Imyiteguro y’amatora y’Umukuru w’Igihugu mu 2017 irarimbanyije

Yanditswe na Philbert Girinema
Kuya 19 Nzeri 2016 saa 10:32
Yasuwe :
0 0

Komisiyo y’Igihugu y’Amatora (NEC) yatangiye imyiteguro y’amatora y’Umukuru w’Igihugu ateganyijwe mu mwaka utaha wa 2017, aho ibikoresho bizifashishwa ndetse no guhugura abazafasha mu migendekere myiza yayo birimbanyije.

Mu kiganiro IGIHE yagiranye n’Umunyamabanga Nshingwabikorwa wa Komisiyo y’Igihugu y’Amatora, Charles Munyaneza, yatangaje ko ibikorwa byatangiye mu rwego rwo kwitegura hakiri kare, kugira ngo abaturage bazagere igihe cyo gutora baramaze gusobanukirwa, bityo barusheho kwitabira.

Munyaneza yagize ati “Hari ibintu byinshi twatangiriyeho, mu cyumweru gishize twahuguye abafatanyabikorwa batandukanye ku rwego rw’igihugu, […] tubahugura ku myiteguro y’amatora, iby’ingenzi mu mategeko agenga amatora n’incamake ya gahunda y’amatora.”

Abahuguwe barimo abahagarariye imitwe ya Politiki yose uko ari 11, abahagarariye Imiryango itari iya Leta, abahagarariye inzego z’abagore, urubyiruko n’izindi nzego zihuza ibyiciro runaka by’abanyarwanda.

Ubwo havugururwaga Itegeko Nshinga, hari ingingo zavuguruwe zivuga ko hagomba kujyaho itegeko ry’amatora, dore ko ryari itegeko risanzwe ariko ubu rikaba ryarabaye ‘Itegeko Ngenga’ (Organic Law).

Ni muri urwo rwego rero iryo tegeko ry’amatora ririmo kuvugururwa hashingiwe ku biteganywa n’Itegeko Nshinga, bikaba birimo gukorwa ku bufatanye bwa NEC, Minisiteri y’Ubutegetsi bw’Igihugu na Komisiyo ishinzwe kuvugurura amategeko.

Usibye gutanga amahugurwa, Charles Munyaneza, yavuze n’ibikoresho na byo byatangiye gushakwa bikazakurikirwa no kuvugurura lisiti y’itora, dore ko buri mwaka hiyongeraho nibura abantu 200.000 hakanakurwaho ababa barapfuye cyangwa abo amategeko yambuye uburenganzira bwo gutora, ibyo bikazakorwa mu Ugushyingo uyu mwaka.

Amatora ashobora kuzaba umwaka utaha mu kwezi kwa munani (Kanama) ndetse ngo hagendewe ku gihe ay’ubushize yabereye (ku itariki ya 9 Kanama 2010), andi na yo ntazarenza ayo matariki, bivuze ko hasigaye hafi umwaka umwe umwaka umwe.

Nk’uko amategeko agenga amatora abiteganya, biramutse byemejwe ko amatora ya Perezida azaba muri Kanama 2017, abakandida bazamenyekana mbere y’uko ibikorwa byo kwiyamamaza bitangira muri Nyakanga 2017.

Biteganyijwe ko ingengo y’imari igenewe amatora y’Umukuru w’Igihugu mu 2017 ari miliyari 5.5 z’amafaranga y’u Rwanda, akaba yaragabanutseho miliyoni 500 ugereranyije n’ayakoreshejwe mu matora ya 2010, ariko na none yikuba birenze kabiri ku yakoreshejwe mu ya 2003 kuko yanganaga na miliyari 2.3 z’amafaranga y’u Rwanda.

Umunyamabanga Nshingwabikorwa wa Komisiyo y’Igihugu y’Amatora, Charles Munyaneza

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza


Warning: mysqli_query(): (HY000/1194): Table 'spip_jobs' is marked as crashed and should be repaired in /home/lex94/public_html/ecrire/req/mysql.php on line 244