Kwamamaza

Impunzi zo mu nkambi ya Kigeme zatekewe umutwe zibwa asaga Miliyoni ebyiri

Yanditswe kuya 6-10-2016 saa 09:33' na Prudence Kwizera


Impunzi 69 z’Abanye-Congo zicumbikiwe mu Nkambi ya Kigeme iherereye mu Karere ka Nyamagabe, ziravuga ko zibwe amafaranga miliyoni ebyiri zigenerwa n’Ishami ry’Umuryango w’Abibumbye ryita ku biribwa, PAM, asimbura ibiribwa bahabwaga buri kwezi.

Izi mpunzi zivuga ko ayo mafaranga yatwawe n’abakozi babiri bari bashinzwe kubafasha kuyabikuza kuri telefone, none ngo biri kubagiraho ingaruka mbi mu mibereho yabo, kuko ari yo yari abatunze kuko bayahabwa mu mwanya w’ibiribwa.

Beatrice Akobaririmba ati “Abo bayatubikurizaga baratubwiye ngo reka bayohereze kuri telefone zabo maze bajye kuyatuzanira kuri banki, guhera ubwo bahise bagenda ntibagaruka, nibwo twahise tubimenyesha abayobozi b’inkambi na HCR na Midimar ndetse na PAM irabizi.”

Akomeza ati “Kuri telefone yanjye hanyuragaho amafaranga y’imiryango itanu, bantwaye ibihumbi 283, ku buryo ubu tubayeho nabi abana bari kuburara, kandi n’iyo miryango nabikurizaga ntabwo tubanye neza.”

Abavuga ko bibwe ayo mafaranga baganiriye na IGIHE, bavuga ko bagejeje ikibazo cyabo ku nzego zibareberera zirimo Midimar na HCR, maze abo babibye bafatwa na Polisi barafungwa, ariko nyuma ngo baje gutungurwa no kubona umwe yararekuwe.

Bamwe muri izi mpunzi bashinja Midimar kurangarana ikibazo cyabo ntikitabweho kandi bababaye, bityo bakifuza ko ubuyobozi bwabafasha gukurikirana bagasubizwa amafaranga yabo.

Bati “Icyo kibazo kizwi muri HCR no muri PAM ndetse na Midimar n’ubuyobozi bwa hano mu nkambi burakizi, ariko ni uko butagiha agaciro. Nk’ubu Minisitiri yaje hano ariko batwangiye ko tumugezaho ibibazo dufite.”

Midimar yagaragaje aho ikibazo kigeze gikurikiranwa

Umunyamabanga uhoraho muri Midimar, Antoine Ruvebana, mu kiganiro yagiranye na IGIHE, yasobanuye ko icyo kibazo bakizi kandi abakekwaho gutwara amafaranga batawe muri yombi na Polisi y’Igihugu, kuri ubu bakaba bari mu butabera ngo babiryozwe.

Ruvebana yavuze ko impunzi zisanzwe zihabwa amafaranga buri kwezi yo guhahisha akanyuzwa kuri telefone zabo, bityo ngo miliyoni ebyiri z’abantu 69 zari zigenewe ukwezi kwa munani nizo zibwe n’abo bakozi.

Ati “Haje kubaho ikintu cyo kwizerana cyane hagati y’impunzi n’abantu (agents) bagomba kubabikuriza, bakaboherereza amafaranga bakababwira ko bagiye kuyabazanira, kandi si ko byakagombye kuko baza mu nkambi amafaranga bayazanye, bagombye guhita bayabaha bagahererekanya. Uko kwizerana ni ko kwateje ibibazo, ni uko byaje kugenda haza kuzamo ubuhemu.”

Avuga ko aba Agents bakora akazi ko gufasha impunzi kubikuza amafaranga ziba zohererejwe, ari abakozi ba banki zikorana n’Ishami ry’Umuryango w’Abibumbye ryita ku biribwa, PAM.

Ati “Polisi yaje kubafata barafungwa bashyikirizwa ubushinjacyaha, umwe aza gufungurwa kubera ko habuze ibimenyetso, ariko undi we aracyafunzwe, biracyari mu bucamanza buri kubikurikirana.”

Yakomeje avuga ko impunzi zibwe amafaranga zikwiye kwihangana ubutabera bugakora akazi kabwo, kandi hari icyizere ko abakoze uburiganya bazabiryozwa, abibwe bagasubizwa amafaranga yabo.

Ruvebana yibukije impunzi ko amafaranga zohererezwa na PAM, mu gihe cyo kuyabikuza zigomba kujya ku mukozi ubishinzwe nawe agahita abaha amafaranga mu ntoki nkuko bisanzwe bigenda iyo umuntu abikuza amafaranga kuri konti ye iba muri telefone igendanwa.

Yabibukije ko nta mu Agent bagomba kwizera ngo bamwoherereze amafaranga yabo ababwira ko hari ahandi agiye kuyabazanira, kandi ko bagomba kujya bagira amakenga ntibapfe kwizera umuntu babonye wese mu rwego rwo kwirinda abatekamutwe.

Inkambi ya Kigeme icumbikiye impunzi z’Abanye-Congo zisaga ibihumbi 20, abenshi akaba ari urubyiruko n’abagore.

Bamwe muri izo mpunzi basaba ko basubizwa amafaranga bibwe kuko babayeho nabi
Inkambi ya Kigeme icumbikiye impunzi z'Abanye-Congo ibihumbi 20

[email protected]


Kwamamaza

Kwamamaza
IZINDI NKURU WASOMA
TANGA IGITEKEREZO

ANDIKA ICYO UTEKEREZA KURI IYI NKURU

AMATEGEKO AGENGA IYANDIKA RY'IGITEKEREZO CYAWE:
Witandukira kubijyanye n'iyi nkuru; wikwandika ibisebanya, ibyamamaza cyangwa bivangura; wikwandika ibiteye isoni,
Wifuza kubona byihuse ibivugwa/ibisubizo ku gitekerezo cyawe, andika email yawe ahabugenewe.
Igitekerezo cyawe kigaragara nyuma y'isuzuma rikorwa na IGIHE.com
Ibi bidakurikijwe igitekerezo cyanyu gishobora kutagaragara hano cyangwa kigasibwa, Murakoze!
ANDIKA ICYO UTEKEREZA KURI IYI NKURU
Kwamamaza
IBITEKEREZO
Join Us

Socialize with Us
Contacts

Marketing
4546
Editor
078 827 26 21
Management
0788 74 29 08 / 0788 49 69 15

Emails: [email protected], [email protected]

Website Developped by

Uru Rubuga Ruheruka Gushyirwaho Amakuru Friday 9 Ukuboza 2016
Copyright © 2009 -2014 - IGIHE Ltd - All Rights Reserved