Kwamamaza

Impuguke mu isanamitima n’ubwiyunge zakuye isomo ku rwibutso rwa Jenoside ku Gisozi

Yanditswe kuya 9-11-2016 saa 21:25' na Rabbi Malo Umucunguzi


Itsinda ry’impuguke n’abashakashatsi kuri uyu wa Gatatu basuye urwibutso rwa Jenoside rwa Kigali ruri ku Gisozi, basobanurirwa amateka ya jenoside yakorewe abatutsi mu 1994, kuva ku itegurwa ryayo, uko yakozwe n’ingaruka yasigiye umuryango nyarwanda.

Aba bahanga n’abandi bafite gahunda mu bihugu byabo zijyanye no gufasha abantu gukira ibikomere byo ku mutima, imibanire myiza y’abantu n’ubwiyunge, bari mu Rwanda aho kuri uyu wa Kane tariki 10 Ugushyingo batangira inama mpuzamahanga y’iminsi ibiri ku isanamitima n’ubwiyunge.

Umuyobozi ushinzwe porogaramu z’Umuryango Never Again Rwanda, Eric Mahoro, yabwiye IGIHE ko bifuje kujyana n’iri tsinda ku rwibutso rwa Jenoside yakorewe abatutsi mu 1994, ngo bamenye uko yateguwe n’urugendo rw’u Rwanda mu kwiyubaka nyuma y’amahano ya Jenoside.

Ati “Tuba dushaka ko abantu baza hano bagasobanurirwa uko yateguwe, bagasobanukirwa uko yashyizwe mu bikorwa, zimwe mu ngaruka zayo, ariko n’ibindi bikorwa byakozwe na guverinoma n’abandi bafatanyabikorwa mu rwego rwo gukira ibikomere no kugera ku bwiyunge.”

Umunyamabanga Nshingwabikorwa w’Umuryango Action Pour la Paix et la Concorde wo muri Repubulika Iharanira Demokarasi ya Congo, Deogratias Buuma Bitalya, yavuze ko gusura urwibutso rwa Jenoside byerekana amateka nyakuri y’ububi bwayo, abantu bagafata ingamba ngo itazasubira kuko ikomeje kugira ingaruka ku karere k’ibiyaga bigari nubwo yahagaritswe.

Yavuze ko umuntu aba akeneye kubakwamo imitekerereze ihamye, ku buryo ikibaye cyose adashaka umuti mu burakari ahubwo akabanza kugira ibyo yibaza mbere yo kugira icyo akora.

Ati “Ntekereza ko Jenoside yabaye mu Rwanda n’ahandi ku Isi yagombye kuba igikorwa cya nyuma kimeze gityo mu mateka ya muntu ku Isi, kandi abantu bose bagashyira hamwe, bagahararanira ko ibintu nk’ibyo bitazasubira.’’

“Njye nturuka mu Burasirazuba bwa Congo, aho igice kinini cy’ingaruka za Jenoside yabaye mu Rwanda gikomeza kugaragara n’uyu munsi tuvugana. Abakoze Jenoside mu Rwanda baracyakomeza gukora byinshi mu bikorwa bijya gusa n’ibyabaye aha, ubwicanyi, gufata abagore n’abana ku ngufu, ubujura n’ubundi bugizi bwa nabi bwose, kugeza nubwo n’urubyiruko rwo muri utwo duce rutangiye gufata iyo migirire.’’

Hari byinshi bizigirwa mu nama

Impuguke zigera ku 120 zaturutse mu bihugu birimo u Rwanda, Uganda, Kenya, Cyprus, Repubulika ya Centrafrique, Sudani y’Epfo, u Bubiligi, Leta Zunze Ubumwe za Amerika, u Budage, kuri uyu wa Kane zizahurira mu nama ku isanamitima n’ubwuyiyunge (International conference on Healing and Social Cohesion).

Mahoro yakomeje agira ati “Igamije kungurana ibitekerezo ku buryo bukoreshwa mu komora ibikomere ndetse ikanarebera hamwe uruhare rw’abantu batandukanye baba abafatanyabikorwa na za leta ubwazo, ikazanareba izindi nsanganyamatsiko zihariye nk’uburyo Jenoside yagize ingaruka zihariye ku bagore.

Izanasuzuma imikoranire y’abakora mu isanamitima, kuko ubushakashatsi bwa Never Again mu 2014 bwagaragaje ko batagira urubuga ruhoraho bahuriramo ngo baganire ku byo bakora, imbogamizi n’ibyo bashobora gukora mu gihe kiri imbere.

Ubushakashatsi bwakozwe mu 2012 bwagaragaje ko ihungabana rishingiye ku mateka mabi Abanyarwanda baciyemo ryari kuri 26.1%, mu gihe kwiheba byari kuri 54%.

Mu bipimo bigaragaza uko ubwiyunge bwari buhagaze mu Rwanda mu 2015, 4.6% by’abaturage ntibarakira ibikomere basigiwe na Jenoside.

Bashyize indabo ahashyinguye inzirakarengane za Jenoside
Bunamiye inzirakarengane za Jenoside yakorewe Abatutsi
Bashenguwe n'agahinda bitegereza amafoto y'abishwe muri Jenoside yakorewe Abatutsi
Basobanuriwe amateka ya Jenoside intambwe ku yindi
Eric Mahoro ateze amatwi umukozi wasobanuraga uko Jenoside yakorewe Abatutsi yateguwe ikanashyirwa mu bikorwa

Kwamamaza

Kwamamaza
IZINDI NKURU WASOMA
TANGA IGITEKEREZO

ANDIKA ICYO UTEKEREZA KURI IYI NKURU

AMATEGEKO AGENGA IYANDIKA RY'IGITEKEREZO CYAWE:
Witandukira kubijyanye n'iyi nkuru; wikwandika ibisebanya, ibyamamaza cyangwa bivangura; wikwandika ibiteye isoni,
Wifuza kubona byihuse ibivugwa/ibisubizo ku gitekerezo cyawe, andika email yawe ahabugenewe.
Igitekerezo cyawe kigaragara nyuma y'isuzuma rikorwa na IGIHE.com
Ibi bidakurikijwe igitekerezo cyanyu gishobora kutagaragara hano cyangwa kigasibwa, Murakoze!
ANDIKA ICYO UTEKEREZA KURI IYI NKURU
Kwamamaza
IBITEKEREZO
Join Us

Socialize with Us
Contacts

Marketing
4546
Editor
078 827 26 21
Management
0788 74 29 08 / 0788 49 69 15

Emails: [email protected], [email protected]

Website Developped by

Uru Rubuga Ruheruka Gushyirwaho Amakuru Saturday 10 Ukuboza 2016
Copyright © 2009 -2014 - IGIHE Ltd - All Rights Reserved