Kwamamaza

Jali:Imibiri ibihumbi 25 by’abazize Jenoside yashyinguwe mu rwibutso rushya

Yanditswe kuya 1-10-2016 saa 07:27' na Niyonsenga Schadrack


Imibiri y’abatutsi bazize Jenoside igera ku bihumbi 25 yashyinguwe kuri uyu wa 30 Nzeri mu Murenge wa Jali mu rwibutso rushya rwahubatswe.

Komisiyo y’Igihugu yo kurwanya Jenoside(CNLG) yasobanuye ko kuba abantu bakongera gushyingura imibiri y’abazize Jenoside mu gihe habonetse ubushobozi bidakwiye kwibazwaho byinshi kuko byose bikorwa mu rwego rwo gusubiza abazize Jenoside agaciro kabo bambuwe.

Umunyamabanga Nshingwabikorwa wa CNLG, Dr. Bizimana Jean Damascène yabitangaje ubwo hashyingurwaga imibiri ibihumbi 25 mu rwibutso rushya rwuzuye mu Murenge wa Jali mu karere ka Gasabo kuri uyu wa Gatanu, tariki 30 Nzeri 2016.

Dr. Bizimana yasobanuye ko iki gikorwa cyakozwe mu rwego rwo gushyingura neza iyi mibiri birenze uko byari bimeze , ibintu ngo binajyana n’ubushobozi bw’igihugu.

Yagize ati “Twari tumenyereye ko tugira gahunda zo kwibuka mu kwezi kwa Kane ariko uyu munsi by’umwihariko twaje mu gikorwa cyo kongera gushyingura, bivuze kongera no gukomeza guha agaciro abacu bazize Jenoside yakorewe Abatutsi mu 1994.”

Yakomeje agira ati “ Ni umunsi utoroheye benshi kuko kuza kongera gushyingura ni ikintu nziko kivuna imitima y’abantu benshi. Habaho igihe abantu banabifata nabi, mu by’ukuri na mbere aba bantu babaga barashyinguwe kandi mu bushobozi Leta yari ifite icyo gihe no mu bushobozi abacitse ku icumu bari bafite abantu bashyinguwe mu cyubahiro kuko murabizi ko Jenoside igihagarikwa ahantu hose abantu batambukaga hari huzuye imibiri, Leta rero yarageragezaga tukabashyingura mu cyubahiro mu bushobozi buke bwari buriho.”

Bamwe mu barokotse Jenoside bafite ababo bashyinguwe mu rwibutso rwa Jali, batangaza ko ari ibyo kwishimira cyane kuba ababo basubijwe agaciro bagashyingurwa mu cyubahiro, bakanashimira Ikigo cy’Igihugu gishinzwe gukwirakwiza Ingufu mu Rwanda (REG) ku bw’ubwitange cyagaragaje mu gusubiza izo nzirakarengane agaciro bubaka uru rwibutso.

Jenoside yakorewe Abatutsi mu Murenge wa Jali yahitanye benshi kuko muri aka gace hari ikigo cya Gisirikare cy’Abafaransa kikaba cyarakoreshejwe cyane mu iyicarubozo ryakorewe Abatutsi na bamwe mu basirikare ba FPR babaga bafatiwe ku rugamba mu rwego rwo kubashakamo amakuru.

Kuri uyu musozi haguye abatutsi bari baturutse mu Mirenge itandukanye nka Gatsata, Jabana n’ahandi kuko bari baje bizeye gutabarwa n’abasirikare bari mu kigo, ibi ngo byatumye interahamwe zibica kuko bari bahagarikiwe n’abasirikare kandi abicwaga bakaba bari bizanye.

Umuyobozi w’Umujyi wa Kigali Wungirije Ushinzwe Imibereho myiza y’Abaturage,Kazayire Judith, yasabye abatuye mu Murenge wa Jali gukomeza kubungabunga no gukorera isuku urwibutso rushya bubakiwe mu rwego rwo gukomeza guha agaciro abatutsi bishwe bazira uko baremwe ndetse no gukomeza gusigasira amateka yaranze igihugu muri rusange.

Urwibutso rwashyinguwemo imibiri ibihumbi 25 rwubatswe n’Ikigo cy’Igihugu gishinzwe gukwirakwiza ingufu mu Rwanda (REG) rwatwaye miliyoni 32 n’ibihumbi Magana atanu z’amafaranga y’u Rwanda.

Mu muhango wo gushyingura imibiri ibihumbi 25 y'Abatutsi bazize Jenoside mu rwibutso rwa Jali
Umuyobozi w’Umujyi wa Kigali Wungirije Ushinzwe Imibereho myiza y’Abaturage, Kazayire Judith, yasabye abaturage kubungabunga no gukorera isuku urwibutso barushaho guha agaciro abatutsi bishwe

Kwamamaza
IZINDI NKURU WASOMA
TANGA IGITEKEREZO

ANDIKA ICYO UTEKEREZA KURI IYI NKURU

AMATEGEKO AGENGA IYANDIKA RY'IGITEKEREZO CYAWE:
Witandukira kubijyanye n'iyi nkuru; wikwandika ibisebanya, ibyamamaza cyangwa bivangura; wikwandika ibiteye isoni,
Wifuza kubona byihuse ibivugwa/ibisubizo ku gitekerezo cyawe, andika email yawe ahabugenewe.
Igitekerezo cyawe kigaragara nyuma y'isuzuma rikorwa na IGIHE.com
Ibi bidakurikijwe igitekerezo cyanyu gishobora kutagaragara hano cyangwa kigasibwa, Murakoze!
ANDIKA ICYO UTEKEREZA KURI IYI NKURU
Kwamamaza
IBITEKEREZO
Join Us

Socialize with Us
Contacts

Marketing
4546
Editor
078 827 26 21
Management
0788 74 29 08 / 0788 49 69 15

Emails: [email protected], [email protected]

Website Developped by

Uru Rubuga Ruheruka Gushyirwaho Amakuru Thursday 3 Ugushyingo 2016
Copyright © 2009 -2014 - IGIHE Ltd - All Rights Reserved