Imyumvire ishingiye ku muco, urucantege ku bagore b’abanyamakuru n’abifuza kuba bo

Yanditswe na Emma-Marie Umurerwa
Kuya 3 Gicurasi 2018 saa 05:34
Yasuwe :
0 0

Itangazamakuru ni umwe mu myuga ikomeye ifatiye igihugu akamaro kandi igirwamo uruhare n’abantu b’ingeri zose, gusa mu Rwanda hari ikibazo cy’uko ubwitabire bw’abagore muri ubu butegetsi bwa kane bukiri hasi ugereranyije n’abagabo.

Imibare igaragaza ko abagore bakora umwuga w’itangazamakuru mu Rwanda ari bake ugereranyije n’abagabo, dore ko mu banyamakuru 800 bafite ikarita y’uyu mwuga itangwa n’Urwego rw’Abanyamakuru bigenzura, RMC, abagore ari 198 nubwo bitabujije ko hashobora kuba hari abandi bake bawukora batayifite.

Kuri bamwe, nyirabayazana w’ubu buke ni igifatwa nk’amananiza no gusuzugurwa mu kazi aho abagore baba babwirwa ko badashoboye, imyumvire ishingiye ku muco n’ibindi.

Muri Kaminuza y’u Rwanda nk’imwe mu zigisha itangazamakuru umubare w’abanyeshuri b’igitsina gore uracyari hasi ugereranyije n’abagabo.

Umwarimu muri Kaminuza y’u Rwanda mu Ishami ry’Itangazamakuru akaba n’umwe bakoze bakanayobora ibitangazamakuru bitandukanye, Dr Kayumba Christophe, yabwiye IGIHE ko ab’igitsina gore biga itangazamakuru bagaragaza ubushake buke bwo kurikora iyo bageze mu mwaka wa kane.

Ati “Iyo bageze mu mwaka wa gatatu bagiye gukora guhitamo [specialization] kuko twigisha itangazamakuru n’itumanaho, bamaze kubona imiterere y’itangazamakuru, ukuntu itangazamakuru rihemba, akenshi abanyeshuri b’abakobwa iyo bagiye gutoranya bajya mu bintu by’itumanaho. Baza gutangira kwiga babikunze, ariko bamara kubona ukuntu itangazamakuru riteye, ukuntu abanyamakuru bahembwa, ukuntu bafatwa abenshi bajya mu by’itumanaho.”

Dr Kayumba asobanura ko nko mu mwaka wa mbere wa Kaminuza mu biga itangazamakuru n’itumanaho, abangana na 35% ari abakobwa ariko ko ari ari bake ugereranyije n’imyaka yashize aho babaga ari nka 40%.

Nk’inararibonye mu itangazamakuru, Dr Kayumba yavuze ko mu bitangazamakuru byinshi usanga abakobwa aribo bakora ibintu bifatwa nk’ibyoroheje bitewe n’imiyoborere biba bifite.

Ati “Nabaye umunyamakuru nyobora n’ibitangazamakuru bitandukanye, impamvu akenshi abanyamakuru b’abagore bakora inkuru zijyanye n’ubuzima cyangwa imibereho y’abana n’ingo, ibyo twakwita ko abantu babona ko bidakomeye ntibajye mu nkuru politiki n’ubukungu bifite igisobanuro ku buryo ibitangazamakuru biyobowe, ahenshi biyobowe n’abagabo.”

“Abagore cyangwa abakobwa b’abanyamakuru babaha inkuru z’ibyo batekereza ko bazi bafata nk’ibyoroheje. Kubera abo bagabo bakuriye mu muco bumva ko ibintu bikomeye nka politiki bidakorwa n’abagore, kandi uwo muco na none abo bakobwa n’abagore niwo bakuriramo. Ntabwo abagore b’abanyamakuru twavuga ko batanga umusaruro muke, ugiye no kureba abaririmo ni bake yego ariko ntibarushwa ubushobozi n’ab’abagabo ahubwo ni ukubera ibyo abayobozi babo bababwira gukora n’ibyo umuco wabo wabigishije.”

Uko abagore bari mu mwuga w’itangazamakuru babibona

Aisha Bonaventure Rutayisire amaze imyaka 14 ari umunyamakuru. Yakoze mu bitangazamakuru bitandukanye mu Rwanda, kuri ubu ni Umwanditsi Mukuru [Chief Editor] wa Radio ‘Voice of Africa’.

Yavuze ko abagore benshi batinya itangazamakuru ariko n’uritinyutse agacika intege bitewe no kubwirwa ko hari ibintu runaka adashobora gukora bigaharirwa abagabo.

Ati “Umugore atanga igitekerezo cy’inkuru ari bukore nko ku bukungu cyangwa kuri politiki ukumva baramubajije ngo ese ubwo urumva uyishobora cyangwa tuyihe umugabo. Abagore bakora itangazamakuru bacibwa intege n’abagabo babayobora babumvisha ko badashoboye.”

Aisha Bonaventure Rutayisire amaze imyaka 14 mu itangazamakuru

Rutayisire asaba abanyamakuru b’abagore kugaragaza ko bashoboye, igitekerezo cy’inkuru batanze bakagihagararaho kandi bagakoramo inkuru nziza.

Umuyobozi w’Ihuriro ry’Abanyarwandakazi bakora umwuga w’Itangazamakuru (ARFEM), Ingabire Egidie Bibio, avuga ko abagore bakora itangazamakuru bashoboye kandi ntacyo ab’abagabo bakora ngo kibananire.

Ati “Ikibazo gikomeye dufite ubu ni uko 99% by’abanditsi bakuru ari abagabo, bamwe bafite imyumvire yo kumva ko abagore bagomba gukora inkuru runaka, yego umugore ashobora kuba asanzwe afite inkuru yisangamo ariko ahawe amahirwe nta nkuru n’imwe atakora. Ikindi kandi nta nkuru yoroshye ibaho, ahubwo ni ukureba ngo izo nkuru bavuga ko zoroshye zirakenewe mu muryango Nyarwanda? Nta bushakashatsi abagore bazikora babanza gukora, zitanga uwuhe musaruro.”

Ingabire Egidie Bibio

Gusa nubwo hari abagaragaza ugutsikamirwa kw’abagore mu bitangazamakuru bigizwemo uruhare n’abagabo babiyobora, Umwanditsi Mukuru wa TV1 na Radio 1, Ngabirano Olivier, ashimangira ko abanyamakuru b’abagore benshi bitinya.

Ati “Nta na rimwe turaha igitekerezo umugabo ngo tucyambure umugore kandi yagaragaje ko ashobora kugikoramo inkuru. Ahubwo ikibazo gihari ni uko usanga akenshi abanyamakuru b’abagore bitinya, ibitekerezo bikomeye batinya kubitanga cyangwa yatanga igitekerezo gikomeye agasaba ko cyakorwa n’undi.”

Eric Utuje wa TV 10 we yavuze ko ‘umuntu utanze igitekerezo ni nawe uhabwa amahirwe yo kugikoramo inkuru’ keretse ngo iyo bigaragaye ko hari undi munyamakuru umurusha ubunararibonye muri icyo cyiciro.

Hari n’abavuga ko impamvu abagore ari bake mu itangazamkuru zishingiye ku kuba abenshi baba bashaka imirimo itavunanye kuko ngo usanga nko mu masomo y’ubunyamabanga [secretariat], baba bayarimo cyane kurusha ahandi.

RMC ibona ubusumbane hagati y’abagore n’abagabo bakora itangazamakuru

Umunyamabanga Nshingwabikorwa w’Urwego rw’Abanyamakuru bigenzura (RMC), Mugisha Emmanuel, yatangarije IGIHE ko mu Rwanda hari kibazo cy’ubusumbane bukabije hagati y’abagore n’abagabo bakora itangazamakuru.

Yagize ati “Raporo zitwereka ko hari ubusumbane bukabije hagati y’amakuru atarwa n’abigitsina gore hamwe n’atarwa n’abigitsina gabo. Ariko ntitwabura kuvuga ko abagore bari mu itangazamakuru umusanzu wabo ufite akamaro.”

Umuyobozi w’Ikigo cy’Igihugu cy’Itangazamakuru, RBA, Arthur Asiimwe avuga ko abagore bakora mu kigo ayoboye bashoboye kuko bafite ubumenyi bukenewe mu kazi bakora.

Hari ingamba zo guca ubu busumbane

Umuyobozi w’Inama Nkuru y’Igihugu y’Itangazamakuru, Peacemaker Mbungiramihigo, yavuze ko uru rwego ruzi ikibazo abagore bakora itangazamakuru bahura nacyo, ariko ngo ingamba zafashwe ziri gutanga umusaruro.

Ati “Hari ingamba z’igihe kirekire mu guteza imbere ubwuzuzanye bw’abagabo n’abagore mu itangazamakuru. Ubu tugeze ku mwaka wa gatanu tuzishyira mu bikorwa. Harimo gukangurira abashinze ibitangazamakuru n’ababiyobora kubahiriza ubwuzuzanye bw’abagore n’abagabo, abagore nabo bagahabwa umwanya ukwiye mu buyobozi no mu mashami atandukanye kuko nabo bafite ubushobozi.”

Mbungiramihigo yakomeje avuga ko banakoze ubukangurambaga ndetse n’amahugurwa ku bayobora ibitangazamakuru banahugura abagore bakora umwuga w’itangazamakuru.

Nyuma y’aho ngo abagore batangiye kuzamuka mu itangazamakuru aho guhera mu 2015 mu myaka ibiri yakurikiyeho abagera ku 10 bashinze ibitangazamakuru byabo.

RMC igaragaza ko abagore bakora umwuga w’itangazamakuru ari 198 mu banyamakuru 800. Muri aba 198 abagera kuri 93 ni abanyamuryango ba ARFEM. Ni mu gihe ubushakashatsi bwakozwe na RMC bugaragaza ko abagore bakora umwuga w’itangazamakuru bizerwa ku kigero cya 3.3% mu gihe abagabo bo bizerwa ku kigero cya 65%.

Ingabire Egidie Bibio (ibumoso) na Gloria Mukamabano bakora mu itangazamakuru
Ingabire Egidie Bibio ukora kuri Televiziyo y'u Rwanda (uwa kabiri iburyo) n'abatumirwa be mu kiganiro
Mu kiganiro cyahuje abanyamakuru na Minisitiri w'Ububanyi n'Amahanga w'u Rwanda, Louise Mushikiwabo, muri Werurwe 2018, Yolande Makolo yibajije impamvu cyagaragayemo umunyamakuru umwe w'igitsinagore

[email protected]


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza