Impamba yihariye u Rwanda rwakuye mu nama ya FOCAC

Yanditswe na Nshimiyimana Jean Baptiste
Kuya 9 Nzeri 2018 saa 10:12
Yasuwe :
0 0

Mu cyumweru gishize abakuru b’ibihugu bya Afurika bitabiriye inama yiga ku bufatanye bw’u Bushinwa na Afurika izwi nka FOCAC, aho u Bushinwa bwemeye gutanga inkunga ya miliyari 60 z’amadorali ya Amerika.

Iyi nama yasize u Rwanda rusinye amasezerano y’imikoranire n’ikigega cy’Abashinwa gishinzwe iterambere rya Afurika CAD, mu kwihutisha imishinga iri hagati y’Abashoramari b’Abashinwa n’u Rwanda.

Nubwo agaciro k’aya masezerano katatangajwe, iki kigega gifite miliyari 10$ zigamije gufasha ishoramari riva mu Bushinwa rijya muri Afurika.

Umuyobozi Ushinzwe Ibikorwa mu kigo cy’igihugu cy’iterambere RDB, Emmanuel Hategeka yagize ati “Iki kigega kizihutisha imishinga itandukanye hagati y’u Rwanda n’abashoramari b’Abashinwa.”

“Miliyari 10$ ziri muri CAD ni amahirwe akomeye yihutisha ishoramari riva mu Bushinwa riza muri Afurika.”

Hategeka kandi yavuze ko u Bushinwa ari “inshuti nziza” yongereye inguzanyo nta nyungu ku bihugu bidakora ku nyanja nk’u Rwanda.

RDB kandi yasinye amasezerano n’Ikigo cy’Abashinwa gishinzwe iterambere ry’ubucuruzi mpuzamahanga igamije gushimangira imikoranire n’ibigo bikora nkacyo mu Bushinwa.

Andi masezerano yasinywe arimo ayo Umuyobozi Mukuru w’Ikigo cy’Igihugu gishinzwe guteza imbere ubuhinzi n’ubworozi RAB, Patrick Karangwa, yasinyanye na Kaminuza yigisha iby’ubuhinzi, Chinese Academy of Tropical Agricultural and Sciences.

The East African yanditse ko muri iyi nama u Rwanda rwakoze imurikabikorwa ku ishoramari n’ubukerarugendo.

Mu kiganiro yagiranye n’Ibiro Ntaramakuru by’u Bushinwa, Perezida Kagame yavuze ko FOCAC ari uburyo bw’ubufatanye kuva bwatangira mu 2000 kandi bwageze kuri byinshi byiza yaba mu burezi, ubuzima, ibikorwa remezo ndetse n’iterambere ry’inganda muri Afurika.

Muri Nyakanga uyu mwaka Perezida Xi Jinping yagiriye uruzinduko mu Rwanda. Perezida Kagame yavuze ko wabaye umwanya mwiza wo kuganira ndetse no kongera ingufu mu mubano n’ubufatanye bw’ibihugu byombi.

Perezida Kagame na Xi Jinping nyuma y'inama ya FOCAC

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza