Kwamamaza

Impunzi z’abanyarwanda ziba muri Congo zirakangurirwa gutaha

Yanditswe kuya 9-09-2016 saa 12:35' na Jean Pierre Tuyisenge


Abanyarwanda bamaze imyaka irenga 20 muri Congo Brazzaville baragirwa inama yo gutaha mbere y’uko ubufasha n’amahirwe bashyiriweho na Leta y’u Rwanda bihagarara kuko ngo icyo bahunze kitagihari.

Ibi byavugiwe mu nama y’iminsi ibiri yabereye muri Congo kuva ku wa 8 kugeza ku wa 9 Nzeri 2016, ihuje abahagarariye Leta y’u Rwanda, Ishami ry’Umuryango w’Abibumbye rishinzwe impunzi UNHCR na Leta ya Congo yigaga ku kigomba gukorerwa impunzi z’abanywarwanda ziba muri icyo gihugu zitari gutaha ku bushake.

Ibiro Ntaramakuru muri Afurika yo hagati (ADIAC) bitangaza ko abanyarwanda baba muri Congo batakibona imfashanyo iyo ari yo yose kuva hatangazwa ko impunzi z’abanyarwanda zahunze kuva 1959 kugeza 1998 zakuriweho Sitati y’ubuhunzi kuva mu mwaka wa 2013.

Ishami ry’Umuryango w’Abibumbye ryita ku mpunzi, UNHCR ryemeza ko mu Rwanda hari amahoro, umutekano, n’urubuga rwa politiki kuri buri wese ndetse ko nta cyatuma abantu bahunga kigihari.

Minisitiri ushinzwe gucyura impunzi no gukumira Ibiza mu Rwanda, Séraphine Mukantabana, yahamagariye impunzi gutaha ku bushake, avuga ko mu Rwanda nta bibazo bya politiki cyagwa by’ubukungu bigihari.

Izi mpande zose zatumiwe muri iyi nama hagamijwe kumvikana ku ngamba zo gushyira mu bikorwa ihagarikwa rya Sitati y’ubuhunzi ryashiriweho impunzi z’abanyarwanda.

Bavuze ko hakwiye kurebwa ingingo eshatu zirimo gushaka uburyo impunzi ziri muri icyo gihugu zasubizwa mu Rwanda ku bushake, gusaba ibyangombwa byo kuguma muri ibyo bihugu, cyangwa gufashwa gutaha ku bantu badafite ubushobozi. Gusa nkuko bitangazwa na Minisitri Séraphine Mukantabana, u Rwanda ngo rusanzwe rufasha abashaka gutaha.

Ishami ry’Umuryango w’Abibumbye ryita ku mpunzi rivuga ko mu mpunzi 12,000 babaga muri Congo 445 bonyine aribo babashije gutahuka hagati y’umwaka wa 2004 na 2015. Naho mu mwaka wa 2016 abantu 7 ni bo babashije gutahuka.

Uharariye UNHCR muri Congo, Cyr Modeste Kouamé yavuze ko hakwiye ubukangurambaga bugamije gushishikariza abantu gutaha ku bushake kuko ngo mu gihe ibi bizaba bidakozwe ngo impunzi zizakomeza kuguma muri iki gihugu.

Ingingo 1 y’amasezerano y’i Genève ivuga ko mu gihe icyatumwe abantu bahunga kirangiye, abo bantu baba bagomba guhita basubira mu gihugu bakomotsemo.

Mukantabana Séraphine avuga ko u Rwanda ruzakomeza gufasha impunzi z’abanyarwanda gutaha mu buryo bwose bashaka ndetse no gukorana n’ibihugu izi mpunzi ziherereyemo mu rwego rwo kubafasha kubona ibyangombwa by’u Rwanda ku bazaba bahisemo kuguma muri ibyo bihugu.

Ubwo yari mu karere ka Bugesera ku itariki 16 Kanama 2016 hatahwa amazu yubakiwe abatahutse baturutse mu bihugu bitandukanye, Minisitiri Mukantabana yavuze ko hari igihe kizagera inkunga yagenerwaga abashaka gutaha igahagarara.

Minisitiri Mukantabana (ibumoso), abo ku ruhande rwa Congo Brazzaville ndetse na ONU mu nama yo gushaka uko impunzi z'abanyarwanda batahuka

Kwamamaza
IZINDI NKURU WASOMA
TANGA IGITEKEREZO

ANDIKA ICYO UTEKEREZA KURI IYI NKURU

AMATEGEKO AGENGA IYANDIKA RY'IGITEKEREZO CYAWE:
Witandukira kubijyanye n'iyi nkuru; wikwandika ibisebanya, ibyamamaza cyangwa bivangura; wikwandika ibiteye isoni,
Wifuza kubona byihuse ibivugwa/ibisubizo ku gitekerezo cyawe, andika email yawe ahabugenewe.
Igitekerezo cyawe kigaragara nyuma y'isuzuma rikorwa na IGIHE.com
Ibi bidakurikijwe igitekerezo cyanyu gishobora kutagaragara hano cyangwa kigasibwa, Murakoze!
ANDIKA ICYO UTEKEREZA KURI IYI NKURU
Kwamamaza
IBITEKEREZO
Join Us

Socialize with Us
Contacts

Marketing
4546
Editor
078 827 26 21
Management
0788 74 29 08 / 0788 49 69 15

Emails: [email protected], [email protected]

Website Developped by

Uru Rubuga Ruheruka Gushyirwaho Amakuru Thursday 29 Nzeri 2016
Copyright © 2009 -2014 - IGIHE Ltd - All Rights Reserved