Kwamamaza

Imirenge ishobora guhabwa abakozi bashinzwe ubuzima

Yanditswe kuya 20-11-2016 saa 16:07' na Evariste Nsengimana


Nyuma y’aho abakozi bashinzwe imibereho myiza y’abaturage mu mirenge bagaragarije ko bagira akazi kenshi kababera imbogamizi mu kuzuza inshingano zabo, Minisiteri y’Ubutegetsi bw’igihugu yatangaje ko igiye kubashakira abakozi babunganira.

Iki kibazo bakigaragarije mu nama y’inteko rusange y’Umuryango ihuza abakozi bashinzwe imibereho myiza y’abaturage mu mirenge yose igize igihugu, ASOC, yabaye ku wa Gatandatu tariki 19 Ugushyingo 2016, yahujwe n’igikorwa cyo gutora abayobozi bawo.

Kubera ubwinshi bw’imirimo bafite harimo irebana na VUP, ijyanye n’imibereho myiza y’abaturage, kuboneza urubyaro, kurwanya malariya n’imirire mibi, ubwisungane mu kwivuza, gukumira ibiza n’ibindi, aba bayobozi bavuze ko bimwe bidakorwa nk’uko bikwiye.

Basabye ko bashyirirwaho umukozi ushinzwe ubuzima kugira ngo bafatanye mu bikorwa by’ubuzima.

Umunyamabanga wa Leta muri Minisiteri y’Ubutegetsi bw’Igihugu ushinzwe imibereho myiza no kurengera abaturage, Alvera Mukabaramba, yababwiye ko izo nshingano batazikora bonyine ngo bazishobore, abasaba gufatanya n’inzego zirimo n’Ibigo Nderabuzima.

Yakomeje ababwira ko mu gihe badafatanyije ntacyo bakora, anabizeza ko ibyo guhabwa abakozi babunganira bigiye kwigwaho harebwa uburyo baboneka.

Ati“Tuzicara turebe uko uwo mukozi yajyaho ariko mu gihe atarajyaho mugomba gukora. Ni gute ujya gukora ubukangurambaga bwa mituweli ugasiga umuntu ubishinzwe?"

Bimenyimana Pierre Celestin, watorewe kuyobora ASOC akaba akomoka mu Murenge wa Kaniga, mu Karere ka Gicumbi, avuga ko uwo mukozi uzaba ushinzwe ubuzima azabagabanyiriza inshingano bakoraga bonyine, bityo binihutishe ibikorwa byabo.

Yavuze kandi ko uyu muryango ayoboye uzabafasha gushyira mu bikorwa inshingano zabo binyuze mu kungurana ibitekerezo ku bibazo bahura na byo ndetse banafashanya mu kuzamura imibereho myiza yabo.

Umuryango ASOC watangiye gukora mu mpera za 2015, icyo gihe abanyamuryango bakaba barahuriraga kuri WhatsApp bagamije kurebera hamwe imbogamizi bahura na zo, gufashanya no guhana amakuru.


Kwamamaza

Kwamamaza
IZINDI NKURU WASOMA
TANGA IGITEKEREZO

ANDIKA ICYO UTEKEREZA KURI IYI NKURU

AMATEGEKO AGENGA IYANDIKA RY'IGITEKEREZO CYAWE:
Witandukira kubijyanye n'iyi nkuru; wikwandika ibisebanya, ibyamamaza cyangwa bivangura; wikwandika ibiteye isoni,
Wifuza kubona byihuse ibivugwa/ibisubizo ku gitekerezo cyawe, andika email yawe ahabugenewe.
Igitekerezo cyawe kigaragara nyuma y'isuzuma rikorwa na IGIHE.com
Ibi bidakurikijwe igitekerezo cyanyu gishobora kutagaragara hano cyangwa kigasibwa, Murakoze!
ANDIKA ICYO UTEKEREZA KURI IYI NKURU
Kwamamaza
IBITEKEREZO
Join Us

Socialize with Us
Contacts

Marketing
4546
Editor
078 827 26 21
Management
0788 74 29 08 / 0788 49 69 15

Emails: [email protected], [email protected]

Website Developped by

Uru Rubuga Ruheruka Gushyirwaho Amakuru Saturday 10 Ukuboza 2016
Copyright © 2009 -2014 - IGIHE Ltd - All Rights Reserved