Impamvu zitiza umurindi igwingira ry’abana mu Rwanda

Yanditswe na Prudence Kwizera
Kuya 9 Nzeri 2018 saa 03:00
Yasuwe :
0 0

Abakozi bafite aho bahuriye no kurwanya imirire mibi n’igwingira ry’abana bo mu turere 13 ryiganjemo kurusha ahandi, bagaragaje bimwe mu bikomeje gutiza umurindi icyo kibazo n’ingamba zafatwa ngo kirangire.

Babivugiye mu nama nyunguranabitekerezo yabahuje na Minisiteri y’Uburinganire n’Iterambere ry’Umuryango (Migeprof) n’Ikigo cy’Igihugu cy’Ubuzima (RBC), igamije gutegura igenamigambi ry’umwaka wa 2018/2019 mu gukumira igwingira ry’abana.

Bimwe mu byagaragajwe bitera icyo kibazo harimo ababyeyi batonsa neza, abatazi gutegura indyo yuzuye, ababyara abo badashoboye kurera, abana bavuka ku bangavu batewe inda zitateguwe ntibitabweho, amakimbirane yo mu ngo, kudafatanya hagati y’abashakanye n’ibindi.

Muri buri karere haturutse abakozi umunani bahurira hamwe muri Huye aho bamaze iminsi itatu, kuva tariki ya 5 kugeza ku ya 7 Nzeri 2018, bungurana ibitekerezo ku cyakorwa ngo imirire mibi n’igwingira ry’abana byimwe icumbi mu Rwanda.

Umukozi ushinzwe imirire ku Bitaro bya Gahini mu Karere ka Kayonza, Nsekerabanzi François Xavier yavuze ko bafite abana bagera kuri 42% bagwingiye ariko biyemeje ko mu myaka itanu bazabagabanya bakagera kuri 30%.

Ati “Ahanini twasanze biterwa n’impamvu zitandukanye zirimo imyumvire ya bamwe mu babyeyi ikiri hasi ndetse no kuba dutuye mu Karere gakunda kuvamo izuba ryinshi ibiribwa ntibiboneke.”

“Icyo tugiye gukora ni ukwigisha ababyeyi no kubakangurira kwita ku nshingano zabo. Twiyemeje ko muri iyi myaka itanu tugiye gukorana na Banki y’Isi tuzagera kuri 30%”.

Umuyobozi ushinzwe ubuzima mu Karere ka Nyaruguru, Karemera Athanase, yagize ati “Hari ikibazo cy’ubwinshi bw’abana mu miryango, hakazamo kutita ku mwana buri gihe aho agomba kwitabwaho akiri mu nda ya nyina, avutse na nyuma yaho.”

“Hakazamo indwara zimwe na zimwe ziterwa n’umwanda kuko usanga zitera abana ibibazo byinshi by’imibereho, noneho hari n’ikindi kibazo cy’abangavu babyarira iwabo bagasigira abana ba nyirakuru ntibabone uko babitaho”.

Karemera avuga ko usibye kwigisha abaturage bagiye no kongera imbaraga mu kubasanga mu ngo bakaganira nabo kuko ubusanzwe babigishirizaga ku Bigo Nderabuzima gusa.

Umuyobozi ushinzwe imirire myiza n’isuku n’isukura mu kigo mbonezamikurire y’abana bato gikorera muri Minisiteri y’Uburinganire n’iterambere ry’Umuryango, Mucumbitsi Alexis, yavuze ko bari kwigira hamwe uko umwana yakwitabwaho ntahure n’imirire mibi.

Ati “Hari uturere dufite ibiryo ariko umwanya wo kwita ku mwana ukaba muke, aho niho dushaka gushyira imbaraga cyane kugira ngo umwana abone umwanya wo kwitabwaho n’ababyeyi bombi. Twahuye ngo duhuze imbaraga, ibikorwa birahari ariko hari aho imbaraga zari zitatanye.”

Mucumbitsi yavuze ko hazakomeza kongerwa imbaraga muri gahunda zo kwimakaza imirire myiza zirimo amarerero y’abana (ECD), n’igikoni cy’umudugudu hamwe n’izindi zo kurwanya ubukene nka Girinka na VUP ndetse no guhinga kijyambere.

Biyemeje ko nibashyira imbaraga mu kurwanya imirire mibi muri utwo turere 13, mu Rwanda hose igwingira ry’abana rizagabanukaho ½ rivuye kuri 38% ririho ubu.

Utwo turere 13 tugaragaramo abana bagwingiye ni Nyabihu, Ngororero, Karongi, Rubavu, Rutsiro, Rusizi, Nyamagabe, Huye, Nyaruguru, Ruhango, Gakenke, Kayonza na Bugesera.

Akarere gafite abana benshi bagwingiye ni Nyabihu, ku kigereranyo cya 59%.

[email protected]


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza