Inama ya Transform Africa 2019 yahaye umwihariko udushya mu ikoranabuhanga tw’Abanyafurika

Yanditswe na Cyprien Niyomwungeri
Kuya 9 Ugushyingo 2018 saa 02:23
Yasuwe :
0 0

Inama ya Transform Africa 2019, izabera ku nshuro ya Gatanu i Kigali, yahaye umwihariko udushya mu ikoranabuhanga tw’Abanyafurika, aho tuzagaragazwa tukanashyigikirwa kugira ngo tube moteri y’ubukungu bwa Afurika bushingiye ku ikoranabuhanga.

Iyi nama izaba kuwa 7-10 Gicurasi 2019 muri Kigali Convention Centre, izahuza abarenga 4000 barimo; abakuru b’ibihugu, abikorera, imiryango mpuzamahanga n’abandi, bigira hamwe uko bakihutisha ubukungu bwa Afurika binyuze mu ikoranabuhanga.

Kuri uyu wa Gatanu ubwo hatangizwaga imyiteguro y’ibanze y’iyi nama, Umuyobozi Mukuru wa Smart Africa, ifatanya n’u Rwanda gutegura iyi nama, Dr Hamadoun Touré, yavuze ko uyu mwaka hazibandwa ku nsanganyamatsiko yo ‘guteza imbere ubukungu bwa Afurika bushingiye ku ikoranabuhanga’.

Yavuze ko udushya mu ikoranabuhanga duhangwa n’Abanyafurika ari moteri y’ubukungu bwayo bushingiye ku ikoranabuhanga, bityo tukaba tuzahabwa umwanya kugira ngo tugaragazwe, dushyigikirwe kugira ngo dutange umusaruro cyane cyane mu guhangira imirimo urubyiruko.

Ati “Ikindi cy’ingenzi muri iyi nama kizaba udushya mu ikoranabuhanga, tuzahabwa amahirwe yo kugaragara kuko turashaka ko Afurika iba umugabane w’udushya mu ikoranabuhanga. Guha amahirwe urubyiruko rwacu yo guhanga udushya nibyo bizageza uyu mugabane ku rwego twifuza”.

Dr Hamadoun Touré yasobanuye ko utwo dushya tuzagaragazwa mu gisa n’irushanwa rizitabirwa n’abantu benshi, bikarushaho kuba umusemburo wo guteza imbere ubukungu no guhangira imirimo urubyiruko rwa Afurika.

Inama ya Transform Africa 2019 izabanzirizwa n’inama mpuzamahanga ku bukungu bushingiye ku ikoranabuhanga muri Afurika. Hazaganirwa ku bucuruzi, guhanga imirimo, uburyo bwo guhererekanya amafaranga mu ikoranabuhanga, ibikorwa remezo, ikoranabuhanga mu buhinzi, guteza imbere inganda, ikoranabuhanga mu rwego rw’ubuzima no guteza imbere abagore mu ikoranabuhanga.

Umunyamabanga Uhoraho muri Minisiteri y’ikoranabuhanga mu itumanaho na Inovasiyo, Irere Claudette, yavuze ko iyi nama ari urubuga rwo kwerekaniramo ibyo ibihugu byagezeho mu guteza imbere ubukungu bushingiye ku ikoranabuhanga kugira ngo basangire ubunararibonye.

Yavuze ko umubare w’abitabira Transform Africa wiyongera, ibiganiro bitangwa bikiyongera ari nako hazamo ingingo nshya ndetse n’ibihugu bitari ibyo muri Afurika bikayitabira.

Ati “Ikindi gikomeye ni uko umubare w’ibihugu bihinduka ibinyamuryango ugenda na wo wiyongera, ari nacyo twashakaga kuva kera. Ubu ibihugu binyamuryango bya Smart Africa ni 24”.

Muri Transform Africa 2019, hazamurikwa kandi ibikorwa by’ikoranabuhanga, habeho n’imikino ya Golf izahuza abazayitabira.

Kugeza ubu abarenga 15 000, bamaze kwitabira Transform Africa kuva mu 2013 yatangira, bakaba baraturutse mu bihugu birenga 112.

Umuyobozi Mukuru wa Smart Africa, ifatanya n’u Rwanda gutegura iyi nama, Dr Hamadoun Touré, yavuze ko uyu mwaka hazibandwa ku nsanganyamatsiko yo ‘guteza imbere ubukungu bwa Afurika bushingiye ku ikoranabuhanga
Umunyamabanga Uhoraho muri Minisiteri y’ikoranabuhanga mu itumanaho na Inovasiyo, Irere Claudette, yavuze ko iyi nama ari urubuga rwo kwerekaniramo ibyo ibihugu byagezeho
Nsengimana Jean Philbert Umujyanama wihariye wa Dr. Hamadoun Touré uyobora ubunyamabanga bwa Smart Africa
Minisitiri w'ubucuruzi n'inganda Soraya Hakuziyaremye na we yitabiriye uyu muhango
Umuhuzabikorwa wa One UN mu Rwanda, Fodé Ndiaye na Minisitiri w'ubucuruzi n'inganda Soraya Hakuziyaremye

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza