Kwamamaza

Impunzi z’Abanyarwanda zitahutse zizajya zihabwa telefoni zigendanwa

Yanditswe kuya 19-11-2016 saa 06:01' na Sitio Ndoli


Minisiteri ishinzwe gukumira Ibiza no gucyura Impunzi yatangije gahunda yo guha impunzi z’Abanyarwanda zitahutse telefoni zigendanwa mu rwego rwo kubigisha ikoranabuhanga no kubafasha kumenyesha bagenzi babo basize hanze ko mu Rwanda ari amahoro.

Minisitiri Ushinzwe Imicungire y’Impunzi n’Ibiza, Mukantabana Seraphine yabitangaje ubwo yafunguraga ku mugaragaro inkambi yakira impunzi by’agateganyo ya Nyarushishi mu Karere ka Rusizi, kuri uyu wa Gatanu tariki ya 18 Ugushyingo 2016.

Yavuze ko “Igikorwa cyo gutanga telefoni ku mpunzi ni ubwa mbere gikozwe, kandi kizagera kuri zose zitahuka, n’abatahutse kuva tariki ya 1 Ukwakira uyu mwaka, tuzazibagereza ku misozi aho batashye. Ziriya telefoni tuzibaye kugira ngo binjire mu buryo bw’ikoranabuhanga ariko banashobore no gukomeza kuvugana nabo basize kugira ngo babakangurire gutaha.”

Minisitiri Mukantabana yakomeje avuga ko izi telefoni zizabafasha no kohererezwa amafaranga y’imfashanyo bagenerwa binyuze mu ikoranabuhanga.

Abanyarwanda 30 bakiriwe bwa mbere muri iyo nkambi ku wa Kane, tariki ya 17 Ugushyingo 2016, bavuga ko telefoni bahawe zizabafasha kuvugana n’imiryango yabo n’inshuti zabo basigaye muri Repubulika Iharanira Demokarasi ya congo.

Hakizimana Edouard yagize ati “Ntabwo nari nzi telefoni, nzajya mpamagara abayimpaye n’abasigaye hanze, ndetse no gukora gahunda zizamfasha kwegera abandi mu iterambere.”

Nyirabazimenyera Gorette yasabye ko ubuyobozi bwabafasha kubigisha gukoresha telefoni kugira ngo bashyire mu bikorwa ibyo biyemeje.

Ati “Telefoni muzazitwigisha, tuvugane n’inshuti ndetse n’abaziduhaye, ikindi kandi zizadufasha gukangurira bagenzi bacu dusize mu mashyamba gutahuka.”

Inkambi y’agateganyo ya Nyarushishi igizwe n’ibyumba bitandatu birimo amacumbi, ivuriro, ibikoni, aho bakirira abana n’ibindi; ifite ubushobozi bwo kwakira impunzi 700 ku munsi.

Iyi nkambi isimbuye iya Nyagatare yari isanzwe yakira impunzi, yuzuye itwaye amafaranga y’u Rwanda angana na miliyoni 591 n’ibihumbi 797 755, yubatswe ku bufatanye bw’Umuryango w’Abibumbye wita ku Mpunzi,UNHCR, ufatanyije na Minisiteri ishinzwe gukumira Ibiza no gucyura Impunzi (MIDIMAR) n’Umuryango utegamiye kuri Leta ADRA.

Minisitiri Ushinzwe Imicungire y’Impunzi n’Ibiza, Mukantabana Seraphine, atangiza ku mugaragaro ibikorwa byo guha telefoni impunzi z'Abanyarwanda zivuye hanze y'Igihugu
Minisitiri Mukantabana Seraphine n'abandi bayobozi basura ibice bigize inkambi nshya ya Nyarushishi
Inkambi ya Nyarushishi igizwe n'inyubako zigezweho
Amacumbi impunzi zizajya ziraramo mbere yo gusubira mu miryango yazo

[email protected]


Kwamamaza

Kwamamaza
IZINDI NKURU WASOMA
TANGA IGITEKEREZO

ANDIKA ICYO UTEKEREZA KURI IYI NKURU

AMATEGEKO AGENGA IYANDIKA RY'IGITEKEREZO CYAWE:
Witandukira kubijyanye n'iyi nkuru; wikwandika ibisebanya, ibyamamaza cyangwa bivangura; wikwandika ibiteye isoni,
Wifuza kubona byihuse ibivugwa/ibisubizo ku gitekerezo cyawe, andika email yawe ahabugenewe.
Igitekerezo cyawe kigaragara nyuma y'isuzuma rikorwa na IGIHE.com
Ibi bidakurikijwe igitekerezo cyanyu gishobora kutagaragara hano cyangwa kigasibwa, Murakoze!
ANDIKA ICYO UTEKEREZA KURI IYI NKURU
Kwamamaza
IBITEKEREZO
Join Us

Socialize with Us
Contacts

Marketing
4546
Editor
078 827 26 21
Management
0788 74 29 08 / 0788 49 69 15

Emails: [email protected], [email protected]

Website Developped by

Uru Rubuga Ruheruka Gushyirwaho Amakuru Saturday 10 Ukuboza 2016
Copyright © 2009 -2014 - IGIHE Ltd - All Rights Reserved