Imipaka ihuza u Rwanda na RDC ni nyabagendwa: Abaturage mu byishimo

Yanditswe na Mukwaya Olivier
Kuya 1 Kanama 2019 saa 07:29
Yasuwe :
0 0

Imipaka itatu ihuza u Rwanda na Repubulika Iharanira Demokarasi ya Congo (RDC), yongeye gukora nyuma y’amasaha icyenda ifunzwe nta muntu winjira mu Rwanda mu rwego rwo gukumira icyorezo cya Ebola, kimaze guhitana abantu batatu mu Mujyi wa Goma uturanye n’Akarere ka Rubavu.

Iyi mipaka ikaba yafunzwe mu masaha ya saa kumi n’ebyiri za mugitondo ikaba yafunguwe saa cyenda z’igicamunsi.

Ubuyobozi bw’Akarere ka Rubavu, bwavugaga ko abaturage ba RDC bashobora gutaha iwabo ariko abanyarwanda bo baba bihanganye ntibave mu gihugu.

Meya Habyarimana Gilbert yagize ati “Nta murwayi wa Ebola wigeze agaragara mu Rwanda ni ibisanzwe ntanurahagera. Hari benshi bagiye baboneka inaha ariko tugasanga ari umuriro bagataha ariko ni ngombwa ko dufata ingamba kuko hirya bikomeje kumera nabi”.

Abaturage bakora ubucuruzi ku mipaka bari batangiye gutaka ibihombo ariko nyuma yo kongera kwemererwa gukora ingendo bagaragaza ibyishimo.

Niyomugisha Naome ucuruza Matola ku mupaka muto avuga ko nta mukiriya yigeze abona kubera ifungwa ry’imipaka.

Ati “Ubusanzwe abakiriya bacu benshi ni abo muri RDC, ab’inaha kuva mugitondo bazaga bakavuga ko batagura kuko n’ubundi bakorera i Goma nta cyizere cyo kuzongera kubona amafaranga, kuva bawufunguye ubu ubuzima burakomeza neza’’.

Habimana Seleman, ucuruza inyama avuga ko bari bamanuye igiciro kubera nta bakiriya.

Ati “Inyama zari zatangiye kugura 1000 FRW ubu bamwe bahombye kubera ko inyama nyinshi zijya i Goma ariko ubu ubwo bafunguye twongeye tuzisubiza kuri 2200 FRW ku kilo’’.

Abantu basaga 1700 bamaze guhitanwa n’icyorezo cya Ebola muri RDC kuva muri Kamena umwaka ushize.

Mu minsi 15, mu Mujyi wa Goma uhana imbibi n’u Rwanda hamaze gupfa abantu batatu bishwe na Ebola.

Minisitiri w’Ubuzima, Dr Diane Gashumba, yasabye abanyarwanda guhagarika kujya muri Repubulika Iharanira Demokarasi ya Congo nyuma y’uko muri icyo gihugu habonekeye icyorezo cya Ebola.

Abantu bongeye kwambuka ku mupaka mu Karere ka Rubavu
Bimwe mu bicuruzwa byari byabuze abaguzi

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza