Impunzi z’Abarundi n’Abanye-Congo zongeye guhabwa inkwi nyuma y’amezi atatu

Yanditswe na Emma-Marie Umurerwa
Kuya 17 Nzeri 2018 saa 02:33
Yasuwe :
0 0

Impunzi z’Abarundi ziba mu nkambi ya Mahama mu Karere ka Kirehe n’iz’Abanye-Congo ziba mu nkambi ya Gihembe mu Karere ka Gicumbi, zahawe ibicanwa nyuma y’uko zari zigiye kumara amezi atatu zidahabwa inkwi.

Buri kwezi impunzi ziri mu nkambi zitandukanye zo mu Rwanda zihabwa inkwi, ariko siko byagenze ku ziba mu nkambi za Gihembe mu Karere ka Gicumbi n’iziba mu ya Mahama mu Karere ka Kirehe, kuko amezi atatu yari yihiritse zibeshejweho no gutashya hirya no hino.

Ku wa 10 Nzeri nibwo IGIHE yatangakje inkuru y’izi mpunzi zivuga ko zihangayikishijwe cyane n’uko zitagihabwa inkwi, zigasaba Leta y’u Rwanda kuko bamwe bavugaga ko hari n’igihe bicwa n’inzara kubera kubura ibicanwa.

Icyo gihe Umuyobozi ushinzwe impunzi muri MIDIMAR, Rwahama Jean Claude, yabwiye IGIHE ko ikibazo cy’izi mpunzi bakizi kandi bari gukora ibishoboka byose ngo zongere zihabwe inkwi nk’uko bisanzwe.

Mu gitondo cyo kuri uyu wa Mbere, Rwahama yavuze ko inkwi zatangiye kugezwa mu nkambi.

Ati “Hari inkwi nkeya twari dufite mu Karere ka Bugesera mu cyumweru gishize nibwo twatangiye kuzigeza mu nkambi ya Gihembe ku buryo ubu nta kibazo cy’inkwi bafite.’’

Yakomeje avuga ko kuri uyu wa kabiri, mu nkambi ya Mahama naho hatangira kugezwa inkwi.

Ati “Turateganya kujyana amasiteri 13500 mu nkambi ya Mahama guhera ejo, inkwi twazibonye mu Karere ka Nyamagabe. Kubera ko harimo urugendo rurerure, tuzafatanya na HCR kugirango inkwi zigere mu nkambi.’’

Akomeza avuga babonye rwiyemezamirimo ushoboye wasimbuye uwari ufite isoko mbere washeshe amasezerano, bakaba bizeye ko ikibazo cy’inkwi mu nkambi kigiye gukemuka.

Mu Rwanda hari inkambi z’impunzi zigera kuri esheshatu, zirimo iya Mahama icumbikiye impunzi 57,627, iya Kigeme icumbikiye Abanye-Congo bagera mu bihumbi 20.

Hari iya Kiziba muri Karongi icumbikiye impunzi 17,120; iya Nyabiheke ifite 14,554, iya Gihembe ifite impunzi 13,304 n’iya Mugombwa icumbikiye impunzi 9,205.

Hari n’impunzi zahisemo kwibera mu mijyi; nko mu Mujyi wa Kigali habamo 11,460 naho uwa Huye ukabamo 773. Inyinshi muri zo ni Abarundi.

Inkuru wasoma: Impunzi zo mu nkambi ya Mahama na Gihembe zimaze amezi atatu zidahabwa inkwi

Impunzi zo mu nkambi ya Mahama zari zifite ikibazo cy’ibicanwa

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza