Impunzi z’Abarundi zanze kurya ibiribwa zahawe zasabwe kwisubiraho

Yanditswe na Evariste Nsengimana
Kuya 13 Werurwe 2018 saa 10:39
Yasuwe :
0 0

Impunzi z’Abarundi zisaga 2500 zinjiye ku butaka bw’u Rwanda zivuye muri Repubulika Iharanira Demokarasi ya Congo mu cyumweru gishize, zikomeje gutera impungenge nyuma y’aho zigaragaje imyitwarire itamenyerewe, irimo kwanga ibiryo byo mu nganda.

Izi mpunzi zinjiye mu Rwanda ku gicamunsi cyo ku wa 6 Werurwe 2018, zinjiriye ku mupaka wa Bugarama, Akarere ka Rusizi, zifite imyitwarire idasanzwe, irimo kwanga ibiribwa byo mu nganda, kwanga kuvurwa n’umuganga ubonetse wese uretse abo bazanye, nta mwana wazo zemera ko akingirwa, zanze kurya amavuta, umunyu, isukari n’ibindi.

Minisitiri ushinzwe gukumira ibiza no gucyura impunzi (MIDIMAR), De Bonheur Jeanne D’Arc na Minisitiri w’Ubuzima, Dr Diane Gashumba, bagiye kuganiriza izi mpunzi ku wa 12 Werurwe 2018 mu nkambi y’agateganyo ya Nyarushishi, bazisaba kubaha amategeko y’u Rwanda, hagakumirwa uburyo bwose zishobora kwanduzanya cyangwa kwanduza abandi zaje zisanga.

Ubwo zasurwaga, abayobozi basanze ziri mu masengesho zikora buri tariki ya 12 za buri kwezi, zanga no kubatega amatwi, zikomereza amasengesho zakoraga zifite n’amashapure.

Minisitiri De Bonheur yagize ati “Twabonye ko ari ikibazo niyo mpamvu twaje kubaganiriza kuko bafite imyemerere idasazwe tutabahora ariko ntabwo twakwemera ko ituma ubuzima bwabo buhungabana. Haracyariho ibiganiro ntiwahita ufata umwanzuro. Biyumviye aho duhagaze, twe duhagaze ku mategeko y’igihugu kandi agomba kubahirizwa. Twabasobanuriye ko batari ku kirwa cya bonyine, niba baje mu gihugu, baje kubana n’Abanyarwanda ntitwakwishimira ko niba bafite indwara bazibanduza cyangwa bazanduzanya hagati yabo.”

Yakomeje avuga ko ibyo biganiro aribyo bizatanga umwanzuro niba u Rwanda rushobora kubakira.

Ati “Ndumva bifite umurongo, ntabwo nahita mvuga ngo ntibiri buhite bigera aho twifuza. Ndatekereza ko biri buduhe umurongo mwiza wo kugira ngo tube twabakira bagize ibyo bemera twumvikanaho.”

Umuyobozi w’izo mpunzi, Nyandwi Dionise, yabwiye TV1 ko ibyo basabwe bigoye kubyubahiriza ariko ko bazagerageza.

Yagize ati “Ibyo babasabye sinavuga ngo birashoboka cyangwa ntibishoboka ntarabikora. Reka mbanze mbikore ariko ku bwanjye ndumva bigoye”

MIDIMAR ivuga ko inkambi ya Nyarushishi zicumbitsemo ifite ubushobozi bwo gucumbikira izisaga 600 ndetse ko itaganya kuzimurira mu yindi.

Impunzi z’Abarundi zavuye muri RDC ziza mu Rwanda ari ikivunge

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza