Kwamamaza

Impungenge ku bashoferi batwara abantu barenze 30 batabifitiye uruhushya

Yanditswe kuya 31-08-2016 saa 11:42' na Ezechiel Mbananabo


Itegeko ryasohotse mu igazeti ya Leta N°12 ryo kuwa 23/03/2009 rishyiraho amabwiriza rusange agenga imihanda n’uburyo bwo kuyigendamo, rigaragaza ko umushoferi wemererwe gutwara abantu barenze 30 mu modoka asabwa kuba afite uruhushya rwo gutwara ibinyabiziga rwo mu rwego rwa D1 (Catégorie D1), ariko hari bamwe bakoresha imodoka nini zitwara abagenzi by’umwihariko mu Mujyi wa Kigali batarufite ahubwo bakoresha urwo mu rwego rwa D.

Bamwe mu bashoferi baganiriye na IGIHE batwara imodoka nini zitwara abantu bari munsi ya 70 cyangwa barenga muri sosiyete itwara abagenzi ya KBS, bose bemeza ko badafite uruhushya rwo gutwara ibinyabiziga ruri mu rwego rwa D1.

Umwe yagize ati “Hashize imyaka ibiri ntwara iyi modoka nkoresheje uruhushya rwo mu rwego rwa D kandi mbona nta kibazo kuko sosiyete dukorera yabanje kuduhugura amezi atatu ku gutwara izi modoka nini. Gusa ngiye gushaka uruhushya rwa D1.”

Undi nawe ati “Hashize nk’amezi atanu nkoresha uruhushya rwo mu rwego rwa D, ntabwo Polisi ikunda kudufata, icyakora hari umwe dukorana bigeze gufata. Ubu ndi gushakisha uburyo nayikorera, ndetse hashize n’iminsi mike niyandikishije.”

Icyo bose bahurizaho ni uko umubare w’abashoferi bafite D1 ukiri muto cyane, ariko ngo bagiye guhagurukira gushyaka urwo ruhushya.

Umubare w’imodoka nini zitwara abagenzi benshi ukomeza kwiyongera mu Mujyi wa Kigali mu rwego rwo guteza imbere ubwikorezi bw’abantu, kandi hakaba hakenewe ko zatwarwa n’abafite impushya zibibemerera nk’uko amategeko abiteganya.

Ubuke bw’abafite izi mpushya bukomeje gutera benshi impungenge z’uko hashobora kuvuka impanuka mu gihe imodoka nini zitwara abagenzi barenga 70 zaba zikomeje gutwarwa n’abadafite uruhushya rubibemerera, dore ko hari n’abazigendamo bahagaze.

Inshuro nyinshi usanga abantu batwara ’Coaster’ ari bo basigaye batwara imodoka nini cyane mu gihe batarabona uruhushya rwo mu rwego rwa D1 ahubwo bagikoresha D.

Icyakora abashoferi twaganiriye bavuze ko nta mpanuka ishobora guturuka ku kuba umuntu adafite urwo ruhushya, kandi ko nta n’iraba.

Umuvugizi wa Polisi ishami rishinzwe umutekano wo mu muhanda, CIP Emmnuel Kabanda, yavuze ko ku bagikoresha uruhushya ruri mu rwego rwa D mu gutwara izo modoka ari amakosa kandi ko nta muntu Polisi yigeze ibyemerera.

Yagize ati “Twebwe turabizi ko hari abantu batwara imodoka nini badafite D1 kimwe n’abandi bose batwara batabyemerewe, icyo tugiye gukora ni ukubishyiramo imbaraga bagahagurukirwa.”

Icyo sosiyete KBS itwara abagenzi ibivugaho

Umuyobozi Mukuru wa Sosiyete KBS itwara abagenzi mu Mujyi wa Kigali, Ngarambe Charles, yatangarije IGIHE ko kugeza ubu bafite imodoka 67 nini zishobora gutwara abantu barenga 70. Abashoferi batatu basimburana ku modoka imwe mu minsi ibiri.

Yemeje ko mu bashoferi bakoresha harimo abafite uruhushya rwo gutwara abagenzi rwo mu rwego rwa D1 n’abatarufite, ariko kugira ngo umushoferi yemererwe gutwara iyo modoka abanza guhugurwa ubundi agakoreshwa ibizamini byo kureba niba abishoboye.

Uko impushya zo gutwara ibinyabiziga zikurikirana

Uruhushya rwo gutwara ibinyabiziga rwerekana urwego cyangwa inzego z’ibinyabiziga.

Inzego z’ibinyabiziga zisabirwa uruhushya ni izi:

Urwego A : Amapikipiki n’ibinyamitende itatu bifite moteri biriho cyangwa bidafite intebe ku ruhande.

Urwego B: Imodoka zakorewe gutwara abantu kandi zifite imyanya umunani ntarengwa yo kwicarwamo hatabariwemo uw’umuyobozi w’ikinyabiziga.

Ibinyamitende ine bifite moteri.

Ku binyabiziga byo muri urwo rwego bashobora gushyiraho romoruki ntoya ifite umutambiko umwe.

Urwego C: Imodoka zagenewe gutwara ibintu bifite uburemere ntarengwa bwemewe burenga ibiro 5 000. Ku binyabiziga by’urwo rwego bashoboraga gushyiraho romoruki ntoya.

Urwego D: Imodoka zakorewe gutwara abantu kandi zifite imyanya irenga umunani yo kwicarwamo, hatabariwemo uw’umuyobozi.

Urwego D1: Imodoka zagenewe gutwara abantu kandi zifite imyanya irenga 30 yo kwicaramo hatabariwemo uw’uyitwaye.

Urwego E: Ibinyabiziga bikomatanye bifite ikinyabiziga gikurura kiri muri rumwe mu nzego B, C na D umuyobozi afitiye uruhushya kandi romoruki yabyo ikaba ifite uburemere ntarengwa bwemewe burenga ibiro 750.

Urwego F: Ibinyabiziga bidasanzwe (imashini zihinga, izikora imihanda n’iziterura ibintu biremereye.


Kwamamaza

Kwamamaza
IZINDI NKURU WASOMA
TANGA IGITEKEREZO

ANDIKA ICYO UTEKEREZA KURI IYI NKURU

AMATEGEKO AGENGA IYANDIKA RY'IGITEKEREZO CYAWE:
Witandukira kubijyanye n'iyi nkuru; wikwandika ibisebanya, ibyamamaza cyangwa bivangura; wikwandika ibiteye isoni,
Wifuza kubona byihuse ibivugwa/ibisubizo ku gitekerezo cyawe, andika email yawe ahabugenewe.
Igitekerezo cyawe kigaragara nyuma y'isuzuma rikorwa na IGIHE.com
Ibi bidakurikijwe igitekerezo cyanyu gishobora kutagaragara hano cyangwa kigasibwa, Murakoze!
ANDIKA ICYO UTEKEREZA KURI IYI NKURU
Kwamamaza
IBITEKEREZO
Join Us

Socialize with Us
Contacts

Marketing
4546
Editor
078 827 26 21
Management
0788 74 29 08 / 0788 49 69 15

Emails: [email protected], [email protected]

Website Developped by

Uru Rubuga Ruheruka Gushyirwaho Amakuru Thursday 8 Ukuboza 2016
Copyright © 2009 -2014 - IGIHE Ltd - All Rights Reserved