye(mariage homosexuel).

U Buholandi buri mu miryango mpuzamahanga itandukanye nka (Union Européenne), OTAN (Organisation du traité de l’Atlantique Nord) n’indi.

Mu ntambara ya mbere y’Isi U Buholandi buzwi nk’ igihugu kitari gifite aho kibogamiye, mu ntambara ya 2 y’Isi nibwo bwagiye ku gice cy’abarwanaga ngo ihagarare, aho mu mwaka 1945 bwasinye amasezerano mu mujyi wa Londres mu bwongereza yo kwinjira mu muryango wa "Benelux" mu rwego rwo kuzamura ubukungu biciye ku mipaka, umuryango uhuriwemo n’ u Bubiligi, Luxembourg n’u Buholande.

Kuva mu mwaka wa 2015,iki gihugu kiza mu bihugu bya mbere bifite demokarasi ihamye kandi bitarangwamo ruswa ku Isi.

Ikindi kintu kiranga u Buholandi ni uko bizwi ko ari igihugu cy’abakozi, kiza mu bahanga mu kubaka imihanda, amteme, ingomero z’amazi, kwigisha ibijyanye n’ubuhinzi n’ubworozi kandi kigendera ku mategeko, uyarenzeho agahanwa by’intangarugero.

Ni igihugu kizwi cyane mu marushanwa ku rwego rw’Isi mu mikono y’umupira w’amaguru, mu gukoresha amagare nk’igikoresho gikomeye mu buzima bwa buri munsi cyane ko ari igihugu gifite imirambi gusa.

Mu Buholandi borora inka cyane
Kompanyi y'Indege KLM izwi ku Isi ikomoka mu Buholandi
Ishusho yerekana imirima irumbuka yo mu Buholandi
U Buholandi buzwi nk'igihugu kigendwamo n'amagare menshi ku Isi
Minisitiri w'Intebe w'u Buholandi Mark Rutte
Umwami w'u Buholandi Willem Alexander

[email protected]


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza