Imiryango y’abanyeshuri b’abanyarwanda bashimutiwe muri Uganda iri mu gihirahiro

Yanditswe na IGIHE
Kuya 1 Ukuboza 2019 saa 06:41
Yasuwe :
0 0

Abanyarwanda umunani barimo abanyeshuri bane bigaga muri Kampala International University (KIU) nta muntu n’umwe uramenya irengero ryabo nyuma y’uko bashimuswe n’Urwego rushinzwe Ubutasi mu gisirikare cya Uganda, CMI.

Mu ijoro ryo ku wa Gatatu nibwo batwawe n’igisirikare bajyanwa gufungirwa ahantu hataramenyekana. Yaba imiryango yabo, ishuri, abanyamategeko ndetse na Ambasade y’u Rwanda; nta n’umwe urabageraho.

Ku ikubitiro, ishuri n’abantu bo mu miryango yabo babwiwe ko bafungiwe kuri Station ya Polisi ya Kabalagala nyuma biza kuvugwako atariho bari ko bajyanywe muri gereza ya CMI iri ahitwa Makindye.

Ubwo abo mu miryango yabo bajyaga kubareba, umwe mu basirikare yababwiye ko atariho bafungiye.

Bamwe muri aba banyeshuri bavuka muri Uganda kandi ni ho babaye mu buzima bwabo bwose. Bivugwa ko impamvu z’itabwa muri yombi ryabo ari uko bafite inkomoko mu Rwanda.

Aba banyeshuri barimo uwitwa Joram Rwamwojo, usanzwe ari n’Umuyobozi w’Ihuriro ry’abanyeshuri muri iyi kaminuza. Abandi ni Living Kagaara, Emmanuel Namanya na Andrew Mugisha. Bose nta cyaha na kimwe kizwi ko cyaba aricyo bafungiye.

Bafunganywe n’abandi banyarwanda bane barimo Joan Mutesi, John Kamugisha n’abandi babiri bivugwa ko bitwa Kimenyi na Kakuru.

Bagenzi babo bavuze ko bajya gufatwa bakuwe mu macumbi ya kaminuza n’abakozi ba CMI ariko ko batigeze babereka ibyangombwa by’itabwa muri yombi ryabo.

Ubuyobozi bw’ishuri buhangayikishijwe no kuba aba banyeshuri barafashwe mu gihe cy’ibizamini, byongeye nta n’urwandiko rw’uko batawe muri yombi cyangwa se ngo habe hanagaragazwa n’impamvu bafashwe.

Umwe mu bayobozi b’ishuri utashatse ko amazina ye atangazwa, yabwiye Virunga Post dukesha iyi nkuru ko “abanyeshuri bacu barase ibizamini kubera iri tabwa muri yombi. Turatabaza Umuyobozi wa Polisi wa Kabalagala watwohereje kuri CMI atubwira ko aribo babafite.”

Hashize imyaka itatu abanyarwanda batabwa muri yombi muri Uganda, bagafungirwa mu nzu z’ibanga za CMI, ndetse ntihagire ntibagezwe imbere y’urukiko ngo bamenyeshwe ibyaha bakurikiranyweho.

Abatabwa muri yombi bashinjwa kuba ‘intasi’ z’u Rwanda, bafungirwa muri kasho aho bakorerwa iyicarubozo ribaviramo n’ubumuga, bagakoreshwa imirimo ivunanye nko guhinga, kubumba amatafari n’ibindi.

Iri tabwa muri yombi rya hato na hato ryatumye muri Werurwe 2019, Guverinoma y’u Rwanda isaba abaturage bayo guhagarika kujya muri Uganda kubera impungenge z’umutekano wabo, nyuma y’ubuhamya bw’abarenga 900 bari bamaze iminsi birukanwa ku butaka bw’icyo gihugu nyuma yo guhohoterwa n’iyicarubozo bakorewe.

Ibi bikorwa byakajije umurego kuva ubwo u Rwanda rugejeje kuri Uganda ikibazo kijyanye n’uko Umutwe w’Iterabwoba wa RNC uri gukoresha ubutaka bw’iki gihugu cy’igituranyi mu bikorwa ushyigikiwemo n’Urwego rw’Ubutasi mu gisirikare cya Uganda, CMI, hagamijwe gushaka abantu bawiyungaho ngo bahungabanye umutekano w’u Rwanda.

Ubuyobozi bw'ishuri buhangayikishijwe no kuba abanyeshuri barashimuswe bigatuma badakora ibizamini

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza