Kwamamaza

Impungenge za Gen. Rutaha ku bahungabanya umutekano bitwikiriye ubuzunguzayi

Yanditswe kuya 30-08-2016 saa 16:10' na Ntakirutimana Deus


“Mwibaze haje abacengezi bafite amapantalo 20, abacengezi 20 buri muntu afite ipantalo azenguruka mu mujyi wa Kigali, ashaka aho aza gutera geranade twamubwirwa n’iki? Mwibaze haje ukora ibikorwa by’iterabwoba agamije kwica abantu yikoreye imiguru itatu y’inkweto!”

Izo ni impungenge zikomeye zibazwa n’abantu batandukanye zagarutsweho n’Umuyobozi wa Brigade ya 204 ikorera mu Mujyi wa Kigali, Brig. Gen. Denis Rutaha mu nteko rusange y’umujyi wa Kigali.

Yavuze ko ikibazo cy’abakora ubucuruzi butemewe kibonwa mu ndorerwamo z’ubushomeri bakennye bashaka kwiteza imbere, ariko ko hihishemo n’icy’ibindi bifitanye isano no guhungabanya umutekano.

Abazunguzayi ngo bagiye bafashwa mu buryo butandukanye bamwe baremerwa, abandi bubakirwa amasoko yo gukoreramo, ni muri urwo rwego abahawe imyanya bagomba kuyikoreramo hirindwa abashobora kubwitwitikira bakaba bakora ibara.

Ati “Mutekereze abantu nk’igihumbi baba bari i Nyabugogo ngo bose ni abazunguzayi tubaretse bakaguma hariya. Mbwira haramutse hivanzemo abandi bantu batanu cyangwa batandatu bagamije kwica Abanyarwanda, uburyo wabarobanura, byatugora cyane.”

Yongeyeho ko hashobora no kwihishamo abagamije gukora ibikorwa by’iterabwoba.
Ati “[...]Mwibaze haje ukora ibikorwa by’iterabwoba agamije kwica abantu yikoreye imiguru itatu y’inkweto.”

Mu bagenda bazengurukana ibicuruzwa byabo mu bice runaka, ngo hari abayitwaza bagamije kubona amakuru y’aho biba.

Rutaha ati “Buriya harimo abantu birirwa bakora iperereza ry’aho baza kwiba, ugasanga umuntu mu gace runaka yikoreye umuguru umwe w’inkweto akagenda ibirometero bitanu atagamije kugurisha, ahubwo awifashisha kugira ngo arebe aho aza kwiba, kugira ngo avugane na bo bakozi banyu noneho nijoro baze kubona ukuntu baza kwiba.”

Mu buhamya yatanze ngo yigeze kubona umwe mu batemberanaga umuguru umwe w’inkweto, amutumaho umusirikare yambaye imyenda y’abasivili, ariko wa muzunguzayi yanga kumugurisha izo nkweto yari afite.

Yongeyeho ati “Ku manywa ashobora kubona yuko byatuma amenyekana agahitamo kwitwaza ishati cyangwa ipantalo imwe kugira ngo byitwe ko ari umuzunguzayi ariko afite ibindi bibi cyane agamije.”

Buri wese ubishoboye ngo yagombye gufasha leta ikibazo cy’abo bazunguzayi kigakemuka, abahawe amasoko bakayakoreramo, abayakeneye nabo ngo bazagenda bayubakirwa, ariko n’ikibazo cyabo kigakomeza kureberwa mu ndorerwamo ebyiri.

Ku bashaka guhungabanya umutekano w’u Rwanda ngo inzego z’umutekano ziri maso, bigaragazwa n’abasirikare n’abapolisi baba bari ku muhanda, atari uko bakunda kuhaba ahubwo baba bacungira hafi umutekano w’u Rwanda, kuko u Rwanda rukikijwe n’abanzi ku buryo baruciye urwaho baruhungabanyiriza umutekano.

Mu rwego rwo gukemura ibibazo by’abazunguzayi, Umujyi wa Kigali wagiye ububakira amasoko aciriritse yo gukoreramo, azanakomeza kubakwa kugeza bose bavuye mu muhanda.

Umuyobozi wa Brigade ya 204 ikorera mu Mujyi wa Kigali, Brig. Gen. Denis Rutaha mu nteko rusange y’umujyi wa Kigali

Kwamamaza
IZINDI NKURU WASOMA
TANGA IGITEKEREZO

ANDIKA ICYO UTEKEREZA KURI IYI NKURU

AMATEGEKO AGENGA IYANDIKA RY'IGITEKEREZO CYAWE:
Witandukira kubijyanye n'iyi nkuru; wikwandika ibisebanya, ibyamamaza cyangwa bivangura; wikwandika ibiteye isoni,
Wifuza kubona byihuse ibivugwa/ibisubizo ku gitekerezo cyawe, andika email yawe ahabugenewe.
Igitekerezo cyawe kigaragara nyuma y'isuzuma rikorwa na IGIHE.com
Ibi bidakurikijwe igitekerezo cyanyu gishobora kutagaragara hano cyangwa kigasibwa, Murakoze!
ANDIKA ICYO UTEKEREZA KURI IYI NKURU
Kwamamaza
IBITEKEREZO
Join Us

Socialize with Us
Contacts

Marketing
4546
Editor
078 827 26 21
Management
0788 74 29 08 / 0788 49 69 15

Emails: [email protected], [email protected]

Website Developped by

Uru Rubuga Ruheruka Gushyirwaho Amakuru Sunday 25 September 2016
Copyright © 2009 -2014 - IGIHE Ltd - All Rights Reserved