Inama ya Transform Africa 2016 yasubitswe habura ukwezi ngo ibe

Yanditswe na Kanamugire Emmanuel
Kuya 24 Nzeri 2016 saa 03:06
Yasuwe : XX
118 67

Inama mpuzamahanga y’iminsi itatu ku ikoranabuhanga mu guhindura Afurika, ‘Transform Africa Summit 2016’ yari iteganyijwe kubera mu Rwanda mu kwezi gutaha yasubitswe yimurirwa mu mwaka wa 2017.

Izi mpinduka zibaye habura iminsi mike ngo iteranire mu nyubako ya Kigali Convention Centre kuwa 19-21 Ukwakira 2016, ikaba yari ifite insanganyamatsiko igira iti “Smart Cities – Fast Forward” igamije guteza imbere imijyi binyuze mu ikoranabuhanga no guhanga udushya.

Umuyobozi mukuru ushinzwe ikoranabuhanga no guhanga udushya muri Smart Africa, Didier Nkurikiyimfura, yabwiye IGIHE ko inama yasubitswe bitewe nuko abari kuyitabira biganjemo abayobozi b’imijyi bazaba bitabiriye indi nama y’ishami ry’umuryango w’abibumbye rishinzwe imiturire (UN Habitat).

Yagize ati“Yego nibyo yarasubitswe. Ariya matariki ntabwo yafashaga bamwe mu bantu twifuzaga ko baza. Hari inama zikomeye ziri muri ariya matariki. Nk’Abameya twifuzaga bagera kuri 300, twasanze hari inama ikomeye cyane iba buri myaka 20 ya UN Habitat bazitabira.”

Inama y’Inteko rusange ku miturire ya mbere yabaye mu 1976, iya kabiri iba mu 1996, iya gatatu izaba muri 2016 ku matariki amwe n’ayo Transform Africa yari kuzaberaho.

Nkurikiyimfura yakomeje avuga ko kuba insanganyamatsiko ireba cyane abameya b’imijyi kandi bakaba bazitabira iriya nama ari cyo cyatumye inama isubikwa ikimurirwa kuwa 10-12 Gicurasi 2017, ariko insanganyamatsiko ntihinduke.

Yagize ati“Dukora inama kuko hari ibyo twifuza kugeraho, kuba tutababonye ntabwo twari kubigeraho niyo mpamvu twabishyize ikindi gihe kizafasha abandi kuboneka.”

Inama ya Transform Africa ni umwanya mwiza abazayitabira bazasangira ubunararibonye, bakaganira ku ikoranabuhanga rigezweho mu guteza imbere ubukungu n’imibereho bya Afurika haherewe ku mijyi.

Biteganyijwe ko izakira abantu bari hagati ya 2000 na 3000 baturutse mu bihugu birenge 125. Abakuru b’ibihugu barimo Perezida Paul Kagame, Yoweli Kaguta Museveni, Uhuru Kenyatta, Ali Bongo Ondimba, Idriss Deby Itno, Salva Kiir, Macky Sall, Houlin Zhao Umuyobozi wa ITU n’abandi.

Izanitabirwa n’Abaminisitiri bashinzwe ikoranabuhanga, abashoramari, abayobozi b’imijyi yose yo muri Afurika, ba rwiyemezamirimo n’abandi bafite aho bahuriye n’ishoramari n’ikoranabuhanga.

Umuyobozi mukuru ushinzwe ikoranabuhanga no guhanga udushya muri Smart Africa, Didier Nkurikiyimfura

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE