Impanuro za Madamu Jeannette Kagame ku bana b’abakobwa bari munsi y’imyaka 18

Yanditswe na Cyprien Niyomwungeri
Kuya 10 Werurwe 2017 saa 07:05
Yasuwe :
0 0

Madamu Jeannette Kagame yabwiye abana b’abakobwa ko bagomba kumenya ibibazo bibugarije cyane cyane gutwita inda zitateganyijwe, abasaba kwirinda ababashuka bagamije kubangiriza ejo hazaza n’ah’igihugu muri rusange.

Mu muhango wo kwizihiza Umunsi Mpuzamahanga w’Umugore wabaye kuwa 8 Werurwe 2017, ku rwego rw’igihugu ukizihirizwa mu mudugudu wa Vunga, Umurenge wa Shyira, Akarere ka Nyabihu, byagaragaye ko nubwo Umunyarwandakazi hari intambwe amaze gutera, hakiri inzitizi zirimo kuba abana b’abakobwa batwita bari munsi y’imyaka 18.

Mu mpanuro yagejeje ku bitabiriye kwizihiza uwo munsi, Madamu Jeannette Kagame, yasabye abana b’abakobwa gusigasira agaciro Umunyarwandakazi yasubijwe n’ubuyobozi bwiza, bakirinda ababashuka bagamije kubangiriza ejo hazaza.

Yagize ati “Dukeneye ko mumenya ibibazo bibugarije, mutinyuke kubiganira n’ababyeyi banyu, kandi mwishakemo ibisubizo bibafasha guhangana na byo mutangije amahirwe y’ubuzima bwanyu. Mwirinde ababashuka bagamije kubangiriza ejo hazaza kuko ni mwe babyeyi bazahekera u Rwanda.”

Yanasabye ababyeyi gutoza abana bakiri bato ihame ry’uburinganire n’ubwuzuzanye hagati y’abagabo n’abagore no kwibutsa abahungu n’abakobwa ko bashoboye kandi bakwiye gutinyuka bagakoresha amahirwe bahabwa n’igihugu cyababyaye.

Umunsi mpuzamahanga w’umugore ni umwanya wo kuzirikana uruhare abagore bafite mu iterambere ry’igihugu, gusuzuma ibyagezweho no gufata ingamba zihamye zo kurushaho guteza imbere uburenganzira bwabo ngo bagere ku iterambere rirambye.

Madamu Jeannette Kagame yasabye ko mu mwaka umwe hari intambwe igomba kuba yatewe mu gushakira ibisubizo ibibazo bicyugarije umuryango birimo guterwa inda kw’abangavu bari munsi y’imyaka 18, imirire mibi, isuku nke n’amakimbirane mu miryango.

Madamu Jeannette Kagame ageza ijambo ku bari bitabiriye ibirori byo kwizihiza Umunsi w'Umugore mu Karere ka Nyabihu

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza